Предыдущая публикация
КАВТО ВАЛМОРОТ ВК -сэ "СЯТКОНЬ" КУРОСТОНТЬ.
Журнал «СЯТКО" Дмитрий Таганов
* * *
Сэнь ведьпря ланга шожда венч
Уи ков-бути васов-васов.
Удало кадовсть вадовт-кренчть,
Икеле учить пандонь касовкст.
Икеле маней сэтьмечись
Сияжды ансяк чачонь ванькссэ,
Сон венченть вастомонзо лиссь,
Тень кисэ ламо кить-янт яксесь.
Учовсь вастомань мазый шкась,
Чипаень цецякс кедькуншкасо
Валдонзо валомо кармась
Кемемась, кона кастозь шкасо.
Фотось Наталья Ерминань
Журнал «СЯТКО»
Мария Ерёмина
* * *
Лопатне – апак кучо сёрмат.
Сынст ловносынзе тонеть вармась.
Кунсолосак, янксеме кармат,
Ды эсь прянь кемевтема ормат
Лангс ливтьсы керисельведь байгесь.
Сыргози ойметь. Тарги вайгель –
Седейстэ панксонь раздезь гайги.
Марясак? Саты, лиянть айгик,
Чопавтт мекев те сёксень чинтень,
Кадык лопатне таго цитнить.
Макст ютазентень виде питне,
Зярс вийсэть, кадозь китнень витнить.
Улест кучозь весе сёрматне,
Топавтозь се, мезе тон алтнить,
Улезэ… Ансяк арсематне
Сёрмас валтнэнь лиякс аравтнить.
Лопатне – апак кучо сёрмат…
Пултасыть, лиянень а ловномс.
Фотось Алина Подгорновань
Следующая публикация
Нет комментариев