Тропари, кондаки, молитвы и величания
Успению праведной Анны, матери Пресвятой Богородицы
Тропарь, глас 4
Жизнь ро́ждшую во чре́ве носи́ла еси́, Чи́стую Богома́терь,/ Богому́драя А́нно./ Те́мже к прия́тию Небе́сному, иде́же веселя́щихся жили́ще,/ в сла́ве ра́дующися, ны́не преста́вилася еси́,/ чту́щим тя любо́вию/ прегреше́ний прося́щи очище́ние,// присноблаже́нная.
Жизнь зачавшую – чистую Богоматерь носила ты во чреве, Богомудрая Анна; потому в удел небесный, где во славе веселящихся жилище, ты ныне с радостью переселилась, почитающим тебя с любовью прося согрешений прощения, вечно блаженная.
Кондак, глас 2
Прароди́телей Христо́вых па́мять пра́зднуем,/ тех ве́рно прося́ще по́мощи/ изба́витися всем от вся́кия ско́рби, зову́щим:// Бог наш с на́ми, сих прославле́й, я́коже благоволи́.
Святой Олимпиаде Константинопольской, диакониссе
Тропарь, глас 4
Добродетельнаго жития ради богатство расточивши,/ вседушно Христу последовала еси/ и, мудрости Златоустове внимающи,/ сосуд злат Духа Святаго явилася еси,/ Олимпиадо всехвальная,/ моли Милостиваго Бога// спастися душам нашим.
Кондак, глас 2
Благочестием и постом просиявши,/ благими делы и святыми нравы Бога прославила еси,/ терпением и целомудрием себе украсивши,/ духовное ведение и мудрость совершенну стяжала еси,/ Олимпиадо всехвальная,// Вышния славы наследнице.
Преподобному Макарию Желтоводскому, Унженскому
Тропарь, глас 5
Днесь град твой Га́лич тобо́ю хва́лится,/ в конце́х бо его́ пресве́тло,/ я́ко ве́лие со́лнце, возсия́л еси́/ и чудесы́ твои́ми, преподо́бне Мака́рие, вся озари́л еси́./ И ны́не моли́ся Го́сподеви/ изба́витися душа́м на́шим от пре́лести вра́жия// и спасти́ся гра́ду твоему́ от пога́нскаго наи́тия.
Ин тропарь, глас 4
Богому́дрый Желтово́дския оби́тели первозда́телю,/ Бо́гом поста́вленный мона́шескаго жития́ сто́лпе,/ благопи́санный досточу́днаго по́стничества о́бразе,/ Богозда́нный Ду́ха Свята́го сосу́де,/ златоза́рное Ру́сския земли́ свети́ло всесве́тлое,/ мо́лим тя, о́тче Мака́рие,// светоза́рною моли́тв твои́х луче́ю разреша́й мра́чных страсте́й на́ших о́блак.
Кондак, глас 2
Вторы́й Моисе́й яви́лся еси́, преподо́бне:/ он бо жезло́м мо́ре раздели́,/ ты же стра́сти, я́ко Амали́ка, победи́л еси́/ и непрохо́дную пусты́ню немяте́жным умо́м проше́л еси́,/ в не́йже моли́твами твои́ми ве́лие чу́до сотвори́л еси́:/ гла́дныя лю́ди до изоби́лия прекорми́л еси́./ И ны́не моли́ся Го́сподеви/ пода́ти всем печа́льным утеше́ние,/ Мака́рие, о́тче приснопа́мятне,/ и́же Га́личестей стране́ и всей Росси́йстей земли́// похвала́ и утвержде́ние.
Молитва
О, преподо́бне и Богоно́сне о́тче наш Мака́рие! Ве́руем, я́ко ты, предстоя́ Престо́лу Пресвяты́я Тро́ицы, ве́лие и́маши дерзнове́ние в моли́твах ко Всеми́лостивому Го́споду Бо́гу, И́же всегда́ послу́шает тебе́, ве́рнаго раба́ и уго́дника Своего́. Сего́ ра́ди с умиле́нием смире́нно припа́даем к тебе́, свя́тче Бо́жий, не премолчи́ о нас моли́тися ко Го́споду Бо́гу, в Тро́ице покланя́емому и сла́вимому, да ми́лостиво призре́в на ны, не попу́стит нам поги́бнути во гресе́х на́ших, но да возста́вит нас па́дших, да пода́ст исправле́ние зло́му и окая́нному на́шему житию́, от гряду́щих грехопаде́ний восхища́я, и да прости́т нам вся, ели́ка са́ми собо́ю или́ чрез други́х кого́ согреши́хом мы́слию, сло́вом и де́лом, от рожде́ния до сего́ часа́. Ты подви́жниче доброде́телей, о́тче наш Мака́рие, ве́си не́мощь естества́ на́шего и тя́жесть и скорбь време́н настоя́щих, моли́ у́бо вы́ну Го́спода Бо́га, да николи́же нас оставля́ет Его́ неизрече́нное милосе́рдие, но да храни́т нас от мирски́х искуше́ний, от диа́вольских сете́й и от плотски́х по́хотей, да прии́мем от Го́спода Бо́га тобо́ю и вся потре́бная к жи́зни вре́менней, освобожде́ние от бед и напа́стей, а среди́ их неосла́бное терпе́ние до конца́. Испроси́ нам у Го́спода Бо́га в ми́ре и покая́нии сконча́ти живо́т наш и невозбра́нно преити́ от земли́ на Не́бо, мыта́рств же и бесо́в возду́шных и ве́чныя му́ки изба́витися и сподо́битися Ца́рства Небе́снаго, с тобо́ю и со все́ми святы́ми, угоди́вшими Го́споду Бо́гу и Спаси́телю на́шему Иису́су Христу́, Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м и с Пресвяты́м, и Благи́м, и Животворя́щим Его́ Ду́хом, ны́не и при́сно и во ве́ки веко́в. Ами́нь.
2-я Молитва
Преподо́бне и Богоблаже́нне о́тче наш Мака́рие! Свети́льниче всеми́рный, мона́хов и подви́жников удобре́ние, Га́личския страны́ и всея́ Росси́йския земли́ засту́пниче! Неусыпа́емый и те́плый за ны, гре́шныя, моли́твенниче ко Всеми́лостивому Спа́су на́шему и Бо́гу Иису́су Христу́ и ко Пресвяте́й и Пречи́стей Ма́тери Его́ Влады́чице на́шей Богоро́дице и Присноде́ве Мари́и! Мо́лим твою́ всечестну́ю святы́ню, недосто́йнии ученицы́ твои́, не забу́ди ны, смире́нныя ча́да твоя́, но я́ко чадолюби́вый оте́ц, посеща́й ду́хом при́сно душ на́ших не́мощь. И испроси́ моли́твами твои́ми у Христа́ Бо́га на́шего, я́ко да освяти́т ду́ши на́ша и телеса́, и просвети́т наш ум и ра́зум, и очи́стит со́весть на́шу от вся́кия скве́рны, и от нечи́стых по́мыслов, и лука́вых умышле́ний, и вре́дных разуме́ний, и губи́тельнаго уны́ния, и изба́вит нас от вся́ких де́монских непреста́нных наве́тов же и озлобле́ний дневны́х и нощны́х. Да́руй же нам и́скреннее покая́ние, сокруше́ние се́рдцу, сле́зы и умиле́ние, воздержа́ние и тре́звость, смиренному́дрие, кро́тость же и безмо́лвие, и чистоту́ душе́вную и теле́сную, нищелю́бие же и страннолю́бие, и нелицеме́рную ко друг дру́гу любо́вь и милосе́рдие, и вся́кое и́ноческое благогове́ние. О, всеблаже́нне о́тче наш Мака́рие, сподо́би ны после́довати, по си́ле на́шей, свято́му твоему́ и равноа́нгельному житию́! Я́ко да всеми́лостивым предста́тельством Преблагослове́нныя и Препросла́вленныя Присноде́вы Мари́и Богоро́дицы, Небе́сныя Цари́цы, христиа́нския засту́пницы и покрови́тельницы, и твои́ми святы́ми моли́твами Преблаги́й Христо́с Бог наш пока́жет на нас, гре́шных рабе́х Свои́х, благода́ть и ми́лость Свою́, и настоя́щих зол и бу́дущих мук ве́чных свободи́т нас, и сподо́бит ны насле́дники бы́ти Ца́рствия Своего́ Небе́снаго, сла́вящих и велича́ющих Его́ ку́пно со Безнача́льным Его́ Отце́м и Пресвяты́м, и Благи́м, и Животворя́щим Его́ Ду́хом, ны́не и при́сно и во ве́ки веко́в. Ами́нь.
В среду, св. Кресту
Тропарь, глас 1
Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.
Спаси, Господи, людей Твоих и благослови все, что принадлежит Тебе. Даруй победы над врагами, и сохрани силою Креста Твоего тех, среди которых пребываешь Ты.
Кондак, глас 4
Вознесы́йся на Крест во́лею,/ тезоимени́тому Твоему́ но́вому жи́тельству,/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.
Вознесенный на Крест добровольно, соименному Тебе новому народу милости Твои даруй, Христе Боже; возвесели силою Твоею верных людей Твоих, подавая им победы над врагами, – да имеют они помощь от Тебя, оружие мира, непобедимый знак победы.
Нет комментариев