Декабрь
айынынъ 26-сында белли эсли-башлы языджымыз, шаир, «Сувдагъ сеси» газетине бир
омюр багъышлагъан журналист Рустем Али
81 яшыны къайд эте. Бу халкъымыз ичюн буюк байрамдыр!
Рустем
Али 1936 сенеси декабрь 26-да Судакъ шеэринде дюньягъа кельди. Эдебиятны та
балалыкътан севген инсан. Бунъа о вакъытларда район газетасында чалышкъан
анасынынъ тесири олмай къалмады.
Рустем
Али сюргюнликте орта мектепни битирген сонъ, къуруджылыкъта чалышмагъа меджбур
олды. 1958 сенеси Самарканд алыш-вериш техникумыны, 1973 сенеси Ташкент Девлет
университетининъ журналистика факультетини битирди. 1958-1974 сенелери Андижан
виляет (Озьбекистан) алыш-вериш системасында чалышты.
Эдебияткъа,
журналистикагъа авеслиги оны «Ленин байрагъы» газетасына ишке алып кельди. 1974
сенесинден 1989 сенесине къадар мухбир, болюк мудири олып чалышты. Къырымгъа
кочкен сонъ, башта савхозда чешит ишлерде, ондан сонъ, бугуньки кунюмизге
къадар «Сувдагъ сеси» адлы къырымтатарджа мезкюр неширге муаррирлик япты.
Рустем
Алининъ ильки икяелери «Ленин байрагъы» газетасында басылдылар. Ондан сонъ
онынъ эсерлери ортакъ джыйынтыкъларда, «Йылдыз» меджмуасында дердж олундылар. О
«Таныш нагъмелер» (1976) адлы икяелер, «Сельбилер эбедий яшайлар» (биринджи
китап -1980, экинджи китап – 1982, учюнджи китап – 1985) адлы повестьлери ве
«Бурушта» (1989) романынынъ муэллифидир.
Языджынынъ
эсерлериндеки бир сыра шиирлерге, бунынъ киби де, «Миллетим Къырым» шиирине
бестекярларымыз музыка яздылар. Бу йырны Рустем Меметов иджра эте. Рустем Али
«Шанлы эмеги ичюн» медалинен такъдирленгендир. Бугуньки куньде Сувдагъ шеэринде
яшай.
Иште, бойле уста языджы, Аллаhтан истидат
саиби Рустем Алиге бу саада алып баргъан фаалиети ве ишлери ичюн, чокътан-чокъ
«Сагъ олунъыз!» деймиз! Аллаh сизни башымыздан эксик этмесин. Сизге шаир ве
языджы оларакъ, иджадынъызда
мувафакъиетлер, янъы меракълы эсерлер, ве къалеминъизнинъ отькюр олмасыны
тилеймиз!
Хайырлы яшлар олсун!
Урие КАДИРОВА
Присоединяйтесь к ОК, чтобы подписаться на группу и комментировать публикации.
Нет комментариев