Жастарды әскерге шақырудың күзгі маусымы да келіп жетті. Жауынгерлік қызметті тартымды ету мақсатында қорғаныс саласы оларға бірқатар жаңа мүмкіндіктер ұсынуда. Әлемдегі саяси ахуалдың күрделенуі мен көрші мемлекеттер арасындағы қақтығыс төмендегідей өзгерістер енгізуге түрткі болды. Отан қорғауға үндеу ендігі арада патриоттық сезімге бағытталған жалаң ұран емес, нақты жеңілдіктердің көзін ашты.
Әскерге шақырылғандарда бұрындары таңдау қақысы мүлдем болған емес. Қазір білім мен білік және физикалық даярлық деңгейлерін ескере келе, жергілікті қорғаныс басқармасы алдағы уақытта әскердің қай түрінде қызмет еткісі келетінін ескереді.
Екінші артықшылығы, әскер жастарды белгілі бір кәсіп иесі етіп шығарады. Картограф, радист-инженер, байланысты монтаждаушы, метеоролог, телеграфистер мен радистер, санитар, аудармашы, аспаз, механик – жүргізуші, музыкант, т.б. кәсіп иелері күнделікті өмірде де қажет. Сондықтан шинельде жүрген бір жылды азаматтық қоғамдағы өмірге шеберлікті шыңдау кезеңі деп қарастырған дұрыс.
Үшінші мүмкіндік, өз міндетін мүлтіксіз атқарған жауынгердің Кадет корпусына оқуға түсіп сержанттық қызметті таңдауына немесе әскери жоғарғы оқу орнына қабылданып, офицерлік шенді иеленуіне болады. Одан әрмен келісім-шарт жасасып, әскери қызметтің ең жоғарғы сатыларына өрлеуіне жол ашылады.
Жастарға биылдан бастап қарастырылған және бір мүмкіндік бар. Сарбаздық міндетін өтегеннен кейінгі екі жылда олар Қорғаныс министрлігі бастамасымен жоғарғы оқу орындарына ақылы негізде қабылданады. Бұл арада Ұлттық бірыңғай тестілеудің қорытындысы қажет емес. Ал азаматтық жоғарғы оқу орындарының әскери кафедраларына дәл осы санатты тұлғалар емтихансыз және тегін қабылданады.
Әскери дайындық барысында үздік көрсеткіштерге қол жеткізген, тәртібі мен дарыны жағынан озып шыққан жауынгерлер жоғарғы оқу орны есебінен бөлінетін грантты иеленеді. Бұл арада атап өтетін нәрсе, еліміздің барлық аймағындағы көптеген жоғарғы оқу орындары дарындыларды білім гранттарымен қолдауға даяр. Олар үшін үш мыннан астам грант әзірленген. Дәл осы санатқа жататын жастар республика Қорғаныс министрлігінің әскери оқу орындарына ҰБТ қорытындысыз әрі емтихансыз қабылданады.
Әскери қызметтің беделін арттыруды көздеген Қорғаныс министрлігі осы мақсатта еліміздің қырықтан астам жоғарғы оқу орындарымен келісім жасаған. Соған сәйкес, жауынгерлік міндетін абыроймен атқарған жігіттеріміз, екі жыл ішінде солардың біреуінің студенті атануына хақысы бар.
Биылғы жылдан бастап енгізілген жағымды өзгерістің бірі, әскери оқу орталықтары сарбаздарды жауынгерлік мамандықтарға дайындаған кезде, бұл кәсіптің экономиканың нақты бөлігіндегі қажеттілігі де ескеріледі. Соған сәйкес, сарбазға сол кәсіпті аяқтады деген мемлекеттік үлгідегі куәлік бірге тапсырылуда.
Түрлі себептерге байланысты қаржы орындарынан ақша алғандардың қарыздары бір жылға және қызметі аяқталғаннан кейінгі екі айға шегеріледі. Бұл жеңілдікті бүгінде үш жарым мыңнан астам жастарымыз пайдаланып үлгерген. Аз да болса жағымды жаңалықтың тағы бірі, әскерге ұлын аттандырған ата-анаға коммуналдық төлемді өтеуде елу пайыздық жеңілдік беріледі.
Жоғарыда айтылғандардың бәрі жалаң үгіт емес, болашақ жауынгер келешектегі өміріне керекті жағдайларды әскерде де қамти алады деген түсіндірме деп ұққан жөн.
Ал, азаматтың әскердегі басты мақсаты, әрине, Отанды қорғау, сол қасиетті борышқа сай берілген қаруды жете меңгерген сақадай ержүрек жауынгер болу.
Бабалардан мұраға қалған Отанымызды ұрпағымызға табыстау – бәріміздің парызымыз. Қазақ қазақтығын тек Қазақстанда сақтап қалмақшы. Атамекен бізге сонысымен қымбат. Арайлап атқан аппақ таңды, ұшқан құс қанатын талдырған байтақ даланы, кілемше құлпырған жазираны, кемеңгер ақсақалдарды, мейірімі шексіз әжелерді, қалжыңмен әдемі қағысқан құрдастарды, алтыбақанда әнмен тербелген сұлуларды, тұяғымен даланы дүбірлеткен қалың жылқыны, саңқылдаған аспан еркесі – қыранды басқа қай жерден табарсың?!
Атамекен болашағы сендердің қолдарыңда, өрендер!
Серік ОСАНОВ, запастағы полковник
Присоединяйтесь к ОК, чтобы подписаться на группу и комментировать публикации.
Нет комментариев