Бубахшоям, аë модар,
Ки чанде аз канори ту будам бо амри
қисмат дур,
Хабар омад, ки аз дурии ман гардидаӣ маҳҷур.
Гунаҳгорам, аë яктои баҳру бар,
Зи бемеҳрии ин фарзанд, яъне ман,
Туи покизагавҳар гаштаӣ ранҷур, эй
модар,
Бубахшоям,аë эй хоки поят зар,
Аë олампаноҳ, эй боғбони зиндагипарвар,
Ки рӯзат тор гардид аз барои ман,
Ва мӯят гашт испед аз барои ман.
Хати ожанг андар чеҳраи покат ҳувайдо шуд,
Ва ғарқи оби чашмони ту дарë шуд.
Аë модар,
Ду чашмони ту миръоти ҷавонӣ буд,
Ва ин ойина акнун дарду ранҷи пириро созад таҷассум,
Ва дар он дард месозад табассум.
Аë модар,
Аë ҳури саодатбахш,
Шурӯъ аз рӯзи мелодам
Туро озорҳо додам,
Кунун эҳсос бинмудам, ки ҳастӣ ту
Ҷаҳоне дар ҷаҳони ман,
Ягона пуштибону меҳрубони ман.
Аë модар,
Ҳамехоҳам,ки дар олам
Ту умре ҷовидону шодмон бошӣ.
Ба болои сари фарзандҳоят,
Илоҳо соябон бошӣ.
Аë модар, аë шеди ҷаҳонафрӯз,
Чароғи шодиро афрӯз,
Аë модар, аë олиҳаи меҳр,
Ҳамехоҳам, ки бар тақвими умри ту,
Фақат фасли баҳор ояд,
Фақат фасли баҳор ояд!!!
Присоединяйтесь к ОК, чтобы посмотреть больше фото, видео и найти новых друзей.
Нет комментариев