Предыдущая публикация
Ҷиноёт миёни муҳоҷирон коҳиш ёфтааст
Ба гуфтаи вазири корҳои дохилии Русия имсол амалҳои ғайриқонунӣ дар миёни муҳоҷирон коҳиш ёфтааст.
Ба гузориши ТоҷикПресс ба нақл аз Спутник, Владимир Колоколтсев, вазири умури дохилаи Русия дар дидор бо мақомоти Тоҷикистон гуфт, дар Русия имсол амалҳои ғайриқонунӣ аз ҷониби шаҳрвандони Тоҷикистон ва ҳам алайҳи шаҳрвандони ҷумҳурӣ коҳиш ёфтааст.
Вазири Русия афзуд: “Ин нишондиҳандаи бисёр муҳим аст, ин тамоюлро бояд ҳифз кард”.
Дар ин дидор Колоколтсев таъкид кард, ки Русия ва Тоҷикистон табодули иттилоотро ба роҳ мондаанд ва дар ҳалли амалётҳои фаврӣ таҷрибаи зиёд доранд.
Вай ба унвони мисол аз ифшои куштори духтари ҷавон, ки беш аз 30 сол пеш дар Суғд содир шуда буд, мисол овард.
Дафтари матбуоти Вазорати корҳои дохилии Тоҷикистон дар баёнияе гуфтааст, ки дар мулоқот муҳимтарин вазифаҳои ҳамкорӣ, мубориза бо ҷиноятҳои фаромиллӣ, табодули иттилоот ва дигар масъалаҳои мубрами рӯз баррасӣ шуданд.
Илова бар ин, Колоколтсев дар бораи коҳиши қонуншиканӣ ва содир намудани ҷиноятҳо аз сӯйи шаҳрвандони Тоҷикистон таъкид кард.
Дар ҷараёни ҷаласа оид ба андешидани чораҳо дар самти такмил додани ҳамкориҳо байни воҳидҳои тафтишотии Вазоратҳои корҳои дохилии ду кишвар, инчунин пешгирӣ, муайян ва ошкор кардани ҷиноятҳои вобаста ба гардиши ғайриқонунии маводи нашъадор, омодасозӣ ва баланд бардоштани иқтидори кадрҳо як қатор таклифҳои судманд пешниҳод карда шуд.
Дар идомаи ҷаласа аз ҷониби Вазирони ҳарду кишвар Нақшаи кории Вазоратҳои корҳои дохилии Русия ва Тоҷикистон дар соли 2025 тасдиқ гардида, дар доираи Мушовараи якҷояи Вазоратҳои корҳои дохилии Русия ва Тоҷикистон қарорҳои дахлдор қабул карда шуд. https://tajikpress.com/2024/11/19/%d2%b7%d0%b8%d0%bd%d0%be%d1%91%d1%82-%d0%bc%d0%b8%d1%91%d0%bd%d0%b8-%d0%bc%d1%83%d2%b3%d0%be%d2%b7%d0%b8%d1%80%d0%be%d0%bd-%d0%ba%d0%be%d2%b3%d0%b8%d1%88-%d1%91%d1%84%d1%82%d0%b0%d0%b0%d1%81%d1%82/
Следующая публикация
Нет комментариев