Предыдущая публикация
ЩЕБОХА.
Вохон щебоходду щомиду ричом,
Чара бич1оролъи дир чомло макъан,
Анлъидоле дуро жидоле гьисаб,
К1оролла хуружа хвант1уло мено.
Гьавалч1у бурдирси бурдия дихо,
Щебохо рещк1инно ден анлъиб жибкъа.
Рехъисорду гяби дич1у горлоду,
Анччидо гьейилло диб гьухьалуло.
Йохинносухуде еши щебохо,
Колъиси денногу гьокъу йик1уду?
Гьинукку рок1орлъи диб рейло булъиб,
Гьухьалулъи гьисаб жидя бисомор?
Чваххунялхо сорду щомиду ричом,
Дир макъан анлъибор лъенно ригъидо,
Йигъидосухуде е дий ноколлъо,
Риччи реладду чиб рошо бичиду?
Гьиро к1ой бикъобор ц1а лъен релъибор,
Елъидо мен эдер духогу ишя,
Амма ц1иниб дубо,гьеб дуй сайгъвати.
Дир рок1о гьарк1уллъи гьаллилъи лъенгъиб.
Рок1о режарадо рукьиллъи ц1ади,
Ц1инялч1уло ллек1у ц1ини меноду,
Барашхъиносале еши мен дила,
Адада вуч1иду,гьокьол ден водду?
Йишобей гьило мен жией диб т1алаб,
Релълъолъей дило ц1ц1а дубгу г1ишкъуллъи,
Дир рок1о режарси гьор рукьиллъи ц1а,
Рищунносса ц1иниб себло данч1укку.
Дибо ургъел бик1ор релъо квандяллъи,
Багъу мокьиллакку ден лъорлъидяллъи,
Мокьилла лъорлъоду релъо кванлъибор,
Лъорлъи бик1удя дан дибожа ц1ино.
Зубу хвант1удялч1у ден золо сиро,
Сору йик1удурий лъеру мен сужа.
Бешенни вохину ден ламусилдо,
Ургъелалъисугу юргъан сужаду.
Гьонлъи ешболлолъи золо йигьолгу,
Амма гьила йоч1об сей менсугу су.
Гьек1уйил ешбади дий босомоло,
Еши духосуде диб рошо булон.
Ригьи бикъугусде гьинже лъиболло,
Гьокъолло йишоду пикри жидурий?
Пикру паламалъи хен дуй илулъи,
Рекъуддужа гьинже,гьер ц1ивгъудоса.
Ц1иво ц1ивол вошул гьило вокъурсол,
Вокъуло йик1обор менгу йохордя,
Йохор дуй илуди гьеб дуб шанолъу,
Жийиб жибкъа дано дубожа ц1ино.
Беддо гьеб амалло бедо ч1угьило,
Ч1угьуннибул вошул живолгу водо,
Сев дулагу рокъиб гьек1а къощибор,
Гьевлогу яхунну рокьочул рошон.
Д. АЗАЛОВ.
Следующая публикация
Нет комментариев