11-бөлүмү
Жамгыр токтогонуна аз эле убакыт болгондуктан анын суулары жерге сиңе элек болчу.Шаарды аралап чыккан машина анча алыс эмес айылдарга баруучу жолго түштү.Көчөдөгү коюлган фонарлар бүтүп,узун караңгы жолдо ,асфальттын анча мынча чуңкурларына топтолгон жамгырдын сууларын жолдун жээгине чачырата айдап,катуу күлөнгөн чет элдик машина зымырап баратты.
"Кылган күнөлөрүм үчүн кечирим сурайм,эмне кылып жазаласаң да баарына даярмын Жаратканым.!Кыздын өмүрүн кайрып бер!Өлтүрө көрбө!
Салондун ичинде рульду мыжыга кармаган Канат Мырзаевич газды катуу тээп,жолдон көзүн албаганы менен ооз учунда күбүрөнүп тиленип баратты.Өзүнүн айылдагы үйүнө чейин жарым сааттык жол эле.Катуу айдап келгендиктен он беш мүнөттө эле жетип келди.Дарбазаны ачып үй тарапка ыкчам басып баратканда аны көргөн кара дөбөт алдынан арылдап үрүп чыкты.Үй ээсин тааный коюп,бутуна сөйкөнө оролошо кетти.Канат Мырзаевич итке да көңүл бөлбөй чалыштап үйгө кирип барды.Көчөдө күйүп турган чоң лампанын жарыгы менен экинчи кабатка көтөрүлүп,Сабира эже уктап жаткан бөлмөгө кирди.Жарыкты күйгүзүп аялына жакындады
-Сабира,Сабира ойгон!
Керебетте жаткан аялын түртүп жатты.Селт эте чоочуп көзүн ачкан Сабира эже дубалдай агарган күйөөсүнүн өңүн көрүп ,катуу коркуп кетти.Бир саамга оозуна сөз келбей жалдырап карап отуруп калды.
-Сураныч,тез жардам керек мага!Ал өлүп калды окшойт...!Турчу оордуңдан тезиреек жетип баралы!?Мен аны өлтүргүм келген эмес..
Канат Мырзаевич өзүн колго ала албай шок болгон адамдай бөлмөдө ары бери басты.Сабира эже сөз ким тууралуу болуп жатканын түшүнө коюп,бир аз өзүнө келип катуу силкинип алды.Оордунан туруп түнкү жаткан кийимдеринин үстүнөн эле халатын илип күйөөсүн ээрчий сыртка чыкты.Үн сөзссүз отурган экөө машинада баратышты.Канат Мырзаевич өзүн басып,машинаны орточо ылдамдыкта айдады.
Сабира эже үйдүн босогосун аттаганда эле мурдуна кандайдыр бир даарынын,нашатыр спиртинин жыты урунду.Бутунда үй тапичкеси болгондуктан ары бери чечип күйөөсүнүн артынан бөлмөгө кирип барды.Керебетте купкуу болуп жаткан кызды көргөндө,оюна эч нерсе келген жок.Кыздын арык ичке билегинен тартып,тамырын кармады.Бир аз кармап тургандан кийин тамыры билинер билинбес болуп алсыз согуп жатканын байкады.
-Жаны бар экен!Бизде үмүт бар!Анын жашап калышы үчүн күрөшүүбүз керек!Тезинен ооруканага алып баралы!
Сабира эже сүйлөгөнү менен күйөөсүнө көңүл бөлүп,ашыкча суроо да берген жок.Анын көздөгөн максаты ушул кыздын өмүрүн сактап калуу керек эле.Кыздын далысынан кармап бери бурмакчы болгондо Канат Мырзаевич аялын түшүнө койгондой кызды шак көтөрө калды.Анын алсыз колдорун мойнуна артып,босогону көздөй басышты.Алар машинага жеткиче жолунан эч ким жолуккан жок.Кызды арткы орундукка жаткызып .Ооруканага бет алышты.Сабира эже жол бою күчтүү тааныш врачтарына чалып,ооруканага тез келишин өтүнүп баратты.Жадакалса кече жакында келген профессорду да таңга жуук уча турган рейсинен калтырды.Баары Сабира эжени сыйлагандыктан анын сөзүн эки кыла албай,түн уйкуларынан кечип,ооруканага жетип келишти.Операцияга кирип кеткен врачтар кыздын өмүрү менен төрт сааттан ашуун күрөштү.Сабира эже өзү баш болуп ичкериде карап турду.Канат Мырзаевич сыртка кайра кайра чыгып тамеки чеккени болбосо,калган убакта коридордо ары бери басып жүрдү.Бегимайды алып кирип кеткен эшик ачылып,врачтар чыга баштады.Алардын түнөргөн жүзүн көргөн Канат Мырзаевичтин жүрөгү оозуна келип такалды.Аялы бул жерде иштегендиктен аны баары таныйт эле.Ошондуктан Бегимай менен болгон мамилесин билдиргиси келбей,аялын күткөн адамдай ал врачтардан эч нерсени сураган жок.Профессор менен чогуу чыккан Сабира эже күйөөсүнө көңүл бурган жок.Бери жакта столдо отурган мед айым кызга "тез арада смендегилерди чогулткула менин кабинетиме"деп айтып,экинчи кабатка көтөрүлүүчү тепкич тарапка басып кетти.Коридордон өтүп бара жаткан мед айым кыздардын "операция ийгиликтүү аяктады"дегенин уккан Канат Мырзаевичтин көңүлү бир аз оордуна түшүп,отургучка барып,башын шылкыйта жерге салып отуруп калды.
******
Алар сыртка чыкканда батыш тарап кызарып күн чыгайын деп калган эле.Сабира эже аябай эле чарчаңкы көрүнүп турду.Машинага отураары менен эле отургучка башын жөлөп,көзүн жумуп алды.Канат Мырзаевич аялына карап бир нерсени сүйлөйүн деп баратып оор улутунуп тим болду.
-Элди ишендириш мага кандай оор болгонун билесиңби?Бул кыз мурда бизде иштеп кеткен турбайбы?Дагы жакшы операция башталып жатканда бир мед айым кыз айтып калды.Ал айтпаганда экөөбүздүн алыбыз эмне болоор эле...Чогулушта баарына "бул кыз башта менин колумда иштеген,айлык аз кетем дегенинен,менин үйүмдө кызматчы болуп иште,эки эсе көп төлөйм деп сунуш кылганмын,себеби бул кыз менен мамилебиз өтө жакшы болчу.Колумда сынап,уулдарымын бирөөсүнө келин кылам деп жүргөн элем.Терезе жууп жатып түшүп кетиптир.Биз үйдө жок элек"деп айттым.Себеби эртеге таң атаары менен милиция кызматкерлери жетип келеерин билесиң да?Экөөңөр эмне талашканыңарды билгим да келбейт!Сага колумдан келишинче жардам кылдым.Ал кыздын жашаш жашабасы Кудайдан.Эмнеси болсо да сен эл алдында акталып чыктың.
Сабира эже көзүн жумган калыбында ушуларды сүйлөдү.Канат Мырзаевич рульду кармаган колун алып,аялынын колуна койду.
-Рахмат сага!Кечир мени...
Алар үйгө жетип калгандыктан машинаны токтотуп аялына карады
-Мен чарчадым.Мени тынч кой!Азыр сени менен мамиле түзүүнү каалабайм!Баары кандай аяктаса,ошол бойдон калсын!Артыман кирбей эле кой сураныч!?
Сабира эже машинадан түшүп ичкериге кирип кетти.Үйгө кирип түз эле өзүнүн бөлмөсүнө барды.Уйку даарыдан күндөгүдөн көбүрөөк ичип,курбусуна "бүгүн бара албайм "деп смс жөнөтүп,телефонун өчүрүп салды.Керебетке кулаганда эле көзүнөн аккан жаштар бетин жууп жатты.Бир аздан кийин Сабира эже кирпиктери сууланган бойдон уйкуга кетти.......
Уландысы бар
Присоединяйтесь к ОК, чтобы подписаться на группу и комментировать публикации.
Комментарии 5