Авылыма(моңсу шигырь)
Авылымның тын урамы,
Карт өянке, чал тирәк.
Уйный хатирә бураны,
Ярсынып тибә йөрәк.
Бакча арты инеш буе..,
Инеш буе ак казлар...
Инеш буе коесына
Суга йөриләр кызлар.
Зифа буйлы, нечкә билле..,
Җил тарта күлмәкләрен.
Көянтәле иңнәрендә,
Су тулы чиләкләре.
Авылымда егетләр дә,
Төшеп калганнар түгел.
Киң җилкәле, көчле беләк,
Типсәләр өзә тимер.
Көндез эштә, ә кичләрен
Авыл моңга урала.
Гармун тавышы, җырлар агышы
Еракларга тарала...
Болар бар да хатирәдә,
Үткәнемдә калганнар.
Тормышыбыз юлларына
Үз эзләрен салганнар.
Ә хәзер тып-тын урамда
Карт өянке баш чайкый.
Чал тирәкләр лебердәшеп
Моңсу шелтәсен ташлый:
«Киттегез дә оныттыгыз
Ялгызлыкта калдырып!
Ә без сезне һаман көттек
Тамырларны талдырып.
Өмет иттек, кайтырсыз да,
Авыл җанланыр диеп.
Һәр язларны каршыладык
Матур күлмәкләр киеп.
Тик, өметләр акланмады,
Ел артыннан ел үтте.
Замананың ачы җиле
Безнең дә җанны өтте.
Бакча арты инешеннән
Сулар акмый күптәннән.
Ак казларның бәбкәләре
Йөгермиләр үләннән.
Яшьләр дә хәзер килмиләр
Карт өянке янына.
Сөйләмиләр үз серләрен
Айлы төн колагына.
Авыл тынды, кешесе аз,
Юк элеккеге моңы.
Юк, җәйләрдә туа торган,
Печәнле ыгы-зыгы.»
Карт өянке башын игән,
Сагышлана чал тирәк.
Авылларга җан өрергә,
Дуслар, нишләргә кирәк?!
29.06.2024 ел
Айрат Шәйхетдинов
Присоединяйтесь к ОК, чтобы подписаться на группу и комментировать публикации.
Нет комментариев