Умид узма бу дунёдан,
замонлар ҳам ўтиб кетгай,
Замон ичра худо урган
ёмонлар ҳам ўтиб кетгай.
Ўтиб кетгай зўравонлар,
ўтиб кетгай жўломонлар,
Бу карвонлар, бу сарбонлар,
бу хонлар ҳам ўтиб кетгай.
Бўғиб турган илонлардан
бўшалгайсан тамом бир кун,
Заҳарлардан қутилгайсан -
чаёнлар ҳам ўтиб кетгай.
Адолат йўқ дема, аммо
юзинг бургин саройлардан,
Худо ҳақ деб яшайвер сен,
аёнлар ҳам ўтиб кетгай.
Бири маддоҳ, бири суллоҳ,
бири кўппак сурув ичра,
Ювош қўй деб таёқ тутган
чўпонлар ҳам ўтиб кетгай.
Бўлинган бўрига емдир -
буюк боболаринг айтган,
Кўзингни оч, ахир бир-бир
маконлар ҳам ўтиб кетгай.
Чидаб бўлмас бу қисматга,
бу ғафлатга, бу даҳшатга,
Чидайверсанг, ҳамон тарқоқ
Туронлар ҳам ўтиб кетгай.
Ватан, сансан маним жоним,
жаҳоним ҳам ўзингдирсан,
Маним сансиз бу жоним ҳам,
жаҳоним ҳам ўтиб кетгай!
Ғафуржон ТОЖИБОЕВ
2023.19.06.
Присоединяйтесь к ОК, чтобы подписаться на группу и комментировать публикации.
Нет комментариев