Предыдущая публикация
40 иеть вечкевикс тевсэ✅✅✅
Покш Игнатовань районсонть «8-ое Марта» ООО-сь велень хозяйствань прявт предприятиятнестэ вейкесь. Сон ашти Ташто Чамза велесэнть ды важодема таркасо топавты маласо аштиця ды шабра районтнэнь зярыя велетнень эрицятнень. Неень шкасто предприятиясь важоди сюротнень, ламбамо якстерькаень ды тикшень кастомань, сюракшов ракшатнень трямонь ды ловсонь нолдамонь ёнкстнэсэ. Сехте покш питнейчикс жо хозяйствасонть аштить важодицятне – эсь тевень содыця алкуксонь специалисттнэ. Вейкесь эйстэст – техникесь-строителесь Николай Иванович Куманев. Предприятиясонть важодемантень ды строителень тевентень сон макссь 40 иеть. Те шканть перть теезь пек ламо аволь ансяк хозяйстванть, истя жо целанек Ташто Чамза веленть туртов.
Николай Куманевонь чачома-касома тарказо Покш Игнатовань Андрейвелесь. Школадо мейле цёрась прядсь строительной техникум, ютась служба армиясо ды велявтсь тиринь велев, косо эри ды важоди неень шкас.
– Важодемань кинть ушодыя 1984 иень июнень 1-це чистэ сестэнь «8-ое Марта» колхозсонть техникекс-строителекс, – ёвтни Николай Иванович. – Васенце объекттнэнь ютксо, конатнень лангсо ушодокшнынь роботамо, ульнесть велень школась, столовоесь ды теке шкастонть витнезельть-вадрялгавтозельть ракшань трямонь-кастомань ферматне.
Теке марто, кода ёвтнесь «8-ое Марта» ООО-нь прявтонь полавтыцясь Сергей Темаев, Николай Ивановичень лезксэнзэ вельде Ташто Чамза велесэнть ветязель сэнь уштомапелесь, теезель асфальтонь ки, сонзэ вановт ало строязь колхозонь весе мастерскойтне, утомтне, ламот ферматне.
Николай Ивановичень путовксозо велень клубонть, школанть ды сонзэ юрсо спортивной залонть стявтомасояк, велень од ульцянть теемасояк.
– Зярдо теинек Молодёжной ульцянть, генпланонь коряс келезэ ульнесь ансяк 40 метрат. А сестэ архитекторокс районсонть ульнесь Иван Григорьевич Бочкарев. Сон ломанесь истямоль, мартонзо чапамо марто цярка экшсэ кортылить, седеезэ лавшомиль, аламодо эсь правилатнень эйстэ туиль. Самай истямо лувсо кортамотнень экшсэ од ульцясь минек лиссь сехте келей велесэнть, – корты Николай Куманев. – Мазылгавты веленть Культурань кудоськак. Сон эштё од, панжозель 2007 иестэ. Теемасонзо-пурнамосонзо пек лездась республикась. Ды вана весе неть иетнень перть сон а чамокшны, тесэ ютавтовить эрьва кодат мероприятият, кенярксчить. Велесэнть домкасто ванстовить койтне-кирдатне, секскак улить истят кенярксчить, конат ютавтовить свал, мезеяк лангс апак вано. Эрьва кенярксчинтень Культурань кудонь важодицятне анокстыть вадря ды мельстуиця концерт, арсить конкурст. Ды, эряви меремс, истят мероприятиятнесэ эсь ёрокчист невтить однэк-сыренек.
Весе парсте содыть, строителень тевесь эрявикс свалшкане. Сонстемензэ ковгак велень хозяйствасояк. Мезесь-бути одкстомтови, мезе-бути тееви од. Николай Куманевгак свал тевсэ. Ней «8-ое Марта» ООО-со строить од кардо вазтнэнь туртов, арсеви ловсонь комплексэнть теемазо ды свалшкане моли ракшань трямонь-кирдемань ферматнень витнемась-петнемась.
– Покш сюкпря «8-ое Марта» ООО-нь прявттнэнень. Сынь кирдить хозяйстванть, а максыть тензэ ёмамс. Сон минек веленть туртов, кода течи кортыть, градообразующей предприятия. Тесэ важодить аволь ансяк Ташто Чамзань, шабра велетнестэ эрицятнеяк, сакшныть лия районстояк, – корты Николай Куманев. – Апак кавтолдо тенк ёвтаса, веленек пек паро. Ломантнеяк тесэ эрить панжадо седейть, сэтьметь, инжень вечкицят, куш кодамо роботадо ды стака тевде апелицят. Мон арсян, минь, Ташто Чамзань эрицятне, пек уцяскавтано, эдь вадря эрямонть туртов ули весемесь: важоди велень хозяйствань предприятия, ули школа, Культурань кудо, ФАП, почта, лавкат. Нама, сехте эрявиксэсь – улить важодема таркат. А неень шкасто те васень тев.
Николай Иванович пек вечксы эсь роботанзо ды топавты весементь оймень путозь. Кочкавт профессиянть коряс зярдояк эзь янксекшне, корты, муизе эсь прянзо строителень тевсэнть ды пек уцяскав.
Уцяскав цёрась эрямосояк. Татьяна Николаевна нинзэ марто содавиксэкс теевсть Ковылкинасо строительной техникумсо тонавтнемстэ. Мокшонь тейтересь эрзянь цёранть мельс тусь тонавтнемань васенце читнестэ саезь. Ды вана уш 40 иетнень перть сынь вейке-вейкень туртов сехте вечкевикс ды малавикс ломанть.
Куманевтне трясть-кастсть кавто тейтерть. Покшось, Валентина, семиянзо марто эри Рузаевкасо. Мирдензэ марто кавонест роботыть правоохранительной ёнкссонть. Вишкинесь, Ирина, эри Нижней Новгородсо. Сонсь роботы МВД-нь академиясо бухгалтерэкс, мирдезэ истя жо внутренней тевень органтнэнь системасонть. Сынь, кода тетяст-аваст, кочкасть эстест вечкевикс тев, кадык аволь строителень ёнкссонтькак.
Эряви ёвтамс, Татьяна Николаевна ламо иеть ульнесь Ташто Чамза велень администрациянь прявтокс ды мирдензэ ладсо строясь-тейсь тесэнь эрицятнень туртов вадря эрямонть. Николай Иванович марто самай сынст арсемаст ды путовксост вельде Чамзасо теезель весемесь, мезе ули ды кенярдовты течи. Сынст алкукс ули мезень кисэ шнамс. Эсь тиринь веленть ды тесэнь хозяйстванть касомасо-виевгавтомасо путовксост пек редявикс.
Юлия Еремина
Следующая публикация
Комментарии 1