Предыдущая публикация
Обсуждаемые темы
последний комментарий вчера в 09:48
Бузаевка - 80 яшь!
15 октябрьдә сөекле тормыш иптәше, кадерле бабай, картатау Биктимер Бузаевка 80 яшь тулды.Ул Яркәү районы, Рәгес авылында дөньяга килә. Мәктәпне тәмамлап, 3,5 ел Совет Армиясе сафларында хезмәт итә. 1968 елда өйләнә.
Сәүрә Әкбәр кызы белән алар балачактан ук таныш булалар, туган авылларыннан 12 чакрым ераклыктагы бер мәктәптә укыйлар. Ә инде үсеп җиткән Биктимер армиядән кайткач, үзенең тыйнак гүзәле Сәүрәдән дә яхшырагы, якынрагы юклыгын аңлый.
Комсомол туен үткәрәләр, ә алты елдан соң Яркәү районыннан Каскарага, яшь совхозга күченәләр. Хуҗалык директоры, Сәүрә белән Биктимергә күпме хезмәт көне язганнарын күреп, аларны берсүзсез эшкә ала. Бузаевларның бөтен хезмәт тормышы шунда, «Каскаринский»да үтә. Сәүрә Әкбәр кызы бухгалтер булып эшли, яшелчәләр үстерә, Биктимир Хатка улы трактордан алып сөт ташучыга кадәр барлык төр техникада хезмәт куя. Икесе дә вазифаларын намус белән башкаралар. Гаилә башлыгы социаль ярышларда җиңеп чыккан, халык хуҗалыгы казанышлары күргәзмәсендә катнашкан һәм район газетасында басылган мәкаләләр герое булган, хуҗабикә Мактау грамоталары һәм бүләкләр алган, алар арасында келәм һәм ак төлке (песец) тиресеннән бүрек кебек кыйммәтле бүләкләр дә тапшырылган. Бузаевлар биш балаларына да белем бирделәр, барысы да хезмәт сөючән булып үстеләр, гаилә кордылар, балалар тәрбиялиләр.
Шул еллардан бирле аларның гаиләсе зурая: хәзер анда унике онык, өч оныкчык бар.
40 ел - Биктимер улының хезмәт стажы бу сан. Һәм барысы да «Каскаринский» совхозындагы бер предприятиедә. Киң профильле механизатор ул.
Пенсиядә дә бакчада кайнашалар, анда бар нәрсә дә үсә. Конкурсларда катнашалар, Каскара хакимиятендә почетлы урыннар алалар.
Лилия ЗӘЛИЛОВА,
Төмән районы, Каскара поселогы.
(Гөлнур Вәлиева тәрҗемәсе).
последний комментарий 8 февраля в 20:00
1 нче октябрь - Өлкәннәр көне
Бәхет - тормыш ямен тоеп яшәүдәЯркәү районы татар милли-мәдәни автономиясе каршында эшли башлаган «Уңган хатын-кызлар» түгәрәгенең актив хатын-кызы, авыл ветераннар советы әгъзасы, «Халык сәнгате - 2024» өлкә бәйгесендә абыйсы Сабирҗан Замалов язган «Туган йортым» шигырен сәнгатьле итеп сөйләп 1 урынга чыккан, гала-концертта катнашып тамашачылар мәхәббәтен яулаган Минзифа Кәримова күптән түгел «Хезмәт ветераны» исеменә ия булды. Һәм өлкә автономиясе, Яркәү мәдәният йорты исеменнән «Татар милләтенең мәдәниятен үстерүдә башкарган олы хезмәте өчен» дигән Рәхмәт хатлары белән бүләкләнде.
Минзифа Баһаветдин кызы 1988 елда Яркәү авыл мәдәният йортында Әгъзам Колмәтов оештырган «Туган тел» фольклор җыр ансамбленең беренче көненнән үк җырларга йөри һәм менә инде 35 елдан артык ансамбль данын өлкәгә таныту эшенә бөтен көчен, сәләтен, вакытын багышлый. Ансамбль беренче адымнарын райондагы татар авылларына концерт программалары белән йөрүдән башлый. Халык күңелен яулап, тәҗрибә туплаганнан соң Сабантуйлар, «Дуслык күпере», «Фольклор», «Халык сәнгате» һәм башка өлкә фестиваль-бәйгеләрдә үзләренең осталыкларын дәлилләп, дәрәҗәле урыннар яулыйлар. Озак еллар Минзифа Баһаветдин кызының улы Зинар Кәримов әлеге ансамбльнең йолдызчыгы булып тора. Балачакта башкарган такмакларын, аннары җырларын тамашачылар аеруча яратып тыңлыйлар, чыгышларын көчле алкышларга күмәләр. Әлеге ансамбльдә сәләтен үстергән Зинар Айзәт улы бүгенге көндә талантлы җырчы һәм оста чаралар алып баручы буларак өлкәгә танылды.
Минзифа Кәримова 1960 нчы елның 2 августында Яркәү районы, Кызылъяр авылында яшәгән Сәлиха Юзбак кызы белән Баһаветдин Сираҗетдин улы Замаловлар гаиләсендә, 9 бала арасында бишенче бала булып дөньяга килә.
Әтисе оста балтачы була. Ул чакта авылда төзелгән бер генә йортка да аның үткер балтасы тимичә калмаган. Шулай ук ул бик матур җырлаган да. Мәҗлесләрдә борынгы җырларны сузып җибәрүгә, һәркем эшен ташлап, онытылып, аның җырын тыңлаган. Әтиләренең моңлы тавышы 9 баласына да күчкән. Гаилә бәйрәмнәрендә Замаловлар әти-әниләрен искә алып, әтиләре яраткан җырларны җырлап күңелләрен юаталар.
Минзифа Баһаветдин кызы 8 сыйныфны авыл мәктәбендә, урта белемне Плеханово мәктәбендә ала. Аннары Төмән шәһәренең 13 нче училищесында тегүче-кисүче һөнәре буенча белгечлек алып, Яркәү авылына көнкүреш хезмәте күрсәтү комбинатына эшләргә кайта. 1982 нче елда Тархан авылы егете Айзәт Әхмәткәрим улы белән гаилә корып, Яркәү авылында яшәп калалар. Биредә яшьләр күпсанлы туганнары ярдәме белән зур йорт төзеп чыгалар, тәртипле, эшчән 3 бала үстерәләр. Илебездә барган үзгәртеп кору чоры Минзифа Баһаветдин кызының язмышына да кагылып үтә. Көнкүреш хезмәте күрсәтү комбинаты ябылгач, ул 5 ел Пионерлар йортында, аннары Усалка балалар йортында кул эшләре буенча түгәрәкләр алып бара. 2009 нчы елдан 2017 нче елга хәтле Яркәү мәдәният йортында тегүче-кисүче вазифасын башкара. Яркәү авылының визит картасына әйләнгән «Калинка» җыр ансамбленең җырчыларына күз явын алырлык костюмнар тегә. Шул ук вакытта үзе «Туган тел» ансамблендә җырлый. 2015 нче елда лаеклы ялга чыккач, авыл ветераннар советының иң актив әгъзасы буларак та, авылдашларын туган көннәре, бәйрәмнәр белән котлап бүләкләр тапшыра, кәефләрен күтәреп матур җырлар башкара, шулай ук ул ветераннар оешмасы уздырган ярышларда, бәйгеләрдә катнаша.
42 ел бергә гомер кичерүче Минзифа Баһаветдин кызы белән Айзат Әхмәткәрим улы Кәримовларның йортлары беркайчан да кунаксыз тормый. Һәркемне якты йөз белән каршылап, уңган хуҗабикәнең тәмле бәлешләре, ция шәңкәләре, тукацлары белән сыйламыйча чыгармыйлар. Зур йорт һәм хуҗалык та булгач, биредә эш кайнап тора: бакчада эшләп тә, урманда гөмбә, җиләк-җимеш җыеп та, аларны бергәләп эшкәртеп, төрле кайнатмалар, кабымлыклар әзерләп тә өлгерәләр, сатып, керем дә ясыйлар. Балаларына 5 оныкларын тәрбияләргә дә ярдәм итәләр.
Рәүфә КАНГАЗИНА.
последний комментарий 8 февраля в 09:56
Тубыл районы автономиясенә 10 ел
Тубыл районы себер татарлары автономиясе 10 еллык юбилеен билгеләп үтте. Бәйрәм чарасы Купшан хаҗи исемен йөрткән Тубылтора мәчетендә изгеләрнең рухына, исәннәргә сәламәтлек, дөньяга тынычлык, имин тормыш теләп Коръән аятләреннән, догалардан башланды. Узган чара турында район себер татар милли–мәдәни автономиясе рәисе Гөлсем Рябикова: «Халкыбызның кунакчыллыгын күрсәткән Сәрвәр апа Давлетовага, авыл халкына рәхмәтлемен. Халкыбыз бердәмлеген, ярдәмчеллеген күрсәтте. Аннары бәйрәм кунаклары белән Дегтярево клубында узган чарада катнаштык. Бәйрәм сәхнәсеннән татар җырлар, моңлы көйләр яңгырады, дәртле биюләрне тамашачылар җылы кабул иттеләр.Безнең шатлыклы бәйрәм чарасын Төмән, Тубыл шәһәрләреннән килгән, Дегтярево клубы артистлары матур чыгышлары белән сөендерделәр. Төмән шәһәре себер татарлары автономиясе рәисе, бәйрәмебезнең хөрмәтле кунагы Динар Абукин Рәхмәт хатлары тапшырды. Тубыл шәһәре «Ак калфак» хатын-кызлар оешмасы рәисе Айсылу ханым Юнысова үзе килә алмаса да, бәйрәм күчтәнәчләрен җибәрде. Аңа һәм бәйрәмдә катнашкан Равилә Фазыйловага изге эшләрендә уңышлар телим. Монда туган телебез, динебез, мәдәниятебез сакланган. Бу авылның тырыш, хезмәт сөйгән халкы татар милләтенең горурлыгы итеп сөйләрлек һәм күрсәтерлек. Милли ризык тулы табын артында чәйләр эчеп, милли-мәдәни тормышыбыз турында сөйләштек. Без туган илебез белән горурланып, телебезне саклап, мәдәниятебезне үстереп, мондый чаралар оештыра алганыбызга шатланабыз. Мәдәни программаны оештыручы Дегтярево авыл клубы хезмәткәре Тәнзилә Хәмитовага, махсус хәрби операциядә булган солдатларыбызга оекбашлар бәйләүче Мәүлия Әйтмөхәммәтовага, Рәйдә Шәриповага рәхмәтлемен. Бергә дус, тату, шатлык-кайгыларны уртаклашып, эшебездә яңа максатлар куеп киләчәктә дә яшәргә, эшләргә язсын», - дип сөйләде. Чыгышларда иҗтимагый милли-мәдәни оешмаларның эше төрле юнәлештә барганы турында сүз алып барылды.
Римма УМИТБАЕВА.
последний комментарий 8 февраля в 07:17
Яңа китап презентациясе
Тубыл шәһәрендә яшәүче җырчы-композиторлар, рәссамнар, Төмән өлкәсенең Көч экстримы федерациясенә нигез салучы һәм президентлары, Россия һәм дөньякүләм рекордсменнар, бөтендөнья баһадирлар лигасы вәкилләре Хәсән һәм Хөсәен Арангуловларның «Храбрый Колобок» дип исемләнгән яңа китап презентациясе үтте.Тулырак
последний комментарий 7 февраля в 12:34
последний комментарий 7 февраля в 11:09
«Шигърияткә сыя барысы…»
Тубыл шәһәренең себер-татар мәдәният үзәгенең әдәби кунак бүлмәсендә Галия апа Абайдуллинаның «Шигърияткә сыя барысы...» дип аталган әдәби кичәсе узды. Үзәк режиссеры Рузалия Корманалиева залда җыелганнарны сәламләп, кичәне ачты. Бүгенге көндә Галия апа 44 китап авторы, тиздән 45 нче китабы чыгарга тора. Апаның балачагы, яшьлеге замананың авыр вакытына туры килә. «Дәрт булса да, дәрман булмады. «Инәм коймак пешерәте, мин корсакка төшерәм», «Өннәмнең пар урцыгы, минеке пар курцагым», «Матур күлмәкләр киясем килә, миңа алыгыз, диясем килә», «Мин сине яраттым, ник үзеңә караттың?» кебек шигырьләр язуым хәтеремдә калганнар», – дип яза Галия апа. Хәләл җефете Ризмөхәммәт абый белән 59 ел бергә гомер кичергәннәр, хезмәттәшләр дә иделәр, абыйның хезмәт стажы – 40, ә Галия апаның 36 ел. Балаларына югары белем биргәннәр. Бүгенге көндә 5 оныкның, 5 оныкчыкның әбисе ул. Аның иҗат җимешләре Россия халыкларының заманча әдәбияты антологиясенең 3 томына кергән.2 январьда Галия апа 85 яшен каршылады. Бу очрашуга шәһәр Думасы депутаты Сәет Хисмәтуллин, үзешчән шагыйрьләр Хәлил Вагайлы, Гөлнара Калиева, Нурхәят Шагбанова, Тубыл шәһәре һәм районы китапханәсе хезмәткәрләре - Эмилия Иванова, Зөлфия Фазыйлова, Рәмзия Ниязова килделәр. 15 нче мәктәпнең туган тел укытучысы Банисә Ниязова котлау сүзләре белән чыгыш ясады, укучылары Азалия һәм Алсу Галия апаның шигырьләрен яттан сөйләделәр. Шулай ук кичәдә Галия апаның укучылары, каләмдәшләре - Дилә Хәбибуллина, Гыйльминур Давалева матур шигырьләрен бүләк иттеләр. Татар халык көйләрен баянда Азат Абдуллин уйнады, Хәлил Вагайлы һәм Хәсән Хучашев матур җырлар башкардылар. Галия апа Бөтендөнья татар конгрессына, Тубыл себер-татар мәдәният үзәгенә һәм барлык килгән кунакларга, укучыларына рәхмәтен белдерде.
Рузалия КОРМАНАЛИЕВА.
последний комментарий 4 февраля в 06:06
Нардуган бәйрәмендә
Бу арада Төмән тамашачысын шәһәр татар мәдәният үзәге артистлары матур концерт программасы белән сөендерделәр.«Нефтяник» мәдәният сараена килүчеләрне «Чимги-Тура» (җитәкчесе Ислам Сафин) уен корал ансамбле гармунчылары гармунда бию көйләре уйнап, җырлап каршыладылар. Биергә теләкләре булганнарны түгәрәккә чакырып, төйдереп биетеп тә алдылар.
Холлда Гөлбану Әминова җитәкчелегендә татар мәдәният үзәге каршында эшләүче «Корама» хатын-кызлар клубы осталары үзләренең кул эшләреннән күргәзмә оештырганнар. Биредә ни генә юк! Күңелгә килгән әйберләрне сатып алу мөмкинлеге дә булдырылган. Аннары халык мәдәният сараеның кече сәхнәсендә «Нардуган» - милли татар бәйрәме» дип аталган театральләштерелгән тамашаны карап, артистлар белән Яңа ел бәйрәмнәре атмосферасына кушылдылар. Бәйрәм кичәсен татар мәдәният үзәге хезмәткәре Ринат Гарифуллин татар телендә бик оста алып барды. Үзе төрле персонажлар булып киенеп, төрле образларда кызык хәлләр сөйләп, халыкны көлдерде. Концерт бик күңелле барды.
Тамашачылар һәр җырчыны, һәр биючене, һәр ансамбльне көтеп алып, телефоннан видеога, фотога төшереп, зур алкышлар белән озаттылар. Тамашачы өчен өлкәнең абруйлы җырчылары - Мансур Кәбиров, Луиза Сөрмәтова, Марат Вәлиев, шулай ук «Әхтәмүшки» (җитәкчесе Әхтәм Назыров) халык җыр, «Аккош» бию (Екатерина Старостенко), «Әпипә» уен корал (Екатерина Володина), «Умай» (Әбүзәр Миңнебаев), «Вак бәлеш» (Ислам Сафин) фольклор ансамбльләренең чыгышлары үзе бер зур бүләк булды. Яшь җырчылар Римма Хәйруллина, Азалия Хәмидуллина, Чингис Бикинәев, биюче кыз Руслана Галиева да тамашачылар мәхәббәтен яулап өлгергәннәр инде. Халык холлда дәртле җыр-биюләр белән каршы алып торган «Чимги-Тура» уен корал ансамбленең чыгышын көтеп алды, хәтта кайберәүләр аларга кушылып, урыннарында биеп тә утырдылар. Бәйрәмнән тамашачылар зур канәгатьлек кичереп, илһамланып, дәртләнеп, ял итеп кайттылар.
Рәүфә КАНГАЗИНА.
последний комментарий 29 января в 07:09
Шәҗәрәсен өйрәнүче авылдашым
Эске авылында яшәүче авылдашым Салават Яруллин 1944 нче елның ноябрендә 8 балалы гаиләдә дөньяга килгән. Быел ул үзенең 80 яшьлек юбилеен каршылады.Әтиләре сугыштан яраланып кайтып, бераз хәл алуга, колхоз эшенә җигелә. Әхмәт Габделхалик улы озак еллар терлекче булып эшли, шуңа балаларында туган авыл, туган йортка тирән мәхәббәт уята, хезмәткә өйрәтеп тәрбияли. Әнкәйләре дә беркадәр колхозда эшләп, аннары бөтен вакытын балаларга һәм йорт хуҗалыгына багышлый.
Тулырак
последний комментарий 28 января в 16:41
Кадерле һәм хөрмәтле «Яңарыш»лыларыбыз, хөрмәтле милләттәшләребез!
Сезне Яңа 2025 ел белән котлыйбыз!Яңа елны зур өметләр, шатлыклар, якты хыяллар белән каршылыйк. Яңа елда саулык-сәламәтлек, гаиләгездә дуслык-татулык, тормышыгызда иминлек, эшегездә уңышлар, бәхетле озын гомер телибез.
Заһидә һәм Сөнгатулла БЕКЕНИННАР, ветеран укытучылар.
последний комментарий 24 января в 10:59
Якташыбызны соңгы юлга озаттык
Аның махсус хәрби операциядә булганына 2024 нче елның август аенда бер ел булды. Үз бурычын намус белән үтәргә өйрәнгән Гали Сәитов беренче мәртәбә авыр яраланган булса да, госпитальдән соң илебез сагына яңадан баса. Илебез иминлеге хакында барган махсус хәрби операциядә Гали Сәитовның һәлак булганын ишетү якыннары, якташлары өчен дә авыр хәбәр булды. 9 нчы январьда Гали Мөхәммәтәмин улын Тубылда соңгы юлга озаттылар. Авыр яралардан хастаханәдә сугышчыны коткарып кала алмыйлар.Гали Сәитов Тубыл шәһәрендә 1961 нче елны 8 нче мартта туа. 15 нче урта мәктәпне тәмамлагач, Тубыл пединститутының физика–математика факультетында укып югары һөнәри белем ала. Һөнәре буенча югары белемле укытучы, ә иҗат юлына килгәндә, «Яңарыш» өлкә газетасының актив фото-хәбәрчесе, җырчы да, музыка коралларында уйнаучы, себер татар мәдәният үзәгенең «Яшьлеккә сәяхәт» ансамбле әгъзасы да иде ул. Гали Сәитовны шәһәрдә белмәгән кеше юктыр. Аның фото-видео материалларында - шәһәр тарихы. Милли мәдәни чараларда видео һәм фотога төшергән останы юксынып искә ала якташлары. Үзенең хәрби бурычын үтәп гомерен биргән якташыбыз белән хушлашу Тубыл шәһәренең ритуаль залында булды. Соңгы юлга озату мәрасимендә дуслары, сыйныфташлары, якыннары, җирле хәрби военкоматтан килгән вәкилләр җылы сүзләр белән аны искә алдылар.
Аралашучан, ярдәмчел, кешелекле, эшен яратып башкарган тырыш якташыбыз исән чагында Төмән өлкә губернаторның Рәхмәт хаты, Бөтендөнья татар конгрессының «Татар милләтенә күрсәткән олы хезмәте өчен» медале, милләтләр буенча өлкә комитетының, Тубыл шәһәре себер-татар мәдәният үзәгенең һәм иҗтимагый оешмаларның Рәхмәт хатлары белән бүләкләнә. Махсус хәрби операция башлангач, кулына корал тотып илен яклаучы, хәрби һәм кешелек бурычына тугры булган Гали Мөхәммәтәмин улы «Хәрби хәрәкәтләр ветераны» медален ала.
Гали Сәитов Алимасово зиратында батырлар алллеясында җирләнде. Аның рухы шат, җаны җәннәттә булсын. Мәрхүмнең бертуганнары: өлкә «Яңарыш» газетасының баш редакторы Алсу Сәгыйтованың, медицина хезмәте ветераны Галия Измайлованың һәм барлык туганнарының, дусларының тирән кайгысын уртаклашабыз.
Төмән өлкә «Яңарыш» газетасы коллективы,
«Әдәби Төмән» иҗат берләшмәсе әгъзалары.
загрузка
Показать ещёЛевая колонка