Акажон, яқинда қишлоққа борсам,
Баланд бўйингизни қучганда маҳкам.
Фақат бир илтимос ҳунг-ҳунг йиғласам,
Маҳкам қучоқлангу, не бўлди деманг.
Кимдир келиб қолса билдирмай қувинг,
Қўшилиб йиғламанг, жилмайиб туринг,
Жиянларим ёнга келтирмай қўйинг,
Соғинчга йўйингу, не бўлди деманг.
Янгам ўтхонадан келмай турсинда,
Нонлар майли аста-секин пишсинда,
Оҳ-оҳ ҳидларига ичим тушсинда
Ҳидимга тўйингу, не бўлди деманг.
Дардим оғир эмас, тўлганман бироз,
Ана бўшаяпман йиғлаб, айтиб роз,
Озроқ чидаб беринг, қиламан парвоз,
Ожизасан денгу, не бўлди деманг.
Шаҳарда бақириб йиғлаб бўлмаскан,
Қўшнинг ҳамхонангдай, тиғлаб бўлмаскан,
Болангни аяйсан бўлаклансанг ҳам,
Меҳрга йўйингу, не бўлди деманг.
Бунинг ҳаётимга томонлиги йўқ,
Куёвингиз тилло, ёмонлиги йўқ,
Фақат чап кўксимга қадалгандай ўқ,
Тақдирга йўйингу не бўлди деманг.
Ҳа-я, ота-онам билиб қолмасин,
Боя хўп кулдирдим, чайнаб олмасин.
Шифтга қарайвердим, қайтсин деб ёшим,
Улардай бўлингу не бўлди деманг.
Биламан, осонмас бундай кўргилик,
Кўксингда жигаринг уриб тургулик,
Аммо нима қилай бўғзимда лиқ-лиқ,
Қўшилиб куйингу не бўлди деманг.
Бир кўрпада ухлаб, улғайган акам,
Ҳаммадан қизғониб, хўмрайган акам,
Бугун урушмангда, эркаланг бир дам,
Жинни деб суйингу не бўлди деманг!
Акажон, яқинда кўргани борсам...
Нурхон Элмирзаева t.me/nurxonelmirzayeva
Присоединяйтесь к ОК, чтобы посмотреть больше фото, видео и найти новых друзей.
Нет комментариев