Предыдущая публикация
Экспромт:
ӨЗ ТИЛИҢДИ УНУТПА!
Халал эмес -- адал де,
Харам эмес -- арам де...
Минте берсек өздүк тил,
Барып бир күн тамам де.
Фатва эмес -- чечим де...
Ката кетсем кечир де.
Уңгу сөздүн баркын сен,
Утурумга кетирбе.
Дагы канча сөздүктөр,
Өөн сөздөрдөн куралып.
Нак кыргыздын сөздөрү,
Барат ага буралып.
Аминь эмес -- оомийн де...
Өз сөзүңдүн сообун же.
Өзгө тилде мас болбой,
Өз дилиңде соомун де.
Ооз ачуу де -- ифтарди...
Сөз мааниси тим калды.
Өздүгүңдү унуткан,
Өөн өзгөлүк жин алды.
Адам ыйман кармасын,
Тапкан болуп аргасын.
Өз улутун сыйлаган
Жанды Кудай жалгасын!..
Автор: Бакытбек Мукарамов (Илегилек),
23.03.2023-жыл.
Следующая публикация
Нет комментариев