Предыдущая публикация
Насиб қилмаган буюм
-Чиройли идишлар экан. иккитасини ол, иккаламиз чой ичамиз, фарзандларимиз туғилса қолганларини ҳам ишлатамиз, -деди куёв бежирим идишларни олмоқчи бўлиб.
-Тегманг, уни онам фалон пулга олганлар, чойни пиёлада ҳам ичаверамиз.
Янги келинчакнинг гапидан кўра оҳанги қаттиқ ботган куёв бошқа бу мавзуга қайтмай қўя қолди...
Тўнғич фарзанди биринчисини синдирганида бир шапалоқ туширди. Идишлар тўплами бузилган эдида. Кейин яна биттасини чанг артаман деб, ўзи синдириб қўйди, алам билан ахлат идишига улоқтирди. Олис қишлоқдан
қайнонаси келганда иккинчи фарзанди жавондаги чиройли финжонда бувисига чой қуйиб бераман деб, бир эмас иккитасини уриштириб четини учириб ўтирипти.
-Нима қилдинг? Ғазаб билан болага яқинлашаётган келинини кўриб қайнонаси ҳай-ҳайлаб кетди.
-Келган бало-қазо шунга урсин. Идиш ўлсин, синса асло ачинманг.
Идиш синдирадиган фарзанд берганига шукур қилмайсизми?
Келин бир оз ҳовуридан тушди.
Унда жуда ёш эди.Мана ўзи ҳам ўша пайтдаги қайнонасининг ёшига етиб қолди.Бугун ертўлага тушдию кераксиз идишлар қаторида турган икки дона финжонни таниб қолди.Бирор марта ҳам ишлатилмаган буюмларни олмоқчи бўлди, аммо қалтироқ қўллари билан тушириб юборишидан қўрқиб, тегмай қўя қолди...
Салходжаева Феруза.
Следующая публикация
Комментарии 2