Көзим үйренип кеткен
Сапарбай муғаллим өзи оқытатуғын алтыншы класстан диктант
алды. Балалар диктантты шаққан жазып болғаны ушын тәнепистен
еки-үш минут бурын шаўқымласпай шығып ойнаўға руқсат берди.
Оқытыўшылар бөлмесине келсе өзин мектепте ана тилинен
оқытқан ҳәзир кәсиплес устазы, Кәримбай аға отыр екен.
— Ассалаўма алейкум, устаз, — деди ол қолындағы оқыўшы-лардың мийнетлерин стол үстине қойып. — Сизди көргеним жақсы
болды-ғо. Көптен бери нийет етип, бирақ, айта алмай жүр едим.
— Не еди, тынышлық па? — деди устазы сораўлы нәзер менен
тигилип.
—Мениң оқыўшыларымның мийнетлерин бир баҳалап берсеңиз?
— Өзиң не?
— Сизиң баҳалаўыңыз басқа дә, қәтени бир көргеннен аңлайсыз.
Мениң көзим үйренип кеткен оларға. Себеп пенен сиз мениң оқы-тыўшылығыма да баҳа берген болар едиңиз…
Устазы келисим берди.
Ертеңине тап усындай тәнепис ўақтында устазы диктантларды
оның алдына қойды. Сапарбай тез-тез ашып көрип, баҳалар менен
таныса баслады. Ҳәмме фамилиялар өзине таныс болғанлықтан тек
оқыўшылардың атларын ғана еситилер-еситилмес гүбирлеп оқып,
соң баҳаларға қарады: Жумог-4, Клеопатра-3, Изаура-4, Котовский-3,
Калина-2, Валентин-3, Ошин-4, Тотионо-4, Янтавал-4, Гагарин-2,
Аманбай-5..
Усы жерине келгенде Сапарбай иркилип қалды. Көзлерине исен-бей, қайтадан оқыды. Бекимбетов Аманбай 5…
— Ҳаў, устаз, Аманбай деген оқыўшыға «5» қойғансыз ба?
— Аўа, ол балаға бес қойдым.
— Жазыўлары патас, ҳәм қәтеси де баршылық-ғо?
— Ояғына кеширим бердим.
Сапарбай устазына ҳайран болған пишинде қарады.
— Аўа, онысына кеширим бердим, — деди устазы тәкирарлап.
— Бийшара балам, гилең жат журтлы кино қаҳарманларының ара-сында бир өзи екен, бүйирим бурып кетти.
Сапарбай бирден күлип жиберди.
— Айттым-ғо, устаз, сиз қәтени бир көргеннен аңлайсыз деп…
Мениң болса олардың атларына да көзим үйренип кеткен.
Соң ол бирден күлген аўзын жыйнап алды.
— Кеширерсиз устаз, жақында бизиң баллар-әм ақлық қыздың
атын Эсмеральда қойып еди…
Муратбай Нызанов
23.11.2016-ж.
Присоединяйтесь к ОК, чтобы подписаться на группу и комментировать публикации.
Комментарии 2
+998913811842
Мамам турмыска шыккасын аты фамилиям озгерди Ибрагимова Акжулдыз Маратовнамын казир.