Çулла
Микуласăр хĕл лармасть,
Микуласăр çу пулмасть.
Эп саватăп çуллана,
Пит килĕшет вăл мана.
Илĕртеççĕ-çке куçа
Тĕрлĕ тĕслĕ çеçкесем.
Çутçанталăк, мăн хуçа,
Парнелет ăшă кунсем.
Юрататăп эп ăшша,
Вăл ярать чуна ташша.
Кăлт-кăлт сикет ман чĕре,
Хĕвел шевли ман питре.
Ах, илемлĕ -çке çулла!
Пахчара пиçет çырла.
Шăпчăк юрриллĕ пахча
Илĕртет хĕрпе качча.
Чĕкеç кайăк кун пуçлать,
Шăпчаăк вара кун вĕçлет.
Шапчăк юрланă чухне
Шăрчăкĕ те сас парать.
Çу уйăхĕ – виç уйăх,
Виççĕшĕ те çунатлă.
Шутлă кун вăл час иртет,
Ак пăхан, кĕр те çитет.
Çутçанталăк мĕн парать,
Пурне те илес пулать.
Çуллахи ĕç - хĕл тутти,
Пурăнмашкăн – кун çутти.
Çулла тар юхтармасан,
Тар вара хĕлле тухать.
Хĕвел çÿлте пăхмасан,
Çу кунĕ начар пулать.
Ав сар хĕвел тÿпере
Йÿле янă кĕпине.
Кунĕпе ĕçле-ĕçле
Унăн епле тÿсмелле.
Кунĕ вăрăм, çĕр кĕске,
Таçта та ун çитмелле.
Ăшăрханă пулмалла,
Ун çумăр çутармалла.
Çуллахи Микулара
Тепĕр кун çумăр çусан,
Çăвĕпех йĕпе пулать,
Ешĕл курăк тапранать.
Кулать çутă çанталăк
Çуллахи ăша кунта.
Илемленет тавралăх,
Мĕн кăна ÿсмест унта.
Пилеш, пиллĕх йывăçĕ,
Киленет хăй пĕвĕпе.
Панулми, Тур çимĕçĕ,
Савăнтарать çăвĕпе.
Кăткă йышĕ шеп ĕрчет,
Хатĕр капана ишме.
Хурчăка çÿлте вĕçет,
Пĕр чĕппе те тиркемест.
Пуллăн хÿри пит яка,
Тыттарасшăн мар хăйне.
Ача-пăча пулăран
Нимсĕр таврăнать килне.
Кăвак пĕлĕт айĕнче
Тăри тăрăшса юрлать.
Кашни çыннăн чĕринче
Ырă шухăш çуралать.
Манăн калас çакна та:
Çутçанталăк тем тĕрлĕ,
Кирек мĕнле вăхăт та
Хайне майлă илемлĕ.
Кекен ялĕ, Никифорова Мелания
Комментарии 6
Ӗмӗрӳ вӑрӑм пултӑр!