Замананы сүгәбез дә кайчак,
Бар гөнахны аңа сылтыйбыз.
Янәсе лә, башка заман килде,
Шуңамыдыр сыкрап - сыктыйбыз.
Акча юкка ул гаепле бүген,
Заманасы гүя кыйбатлы.
Тормыш куып йөгерәбез хаман,
Без бит нинди көчле-гайрәтле!!!
Заманадамы соң бөтен гаеп?
Һавасы да, җире, сулары -
Барысы да нәкъ элекке алар,
Без үзгәрдек хәзер нибары.
Кадере юк якын-туганның,
Байлык бүлә күпләр ызгышып.
Күршеләргә керү юкка чыкты,
Мал җыябыз ярышып - узышып
Ике бала булса, ничек аны,
"Тәрбиялик"- диеп, уфтанып.
Иртә таңнан зарланабыз хәзер,
Яшәмәсәк тә без мохтанып.
Һәр өй саен уникешәр бала,
Тәгәрәшеп элек үскәннәр.
Урам тулы күрше- күләннәр,
Кич утырып хәл белешкәннәр.
Вакыты да җиткән әниләрнең,
Өй тутырып малын карарга.
Ир кадере булган өлгедә,
Тырышкан бит алар ярарга.
Киемне дә кигән алмашып,
Модаларны бер дә белмәгән.
Авыл мәшәкате булган бары,
Чит илләргә чыгып йөрмәгән.
Диңгез күреп кайту гадәте,
Арта бара безнең арада.
Туган якның матур җирләре,
Күренсә дә авыл - салада.
Машинасы яңа булмаса,
Хәерчегә инде санала.
Авылында өе булса да,
Зур квартир кирәк калада.
Замана шул, көн- төн алмаша,
Кояш чыга шул ук таң аткач.
Без кешеләр үзгәрәбез хаман
Намус хисен бер көн югалткач.
Санламыйбыз ата-ананы,
Нигез йортлар сыкрап елыйлар.
Кайберәүләр сата иманын,
"Килешми"- дип, бер дә тормыйлар.
Бар гаепне үзебездән эзлик,
Без үзгәрдек, башка без хәзер.
Аң-дәрәҗә кимиме соң шунда,
Яшәгәнгә "әзергә-бәзер".
Тукталыйк та, уйлык яңадан,
Гаеп атмыйк матур тормышка.
Яшиселәр килә аңлашып,
Уздырмыйча вакытны бушка.
Гөлнар Әхмәтҗанова, Чүпрәле районы, Иске Ишле - Казан. 14.08.2024.
Присоединяйтесь к ОК, чтобы посмотреть больше фото, видео и найти новых друзей.
Комментарии 23