19- БӨЛҮМ
Шаар, айылга караганда абдан эле ысып, элдер жеңил кийим кийинип калышыптыр. Таксиден түшүп эле, Шатман алгач эле агайына барып жолукканы университетке келди. Зыңгырана боюн түз алып жүргөн Мамыт агайы Шатманды көрүп жакшы маанай менен учурашты.
Экөө бир топко ар тараптуу кептерди айтып, сагынышып калгандарын билишти. Анан Шатман кетирген катасын кантип жойсо болорун айтты. Албетте ичип алып атасына, аялына тили тийгенин жашырбай айткан соң. Бул көрүнүш дагы кайталанбас үчүн эмне кылсам болот? — деген суроону берди эле агайы Шатманды күлө карап:
– Шатман, ар бир адам өзүнүн күнөөсүн сезе билгени бул абдан жакшы жөрөлгө. Эң чоң күнөө, күнөөнү моюнга албоо. Азыр жүз кызарбай, кумсарып калды. Жүз кызарса уят болгонун сезгени эмеспи. Күнөөнү моюнга алып аны жойгоно аракет кылган, ар бир адамдын эле колунан келе бербейт. Бирок ичкен адамга өзүнүкү туура сезиле берет. Ичкилик адамды бузат, бирок ичкиликти жеңе билген бул жөн адамдын колунан келбеген иш. Эми сен такыр ичкиликти оозуңа албай ишиң менен атаңа, апаңа, аялыңа, айылдаштарыңа көрүн. Анан сенин кадырың калыбына келет. Бул эми айтапаса деле белгилүү.
Мамыт билимге сугарылган, адамдын ички оюн окуп, алдыны көрө билген жагы бар. Шатмандын эмне максат менен келгенин жана анын ички оюн айттырбай эле билген. Эми минтип анын көңүлүн таап, оюн ортого салып, жакшы кеңешин берип үйүнө жөнөттү.
Шатман агайына жолуккан соң дароо эле өзүнөн алты жашка улуу Алтынбек агайынын Болот деген баласынын иштеген жерине келди. Кантсе да көпчүлүк менен иштешип, ар кимдин абалына туура түшүнүп калган Болот, Шатманды жакшы маанай менен кабыл алып, алгач айылдагы жаңылыктар жөнүндө сураган болуп, аркы-беркини сүлөшкөн болушту. Качан сөз кезеги келгенде Шатман келген жөнүн алыстан баштап айта баштады:
– Болот байке, сизге абдан ыраазыбыз. Баягыда мектепке мат алып берип жакшы кылдыңыздар. Азыр балдар спорт менен машыгып, алаксып калышпадыбы.
Болот бул сөздү укканда:
– Шатман, мага эмес сага ыракмат, анын баарын сен ишке ашырдың. Болбосо башка мугалимдер буга чейин эле ошол ишти жасап койсо болот эле го? Ар кимди сындабай жасаган ишин баалай билүү, бул өзү адам баласындагы жакшы сапат.
Бул сөздү укканда Шатман башын ийкеп:
– Байке, сиз абдан туура сөз айтыңыз. Бирөөнүн жакшы жагын көрө билген билимдүү адамдар арасында көбүрөөк экенин байкадым. Ал эми алысты көрө албагандар дайыма кемчиликти гана көрүп, сиз айткандай сын айткандарын да мен айылга барып иштеп баштаганы баам салдым.
Болот сөзгө конок берип угуп олтуруп, аста гана:
– Сын айткан бардык жерде бар. Бирок сынды дагы көтөрө билген да, адамдык жакшы сапатка кирет. Азыр сен али жашсың, көп сын угасың. Анын баарына туура маани бериш керек. Бул жашоодо баатырлар көп, бирок баатыр мүнөздүүлөр аз. Шатман, тез келген атак тез өчөт. Андыктан баарына акырындык менен жеткендин өзү жемишин берет.
Ар тараптуу сөздөр айтылып, качан сөздүн ыгы келгенде Шатман:
– Сизге бир иш боюнча кеңешкени келдим эле — деп, айылдан эмне максат менен келгенин айтып анан өзүнүн оюн ортого салганда Болот бир саамга ойлонуп туруп, Шатманды тигиле карап:
— Бул дагы сенин идеяң болсо керек? Болбосо эмне үчүн буга чейин мектептеги иштеген башка мугалимдер сен айткан сөздү мага айтышкан жок. Мен ушул ойду эчак эле ойлогом, бирок өзүм мектепке барып сурангандан жазганып келгем. Атам үчүн биз баарына даярбыз. Атам мектепте канча жыл иштеди? Анан анын эмгегин биз баалабаганда ким бааламак эле. Макул, биз медалдарын, мактоо баракчаларын анан бир бодо малын көтөрөлү. Анан калганын да көрө жатабыз — деп, жакшы кабыл алып, оюн дагы ортого салды:
– Эгер спорт залга атамдын атын берсеңер, залды ремонт да кылып бергенге даярбыз. Бир кезде атам дагы айтып калчу эле “Спорт залдын кейпи кетти, оңдотуп койсом болот эле, каражат жок” деп.
Болоттун ремонтту дагы моюнга алганы Шатмандын көңүлүн өстүрдү. Экөө бир сааттан ашык талкуу жүргүзүп, жакшы пландарды түзүп, андан дагы жакшы жумуш бар, эгер келип иштейм десең, ал ишти мен жайкы каникул убагына сүйлөшүп коюм деп, Шатманга жумуш убада кылды да, анан Болот, Шатманды сыртка узатып чыкты да, жакын жердеги бир кафеге киришти. Тамак алып берип, чөнтөгүнө 100 доллар салып берди “Баскан турганыңа керек болот” деп. Шатман мындай сыйды күткөн эмес, Болотко абдан ыраазы болуп, эми курсташ баласына жолукканы жөнөдү.
Куланбек бир депутаттын жардамчысы болуп иштеп жаткан. Шатманды көргөндө абдан сүйүндү. Экөө бир бөлмөдө жашап, эгиз козудай ээрчишип жүрүп окууну бүтүшкөн. Тим эле кычырап кийинип, салабат күтүп калыптыр. Экөө бул күнү Куланбектин үйүндө болушту. Куланбек, Шатманды канчалык кыйнаса да ичкиликти оозуна алган жок. Деле сөздөрү түгөнбөй, улам бир окуяны эстеп каткырып күлүп олтурушту.
Аттиң, жакшы санаалаштар жолукканда кандай гана чер жазылат. Бул жолу да экөөнүн черлери жазылды белем, таң күлөөнөк атканга чейин сүйлөшүп олтурушту. Анан гана уйкуга баш коюшту.
Эртеси Шатман жолго чыкты, болгондо дагы абдан жакшы маанайда.
***
Бегайым акыркы кездерде Шатманга такыр түшүнгөн жок. Ал турсун эмнеге мынча муздагына тартып, баштагыдай өзүнө көңүл бурбай калганына таң калып, кайсы жерден ката кетиргенине акылы жетпей турду. Ал турсун эмнеге Шатман күнөө өзүндө болсо, анан минтип кайра өзүн коркутканына таң калып француз философу Шарль Монтескьенин “Бир аз бир нерсе билиш үчүн дагы көп окуш керек” деген сөзүн эстеп, философия тууралуу окуп, Шатмандын кандай абалга туш келип калганын билүү үчүн, өзүнүн кабинетине келип китепти барактады. Жаңы гана китептен бир нерсени окуганы үңүлгөндө эшик чертилип, Максүт менен аялы Алия кирип келип калды. Максүт эмнегедир абдан жакшы маанайда учурашып, анан:
– Бегайым, кимге кайрылсак болот? Алия эмнегедир эле кусуп, тамакка такыр табити тартпай жатат?
Бегайым, Алияны бир көз ирмем менен сынай караганга жетишти да:
– Азыр Жеңиш эже келип калат. Ал кишиге көрүнсөңөр болот. Бирок бул убактылуу эле нерсе. Ар бир аял заты боюна бүткөн кезде талгак болот. Ошентсе да врачтын кеңешин алып койгонуңар жөндүү. Жеңиш эжеге көрүнсөңөр ал өз оюн айтат. Балким дары жазып берет чыгар.
Максүт башын ийкегилеп, Алияны караган болуп:
– Жүрү, анда Жеңиш эженин кабинетинин жанынана күтүп туралы.
Экөө сыртка чыгып кеткенде Максүткө абдан ыраазы болду. Анткени аялына карап, ага көңүл буруп, жакшы мамиле жасаганы үчүн. Шатман минтип ооруканага ээрчитип келмек турсун, өзү менен өзү болуп, үйлөнгөнүнө нааразы болгондой мамиле жасап жатса. Ага салыштырмалуу Максүт аялынын камында жүргөнүнө ичи ачышып кетти. Эгер Максүткө турмушка чыккан болсо, анда кайда болбосун машина менен барат эле го? Шатман машина алганды кой, “кыз боозуп энесин коркутат болуп” мас болуп чыр салганы аз келгенсип минтип таарынып жүргөнүнө арданып, терезени карап ойго алаксыды да, “тандаган тазга жолугат мен болдум” деп өзүнүн кетирген күнөөсүн моюнга алып турду. Ал турсун кайсы бир китептен окуган каарман өзү болду. Ал китепте кызга чоң апасы айтат “Кызым, сен эмес, сени сүйгөн эркекке турмушка чык. Аял затынын сүйүүсү алсыз болот. Эгер сени ала турган бала сени жакшы көрсө анда ал сенин кадырыңа жетет” деген. Бирок ал кыз апасынын сөзүн укпай башка балага тийип алып жашоосунан аксаганын эстеп, өзү дагы жашоосунан аксап калбасын ойлоду. Ушул жерден “Эх, жашоо эмне мынча алдамчысың, бир кезде Шатман менин көзүмө кандай жакшы көрүндү эле, эми ошол көрүнүш кайда кетти, аз убакыттын ичинде?” деп, кобуранып алды.
Андан дагы Максүттүн аялы Алия баасы кымбат шуба кийип жүргөнүн да байкаганга үлгүрдү. Ал эми Максүт өзү ишинен көтөрүлүп, райондун борборуна кеткенин эки апта илгери кулагы чалган. Эми минтип аялы да, өзү да кычырап кийинип андан дагы маданияттуу сүйлөп, интелегент адамдардай келип сыртка чыкканы Бегайымдын оюна бүлүк салды. Ушул жерден өзүнүн дагы ичи тарып кеткенин Бегимай элес ала бербеди.
Кечке кабагына кар жаап, кыртышы эч нерсени сүйгөн жок. Ооба, Алиядай өзүнүн деле боюнда бар, талгак болуп жатканын эч кимге билгизбей, тамакты эптеп жасап, келиндик милдетин аткарып жүрөт. Бирок эч ким көңүл бурмак турсун, абалын да сураган жан болбоду го. Ал турсун боюнда бар экенин эч кимге деле билгизе элек. Көрсө акча бар жерде аялдык наздануу, эркелөө, кимгедир таянуу болорун ушул саам оюна алып “кантип байыса болот” деп ойлоп койду. Бир жагынан Шатман деле мас болгондо чындыкты айтканына эми маани берди.
Кабинетинде ар нерсени ойлоп олтуруп, иш убактысынын бүткөнүн да байкабай калган Бегайым ишин жыйыштырганга кам урду. Мына, адам баласы көрө албастыкка берилгенде жана бир нерсеге ичи тарыганда кандай гана терс энергияга кабылып, ден-соолукка зыян келтирет.
Кабинетин бекитип, жаман ойдун кучагынан чыга албай үйгө келип, жаңы гана чайга олтурганда сырттан Шатман кирип келип калды.
Шаардан ала келген базарлыктарын столго коюп, анан апасына кемпирлер салынып жаткан жаңы модадагы жоолукту берди. Атасына сабы кооз маки берди. Ал эми Бегайымга алтын чынчыр берип:
– Бул менин сиздердин алдыңыздарга түшкөнүм. Эми ичкилик дегенди такыр оозума албайм. Мени кечирип койгула, — деп өтүндү эле, апасы:
– Балам, биз сени эчак эле кечиргенбиз. Убара болбой деле койсоң болмок, — деген болду. Ал эми Бегайым абдан сүйүндү. Атасы макини кармалап:
– Ырас кылбадыңбы! Карыганда тиш өтпөй, маки керек болот экен. Баягы макимди кайда койгонумду билбей калып, маким жок жүрдүм эле — деп, макини кызыга карап, кармалады. Белектер баарына жакканын дароо билип:
– Бул эч нерсе эмес. Ата, мени шаарга ишке чакырып жатышат. Турдубек байкем айткандай мугалимдик иш менен жүрсөм кедейдин — кедейи болуп, элдин арты болуп жашап, сиздерди бага албай калам го?
Апасы сөздү бөлүп:
– Балам, ал эмне дегениң? Бизди багасыңбы же бизди баккандан качканыңбы? Шатман нанды сындырып оозуна салып:
– Апа, силерди кантип багыш үчүн ишимди которгону жатпайынбы. Абдан жакшы ишке чакырып жатышат. Азырынча мектепте иштеп турам. Анан каникул башталганда шаарга кетем.
Орозаалы карыя тигиле карап:
— Эмне, Бегайымды кошо ала кетесиңби?
– Жок, ал бул жерди ишин уланта берет.
Карыя жаман көзү менен карап:
— Балам, сен жакшылап ойлондуңбу? Сен шаарда, келин мында болгону кантип болсун?
Шатман ушул жерден атасына тике карап:
— Ата, өзүңүз айтыңыз эле го? “Даамдап тамак ич, ай сайын аял ал, суу башы сайын там сал” деп. Айылда жүрсөм ичкиликтен кол бошобойт. Экинчиден келиниңиз төркүнү жакын мен ичкен сайын кетип калат, үчүнчүдөн өзүм эле эмес апам экөөңөрдү дагы даамдап тамак ичирүү менин милдетим. Аз күндө жакшы иш болот. Ошондо менин ишимди билесиздер.
Бегайым, Шатмандын чечкиндүү айткан сөздөрүнө ыраазы болду. Бир жагынан абдан туура сөз айтты. Айылда жүрсө ичкилике берилет анан айылга баркын кетирет. Аз убакыт илгери эле жашоосуна нааразы болуп жаткан Бегайымдын кабагы ачылып, көңүлү өсүп турду. Анткени эч кимден мындай баалуу белек ала элек болучу. Сөз ар тараптуу уланып тамак ичилип жатканда Бегайым окшуп сыртка чуркап кетти.
Бул көрүнүш Орозаалы карыя менен Канышайдын көңүлүн өстүрдү. Анткени экөө тең билишти неберелүү болушарын.
***
Уландысы бар...
Присоединяйтесь к ОК, чтобы подписаться на группу и комментировать публикации.
Нет комментариев