Бу күни театрниң тамашибин залидин пәқәт сәнъәт мухлислирила әмәс, шундақла алаһидә тәклип қилинған шәхсләр – дөләт вә җәмийәт әрбаплири, исимлири елимизгә вә униң ташқирисиға тонулған шәхсләр вә башқиму һөрмәтлик меһманлар орун алди.
Дәсләпки натиқ – Қазақстан хәлқи Ассамблеяси Рәисиниң орунбасари – Қазақстан Президенти Мәмурийити ҚХА Кативатиниң рәһбири Марат Әзилханов бу шанлиқ сәнә мунасивити билән барлиқ меһманларни сәмимий тәбрикләп, ҚХА Рәиси – Қазақстан Җумһурийитиниң Президенти Қасим-Жомарт Тоқаевниң йоллиған Тәбрик хетини оқуп бәрди. Марат Алмасоғлиниң: «Уйғур театриниң тойи – бу көпмилләтлик Қазақстанниң умумтойи. Сәвәви, театрниң 90 жиллиқ тарихиға нәзәр ташлайдиған болсақ, театр вуҗутқа кәлгәндин башлап, униң сәһнисидә уйғур, қазақ, татар, өзбәк вә башқиму милләтләрниң тарихиға, мәдәнийитигә, әдәбиятиға аит надир әсәрләр қоюлуп, кәңдаирилик тамашибинниң иллиқ алқишиға бөлинип келиватиду. Шуңлашқа Қазақстан мәдәнийитиниң йүксилишигә чоң төһпә қошуватқан театр коллективини ушбу мубарәк тойи билән тәбрикләп, кәлгүсидә миллий дәргаһимизниң паалийитигә утуқ-муваппиқийәтләр тиләймән!» дегән уйғур тилидики тилиги тамашибинларниң қәлбидә чоңқур тәсират қалдурди.
Шуниңдин кейин Марат Әзилханов театрниң бир түркүм талантлиқ хадимлирини ҚХАниң «Алғыс» бәлгүси вә Пәхрий ярлиғи билән мукапатлиди.
Сөз новитини алған Мәдәнийәт вә әхбарат вице-министри Ербол Алиқулов Һөкүмәт рәһбири – Премьер-министр Олжас Бектеновниң, ҚҖ Парламенти Сенатиниң рәиси Мәулен Әшимбаев билән ҚҖ Парламенти Мәҗлисиниң рәиси Ерлан Қошановниң вә сенатор Закирҗан Кузиевниң, Мәдәнийәт вә әхбарат министри Аида Балаеваниң, Алмута вилайәтлик мәдәнийәт вә архивлар башқармисиниң рәһбири Данияр Алиевниң, Алмута вилайитиниң һакими Марат Султанғазиевниң, Алмута шәһәрлик Мәдәнийәт башқармиси рәһбириниң орунбасари Арман Қалибековниң Алмута шәһириниң һакими Ерболат Досаевниң тәбрик хәтлирини оқуп, миллий мәдәнийитимизниң қутлуқ дәргаһи намиға иллиқ ләвзлирини билдүрди.
Бу күни театр тәвәллудиниң һөрмәтлик меһманлириниң бири – Қазақстан хәлиқ артисти Асанәли Әшимов театр тарихи сәһиписигә алтун һәрипләр билән йезилған жилларни әскә алди. Җүмлидин атақлиқ уйғур язғучиси Зия Сәмәдиниң «Майимхан» тарихий романи асасида чүширилгән «Әҗдиһа жили» вә «Атаманниң завали» кинолентилиридики бир түркүм рольларни Уйғур кәспий театриниң артистлири ойнап, тамашибин көңлигә йол тапқанлиғини алаһидә қәйт қилди. Натиқ шундақла пешқәдәм сәнъәткар, Қазақстанниң хәлиқ артисти Қурванҗан Абдурасулов билән та һазирғичә қоюқ арилишип келиватқанлиғини мәмнунийәт билән тәкитлиди.
Асанәли Әшимоғлиниң «Уйғур театриниң 100 жиллиғини кәң даиридә, йәни ЮНЕСКО дәриҗисидә атап өтүш тәкливини беримән» дегән тәшәббусини көпчилик давамлиқ алқишлири билән қоллайдиғанлиғини билдүрди. Сәһнә булбули, Қазақстан хәлиқ артисти Роза Рымбаеваниң жүрәктин чиққан иллиқ тиләклириму Уйғур театриниң хәлқимиз үчүнла әмәс, пүткүл қазақстанлиқлар үчүн әтивалиқ, абройлуқ, сөйүмлүк сәнъәт дәргаһи екәнлигини йәнә бир қетим испатлиди.
Сәнә җәриянида Қуддус Ғоҗамияров намидики җумһурийәтлик дөләт академиялик уйғур музыкилиқ-комедия театриниң мудири Дилмурат Баһаров Уйғур кәспий театри тарихида тунҗа қетим өткән музыкилиқ қоюлумларниң I театр фестивалиниң қатнашқучилири – М.Әвезов намидики Қазақ миллий драма театриниң, «Жаңа ғасыр» театриниң, «Алатау» әнъәнивий сәнъәт театриниң, җумһурийәтлик дөләт академиялик Корей театриниң вә, әлвәттә, Уйғур театриниң коллективлириға сәмимий миннәтдарлиғини билдүрүп, маддий вә мәнивий соғилирини тапшурди.
Бу күни Уйғур кәспий театриниң жилнамисини әкис әттүридиған һөҗҗәтлик фильм тамашибинлар диққитигә намайиш қилинди. Қазақстан хәлиқ артисти Роза Рымбаева вә Қазақстанниң хизмәт көрсәткән әрбаби Игорь Благодарныйниң миллий роһтики нахшилири көпчиликниң қәлбини тәврәтсә, Қазақстан дөләт академиялик Уссул театриниң солистлири Д.Акенов билән Сымбат Максутниң (балетмейстер-хореограф Қазақстанниң хәлиқ артисти Болат Аюханов) балети гүлдүрас алқишларға сазавәр болди. Әнди миллий театримизниң сөйүмлүк «Нава» вә «Рухсарә» уссул ансамбльлири тәрипидин орунланған нахша-уссуллар адәттикидәк чаңқиған диллиримизға мәлһәм бәрди. Мошу йәрдә Қуддус Ғоҗамияров музыкисиға йезилған «Әсирләр садаси» намлиқ театрланған қоюлумниң көпчиликниң көңлидин чиққанлиғини алаһидә тәкитләш лазимдур. Ахирида гала-концерт қатнашқучилири «Қазақстан» хорини (сөзи М.Абдурахмановниң, музыкиси А.Тоқаевниң) иҗра қилди.
Қошумчә қилсақ, сешәнбә күни Қ.Ғоҗамияров намидики җумһурийәтлик академиялик Уйғур музыкилиқ-комедия театри тәсис қилған «Чолпан» мукапитиниң йәкүни чиқирилди. Тамашибинларниң көпчилигиниң авази билән «Әң яхши актер» номинацияси бойичә Муһидин Варисов, «Әң яхши актриса» номинацияси бойичә Эмина Рәхмәтҗан, «Әң яхши уссулчи» номинацияси бойичә Гүлнарәм Турсунова, «Әң яхши нахшичи» номинацияси бойичә Мехрат Рәхмәтҗан, «Әң яхши сазандә» номинацияси бойичә Пәрһат Палтаев ғалип чиқти. Ғалип чиққан сәнъәткарларға театрниң мудири, Дилмурат Баһаров тамашибинлар алдида тәнтәнилик рәвиштә «Чолпан» мукапитиниң дипломини, статуэтка һәм баһалиқ соғиларни тапшурди.
ӘЛҚИССӘ: шундақ қилип, миллий театримизниң шанлиқ тәвәллуди кәң рәвиштә нишанланди. Театр әшу бир өткән әсирниң 30-жиллирида қурулуп, шу чағдики дәсләпки қоюлған спектакль – «Анархан» драмисиниң муәллиплири Җ.Асимов билән А.Садировниң мәзкүр тарихий әсәрни қолға кәлтүрүши бүйүк җасарәт еди. Шуниң билән биллә дәсләпки йезилған спектакль – А.Розибақиевниң қәлимигә мәнсүп «Мәнсәппәрәс» драмисиму зор тарихий әһмийәткә егә. Мошу йәрдә иккинчи җаһан урушиға 54 театр сәнъәткари иштрак қилип, нурғуниниң җәң мәйданида қаза тапқанлиғини әслитип өткүмиз келиду.
Хуласиләп ейтсақ, театр – миллий мәдәнийитимизниң әйниги екән, әшу чақнап турған әйнигимизни пакизә тутуш һәммимизниң пәрзи екәнлигини ядимиздин чиқармайли.
Абдулҗан АЗНИБАҚИЕВ
Алмута шәһири https://uyguravazi.kazgazeta.kz/news/51178 #uyghurtheatrekz
Присоединяйтесь к ОК, чтобы посмотреть больше фото, видео и найти новых друзей.
Нет комментариев