Аны назмулары «Заман», «Чегем ауазы», «Советская молодёжь» газетледе эм «Минги-Тау», «Нюр», «Солнышко» журналлада да басмаланнгандыла. «Атламла» - деген ат бла кёп болмай китабы да чыкъгъанды.
Элни Маданият юйде концертле къураргъа да болушады. Назмуларын да окъуйду, жырларгъа да аман болмаучуду.
Исмайыл Тёбен Чегемни орта школунда окъуу самоуправлениясыны башчысыды. Школ газет ачып, ары корреспондентле да къурап, редакторлукъ да этип турады. Аны сабийле, элни администрациясы да окъуйбуз. Чегем районда конкурсда ол экинчи жерни алгъанды. «Религия и толерантность» деген республикалы эришиуде уа биринчи жерни алгъанды Исмайыл.
Кёп болмай Чегем муниципал районну жер-жерли самоуправлениясында Жаш тёлю советине да алыннганды.
Аны андан сора да, кёп тюрлю жетишимлери барды. Волонтёр ишлеге тири къатышханы ючюн районну администрациясыны башчысыны грамотасы бла саугъаланнганды.
КЪАЯ СУУУ
Кийикчи суу келеди
Узакъладан шорхулдап,
Къаяладан энеди,
Хапар айта, шууулдап.
Сенсиз жашау жарлыды,
Сенсиз жолум къарлыды,
Къолларымы толтуруп,
Ичдим, жууукъ олтуруп.
Гара сууум – татлы сууум,
Тауну, ташны келдинг жуууп,
Жетер ючюн элиме –
Сени сюйген жериме.
Жаным, къаным да сенден,
Ичеме мен черекден,
Узакъдан келген гара,
Сен да татыуун сына!
Къайсын ичген суучукъду,
Ол да жууунгучуду!
Дарманды ол жаныма,
Къошулгъанды къаныма.
Тауну тешип чыгъады,
Ёшюн уруп, жыгъады
Суу ызында ташланы,
Къарай таула башлары.
ТАУЛУЛА
Тау эллери кёкге жете,
Жашайдыла таулула.
Намыслары таудан ётген,
Аланладыла ала.
Ала – ташдан суу сыкъгъанла,
Кёп зат билген адамла.
Намыс берген, сый салгъанла
Къартха, жашха да ала.
Ала акъылманладыла,
Иги, аман билгенле,
Адет бла аладыла,
Бери къонакъ келгенде.
Таурух билген, жомакъ тизген,
Иш кёллюле эм таукелле!
Алача тапмазса излеп,
Жигердиле иш этиуде.
Тау эллерин чексиз сюе,
Уллу намыс бередиле.
Адежлиле, адеплиле,
Керти да игиледиле.
1-ЧИ СЕНТЯБРЬ
1-чи сентябрь -
Билимни кюню.
Билимли этеди
Жашауну кючлю.
Бу жарыкъ байрамда,
Школума кирдим.
Устазымы кёрюп-
Алгъышла этдим.
Ариу чакъгъан гюллю
Къысымым - анга.
Ма бу байрам кюнде
Жанымдан саугъа.
Устазгъа тынгыла,
Ол жолгъа салыр.
Айтхан сёзю санга
Жорукълай къалыр.
ТАУЛУ ХАЛКЪЫМ
Ата-ана сыйын кёрген
Таулу халкъым,
Беш да Элинг бийик ёрде
Отла жакъды.
Тау бийикде учхан къушла –
Таулу жашла.
Гылан къушла къалкъа, уча
Къая башда.
Ёмюрледе эримеген
Чыранларынг,
Аязлада бюгюлмеген
Чынарларынг.
Таза кёллю, ачыкъ сёзлю
Шам Малкъарым!
Таулу халкъым кёпге тёздю,
Кючю къарып.
Башын эншге иер ючюн,
Терслик жетди.
Сынаса да бушуу кюлтюн,
Таукел этди.
АНАЛА
Ата журтну къоруулай,
ажымлы жоюлгъан
жашланы аналарына атайма
Анала! Огъурлу анала!
Эсигиз, кёлюгюз да сизни –
Ажымлы жоюлгъан балада.
Къайсыгъыз да жыр, кюй да тизди.
Муратла къалмазла муратлай,
Толурла анала жюрекде.
Сиз анда жашарыкъсыз жашлай,
Къалгъанны багъалай юйрете.
Анадан а, айт, кимди сорлукъ?
Сормай-ормай келеди палах.
Ма алайды жерде бу жорукъ –
Сюйгенни къыйнаучуду Аллах.
Бушуугъа ичигиз кюйгенле,
Кёз жашла да аямай тама,
Сиз болгъансыз ачыу кюлтюнле.
Сакъланады жашау анада.
Заманны тыяргъа жокъ амал,
Кёз ачхынчы учады, таша.
Тынчайтады десек да заман,
Сиз андан ёнгелепсиз, башха.
КЪАРАЧАЙ – МАЛКЪАРЫМ!
Бир халкъ! Бир миллет! Бир адет! –
Жаша, Къарачай-Малкъарым!
Аллах берди санга уммет,
Жюз-минг жылла алай барыр.
Бир анадан жаратылгъан,
Къарачайым эм Малкъарым.
Атынг узакъгъа айтылгъан
Журтум – чыраным, тауларым.
Къууанч, бушуу кюнде бирге
Болгъан Къарачай-Малкъарым!
Излегенин бу миллетге
Берсин Аллахым, къадарым!
Бек къаялы ариу журтла,
Сыйлы жерлеримсиз мени!
Гара сууугъуздан уртлап,
Сылайма мен жашил жерни.
МИЛЛЕТИМ
Таулу халкъым, нарт миллетим,
Аллах тюзетген умметинг,
Къыйынлыкъны бетин кёрген,
Киши жерде саудан ёлген.
Таулу халкъым, алан халкъым,
Саналмазлыкъ багъа хакъынг,
Жашау этерге тирнекли,
Сыйлы, намыслы, адепли.
Садакъагъа юйренмеген,
Аман ишге тюзелмеген,
Къазах, къыргъыз жерлеринден
Къайтып келген эллерине.
КЮЗ АРТЫ
Заманында кюз да келди,
Чапыракъла тюшедиле.
Алтын бояу алып элни,
Кёгет, жемиш бишедиле.
Хычыуун желчик урады,
Сууукъ, къызыу да тюйюл,
Ариулукъ деген таудады,
Ары къарайды юйюм.
Тёгерек ариу къоланды.
Аламатды къач хауа.
Жюрегим жарыкъ болады,
Мындан ариу зат къайда?
КЪАЙСЫННЫ ЭСГЕРЕ
Санга атап, назму жаза,
Сагъыш эте, олтурсам да,
Санайма сёзюмю азгъа,
Жюзлеп дефтер толтурсам да.
Балча, татлы – назмуларынг,
Сюйюп окъуйма аланы.
Акъыл сёзню жазылгъаны
Жарыкъ эте китапланы.
Хар назмусу да Къайсынны,
Миллетге саугъа болады.
Аны айтхан сёзю – жылы,
Жюрекледе ыз къояды.
Таулу юйде от жагъады
Бизге къалгъан акъыл сёзю.
Чегем чучхуру агъады,
Къая бетин эте тузлу.
«Къайсын!» – деп кёп айтадыла
Дунияны кенглеринде,
Тауда суула къатлайдыла
Атын, кеси кетгенинде.
Дуниягъа махтау бла
Халкъымы атын айтдырды.
Къайсын бла, таула бла
Таулу да тангын атдырды.
Таулу шайыр, устаз Къайсын,
Сёзлеринги байракъ этдик.
Биз атынгы атхан сайын,
Башыбыз жулдузгъа жетди.
Байтуугъанланы Исмаил
Присоединяйтесь к ОК, чтобы подписаться на группу и комментировать публикации.
Комментарии 9