СТАНЦЫЯ СТОЎБЦЫ Ў ДАВАЕННЫХ ПЕРЫЯДЫЧНЫХ ВЫДАННЯХ
Частка 2
Выдатныя ўмовы стваралі тагачасныя ўлады для пасажыраў, якія перамяшчаліся з дапамогай польскай чыгункі – “РКР” (польскай каляі панствовай). Як сёння б сказалі, “імідж дзяржавы” не ў апошнюю чаргу складаўся з вытанчанага камфорту, прыязнага абыходжання з тымі, хто карыстаўся чыгункай. Сярод іх былі асобы, статус якіх вымагаў такога ўзроўню камфорту, што і сёння іх ўладкаванне ў вагонах выклікае здзіўленне . Нездарма гэтыя вагоны называлі “вагон-салон”.
Вялікі ажыатаж выклікаў прыезд кіраўніка Афганістана ў пачатку 1928 года. “Улады чыгуначныя тэрмінова прыступілі да навядзення парадку і ўпрыгожвання станцыі чыгуначнай ў Стоўбцах у сувязі з запланаваным праездам эміра Амануілаха праз станцыю Стоўбцы да Расіі. Запланавана рэпрэзентацыя вайсковая і аркестр са Слоніма. Доступ да станцыі ў час прыезда караля Амануіла будзе абмежаваны.” ( Przejazd Emira Afganistanu prez Stolpce. // Zycie Nowogródzkie. № 83 (117) z dn. 01.05. 1928 r.) Да савецкай краіны эмір ехаў пасля падпісання “Трактату прыязні” з польскімі ўладамі і 45 хвіліннай “жывой гутаркі” з маршалам Пілсуцкім . У Стоўбцах “высокі госць” - кароль Афганістана прысутнічаў на спецыяльна арганізаваным мітынгу, дзе яго сустракалі стараста Стаўбцоўскага павета Курачыцкі (той самы, што першым пачаў абараняць горад пры нападзе на Стоўбцы ў 1924 годзе ) і бурмістр Станіслаў Цваліна. Кароль выступіў з падзякай за шчыры прыём, які, як ён сказаў, запомніць назаўсёды. Эмір, прайшоўшы праз будынак станцыі на “савецкі бок”, быў сустрэты эскортам савецкіх салдатаў ганаровай стражы, прадстаўніком савецкай улады Абеленскім і паслом Афганістана ў СССР. Савецкая дзяржава на мяжы ў Коласаве сустракала эміра прывітаннем, якое было напісана на ўязной браме: ”ПРИВЕТ ШАХУ АФГАНИСТАНА”.
Адразу ў некалькіх даваенных выданннях асвятляецца візіт яшчэ адной прадстаўнічай асобы. У газетах “Orzędownik” (№ 77a, 1935 г.) і “Ilustrowana Republika” (№ 091, 1935г. ) ідзе гаворка аб тым, што 11 красавіка да Варшавы праз Стоўбцы праязджаў “наймалодшы міністар Англіі” Энтані Ідэн: ”Міністр Ідэн Прыехаў у Стоўбцы у 12.45. Тут яго чакаў прадстаўнік Міністэрства замежных спраў пан Любамірскі, які запрасіў Ідэна да польскага вагона-салона. Ідэн, ідучы ў польскі цягнік, прывітаў прадстаўнікоў польскіх уладаў, насельніцтва якія знаходзідзіліся на станцыі. Ён прайшоў у вагон-рэстаран, дзе меў сняданак”. Затым, цягнік Стоўбцы- Варшава – Берлін – Парыж рушыў у дарогу.
Калі пацікавіцца асобай шаноўнага госця, то можна даведацца, што, па-першае, ён граф, па-другое - брытанскі кансерватыўны палітык, які служыў тры перыяды ў якасці міністра замежных спраў, а затым адносна кароткі тэрмін ( з 1955 па 1957 год) у якасці прэм'ер-міністра Злучанага Каралеўства. Наймалодшым міністра назвалі таму, што пасаду гэту ён заняў ва ўзросце 38 гадоў.
Праезд праз Стоўбцы асоб такога ўзроўня – частая з’ява тых часоў.
Поўны пафасу артыкул аб знакамітых “гераічных летчыках-спартсменах”, якія вярталіся з міжнародных спаборніцтваў, змяшчае “Orzędownik” (1935,nr 222a): “Стоўбцы. Дзесьці ў 12.42 заехаў на станцыю ў Стоўбцах хуткі цягнік з Масквы. Ён вёз экіпажы польскіх паветраных шароў (“балонаў”) “Палонія”, “Варшава” і “Касцюшка”. На вакзале лётчыкаў чакалі прадстаўнікі ўладаў, шматлікія дэлегацыі мясцовага грамадства, духавенства і школьная моладзь. Яны з энтузіазмам віталі прыбыўшых воклікамі:”Няхай жыве Польшча! Слава лётчыкам!”
Пад гукі народнага гімна лётчыкі выйшлі на перон, дзе іх акружыла школьная моладзь з кветкамі. Моладзь на руках перанесла капітана Бужынскага праз вакзал на другі бок чыгункі да вагону польскага цягніка. У час больш доўгай ад звычайнага затрымкі цягніка лётчыкі паднімалі прапанаваныя бакалы віна і ставілі аўтографы ў альбомы мясцовай моладзі. У 13.25 цягнік рушыў да Варшавы пад эмацыйныя воклічы і пажаданні прысутных. “
Присоединяйтесь к ОК, чтобы подписаться на группу и комментировать публикации.
Нет комментариев