Арулыкыш - тазалык вияҥеш

Кеч кунамат, айдеме шуко черым сеҥен ила гынат, кап кӧргыштӧ тӱрлӧ тӱсан аяр да моло "лавра" погына. Кузе вара кап кӧргыштӧ погынышо антибиотикым, моло эмын кодшыжым, черым шарыше бактерийжым эрыктен лукташ? Кызыт чӱчкыдын тыгай йодыш лектеш. Кӱчыкын манаш гын, тыгерак вашешташ лиеш. Тидлан паремме деч вара кок арня дренаж семын эрыктымаш шудовӱдым йӱман. Ныл шудым налаш лиеш. Серетанпуч, рывыжпочшудо, нуж ден куэ лышташым ик семын налын, тӧр пропорцийеш варыза. Вара, ик кугу совлам термосыш пыштыза да шолшо вӱдым ик стаканым темыза. Чак петырыза да шогаш пел шагатым пуыза. Шудовӱдым кучылтым деч ончыч шӱраш лиеш. Кузе йӱман. Кечыште кум гана ик стакан дене йӱаш кӱлеш. Йӱаш кӱлеш кочмо годым огыл, а кунам пагар яра. Але кочмо деч ончыч, але кочмо деч вара ик шагат эртымеке. Тыгак кок арнялан саде шудовӱдым йӱман. Кажне гана угыч ямдылыман! Таза да пиалан лийза! © Виталий Головин