Устоз ихлос сурасини ўқиса ҳам зикир ҳисобланадими ва умуман зикир қилиш учун қайси калимларни айтиш керак? Жовоб учун раҳмат.
● ЖАВОБ: Ва алайкум ассалом ва раҳматуллоҳ.
Албатта, зикр ҳисобланади.
Энг улуғ зикр - Оллоҳнинг каломи. Ихлос сураси эса Қуръони каримдаги энг улуғ суралардан ҳисобланади. Ҳатто пайғамбаримиз алайҳиссалом "Қул ҳуваллоҳу аҳад Қуръоннинг учдан бирига тенг" дейдилар. Яъни, Қуръони карим ўз ичида Оллоҳ таолонинг гўзал исмлари ва улуғ сифатларини, шариат аҳкомларини, турли панд-насиҳатларни жойлаган бўлса, ихлос сураси шу уч турдан энг шарафлисини - биринчисини ўз ичига жо этган.
Хуллас, Қуръон оятлари энг улуғ зикрлар ҳисобланади. Айниқса, фотиҳа, ихлос, фалақ, нос, кафирун, мулк, ёсин сураларини, оятул курсийни, бақара сурасининг охирги икки оятини, каҳф сурасининг аввалги ўн оятини мунтазам ўқиб юриш мақсадга мувофиқдир. Чин мўминликни мунофиқликдан ажратиб турувчи белгилардан бири ҳам шу - Оллоҳ таолони кўп зикру ёд этишдир. Оллоҳ таоло Қуръони каримда мунофиқларни ёмонлаб, "Оллоҳни улар жуда оз зикр (ёд) этадилар" дейди.
Қуръони карим зикридан ташқари суннати мутаҳҳарада пайғамбар алайҳиссаломдан барча ҳолатларда, барча вақтларда ўзига хос зикру дуоларни айтиб юришни тавсия қилувчи кўплаб ҳадиси шарифлар келган. Эрталаб ва кечқурун айтиладиган, ухлашдан олдин, кечаси уйғониб кетса, тонгда турганда, намозлар ичида саждаларда ва аттаҳийётдан сўнг саломдан олдин, намозлар тугагандан сўнг, кийим кийганда, ечганда, касал бўлганда, кун булутли бўлганда, ёмғир ёққанда, момоқалдироқ бўлганда, гуноҳ қилиб қўйганда, қарзга ботганда, ғазаби келганда, ойни кўрганда, бир нарсадан ажабланганда ва ҳоказо, борингки, банда қайси ҳолда бўлганда нима айтиш яхшилигини суюкли пайғамбаримиз алайҳиссалом айтиб кетганлар, қолдирмаганлар. У зот айтиб кетган бу улуғ зикрларга чекланишнинг ўзиёқ кишини тили зикрдан бўшамайдиган ҳолга келтириб қўяди. Ҳамма гап бу ҳадисларни ўқиб, ёдлаб, амал қилишда. Оллоҳ таоло барчамизни пайғамбар алайҳиссаломга чин эргашувчи бандаларидан қилсин.
Шайх Сайфуллоҳ Носир ҳафизаҳуллоҳ
Присоединяйтесь к ОК, чтобы подписаться на группу и комментировать публикации.
Нет комментариев