Өзүңүздүн же сизди курчаган адамдардын мүнөзүн, тубаса талантын, күчтүү жана алсыз жактарын билгиңиз келеби? Анда сиз үчүн ар бир адамдын тиешелүү саны аркылуу мүнөзүн билип алууну сунуштайбыз. Алгач өзүңүзгө тиешелүү болгон саныңызды тактап алыңыз. Мисалы, сиз 21-ноябрда төрөлгөнсүз дейли. Анда өзүңүзгө тиешелүү санды аныктоо үчүн туулган күнүңүз менен айыңызды кошосуз: 21+11=32. Чыккан санды бир орундуу сандарга ажыратып, дагы кошосуз: 3+2=5. Ошентип, сиздин саныңыз 5 экенин билип алдыңыз.Же мисалга сиз 3 - январда торолсонуз 3+1=4 болот. Ушундай эле жол менен сизди кызыктырган башка адамдардын да өздөрүнө таандык санын таап алсаңыз болот.
"1" - саны.
Мындай адамдар активдүү, ишкер келишет. Эркиндикти сүйөт, ошондуктан, эркиндигине чек койгондорду жактырышпайт. Бирок, анткен менен, өзүнүн оюн башкаларга таңуулап, түгөйүн басынтканга аракет кылат. Абдан чыгармачыл жана таланттуу, бирок кепке келбеген, өзүнүкүн бербегендердин катарында. "Бир" ар тараптуу, эптүү, бир нерсеге жөндөмдүү, энергиялуу, күчтүү жана чечкиндүү, орундалбаган нерсеге тырыша берет. Төрөлгөндөн тартып лидер болууга умтулгандыктан, өзүнүн күчүнө жана акылына ишенет. Көңүл борборунда болгонду жактырат, бирөөгө баш ийгенге чыдабайт. Буларды дайыма ийгилик коштоп жүрөт, муну менен бирге "бирлердин" намыскөйлүгү өз каалоосун аткарганга, карьерасынын өсүшүнө жакшы өбөлгө болуп берет. "Бирлердин" жүрүм-турумунан менменсингендикти, даңкка умтулгандыкты жана каардуулукту да байкоого болот.
"2"- саны
Туруктуу, бирок ошол эле учурда чечкинсиз мүнөзгө ээ адамдар. Башка адамдардан көз каранды. Айлана-чөйрөдөгү нерселерден бат таасирленет. Ашыкча энергиялуу, алтынчы туюму жакшы өнүккөн жана өздөрү билбеген жашыруун күч-кубатка ээ. Кээде түнт боло түшүшөт. Бир нерсеге жөндөмдүү, дилгир, бирок өзүнө ишенбегенинен улам депрессияга жана стресске көп кабылат. Айлана-чөйрөдөгүлөрдөн бөтөнчө болуп бөлүнүп турат, ошентсе да жан дүйнөсү жалгыз, чектен ашыкча чыкпаган адамдардан. Ойлоп тапкыч жана чоң тамашакөй. Өзүн-өзү сындаган адамдардан. Өзүнө талапты катуу койгондуктан, тез-тез көңүлү калат.
"3"- саны
"Үч" көз карандысыз, ачык мүнөзгө ээ. Жалгыздыкты жаман көрөт жана көңүл ачууга басым жасап, тартылып турат. Ал ишкердүү, чыгармачыл жана ар бир иште демилгени колго алгандардын катарында. Негизи, "үчтөргө" сабырдуулук жетишпейт, кээде жумушка көңүлкош, шайкелең мамиле жасап коюшат. Артисттик талантка, жөндөмдүүлүккө ээ, көңүл борборунда болгонду жактырат. Жетик акыл жана сөзгө бай келет. Алдыга койгон максатын ишке ашыруу үчүн кыйынчылыктардан коркпойт, жашоого оптимисттик көз карашта. Ызакор, өзүнүн таарынычын ичине катат. Эмоционалдуу, эгерде маанайы жок болсо, жинин айлана-чөйрөдөгүлөрдөн чыгарышы мүмкүн. Башкалардын кетирген катасына кең пейилдик менен карайт. Акчага жеңил мамиле жасайт.
"4"-саны
Мүнөзүндөгү эң негизги нерсе - туруктуулук. Тартип жана эреже боюнча жашаганды жактырат. Окуянын бат-бат алмашып турушун каалабайт, анткени, бул нерсе аны тең салмактуулуктан чыгарып жиберет. Тартиптүү жана ар бир ишин, таштаган кадамын да ойлонуп жасайт. Бардык иште так жана тыкан. Маселе жаралса туура чечим кабыл алат. Акчаны акыл калчап пайдаланат, тырышчаак, өжөр, көк бет. Кыйынчылыктардан коркпойт. Карьерасынын же бизнесинин жогорулашы үчүн мыкты орунду тандап, көп эмгектенгенге жана иштегенге даяр. Жакшы менен жаманды айырмалай билет жана идеал туткан адамын карманат. Дүйнөгө реалдуу көз карашта карайт. Чынчыл жана калыс. Сүйгөн адамдардын көңүлүнө карап иш кылат. Үй-бүлөдө жоопкерчиликтүү жана камкор ата-эне.
"5"-саны
"Бештер" өрт адамдардан. Көз карандысыз жана эркиндикти сүйгөн мүнөзгө ээ. Кызыктуу окуяларды издегенди, өзгөрүүнү, жаңы нерселерди жактырат. Алды-артын ойлобой бир нерсени жасап туруп, андан соң ойлонот. Жумушта жетекчилик кылганга жөндөмдүү. Акылдуу, мамилечил, боорукер. Жаңы адамдар менен таанышканга, алар менен бирдей мамиледе болгонго умтулат. Бир нерсени билүүгө кызыгат. Бир эле убакта көп жумуш менен алек болгонго аракет жасайт. Бирок баштаган нерсесин аягына чыгарбайт. Элдин көңүлүн алганды билет. Чечендик жөндөмдүүлүккө ээ. Ар тараптуу нерселерге кызыгат. Өтө сезимтал болгондуктан, жакын адамы менен болгон мамилесин үзүү "бештер" үчүн өтө оор. Алар үчүн жаңы досторду табуу кыйын, бирок "беш" досторун эч качан сатып кетпейт. Жыйнактуу эмес жана өтө таза болгонду жактырбайт.
"6"-саны
Бул адам - чыныгы кыялкеч. Мындай адамдарды ичинде арамы жок, ачык-айрым деп айтып коюшат. Айланадагылар менен болгон мамилесин мыкты деп элестетип алып, көптөгөн адамдардан көңүлү тез сууп калат. Ак көңүл, боорукер, кайрымдуу, дайыма колунан келген жардамын аябайт. Кандай жагдай болбосун жылуулук, жайлуулук жана жыргал тартуулай алат. Эмоционалдуу жана чыгармачыл, баш ие билет. Жакшы менен жаманды айырмалай билет, алтынчы туюму жакшы өнүккөндүктөн, бизнесинин өсүп-өнүгүшүнө туура жолду тандай алат. Жоопкерчиликтүү, сабырдуу, жөнөкөй, берешен. Булар үчүн үй-бүлөдөгү мамиле эң маанилүү ролду ойнойт. Балдарын түшүнө билген мыкты ата-эне. Адамдарды куткарып калуу үчүн өзүн курмандыкка чалууга даяр, дайыма алсыздардын тарабында. Ата-энесине камкор мамиле жасайт. Артисттик жана музыкалык
таланттын ээси.
"7"-саны
Жети саны алар үчүн ийгиликтин саны катары эсептелинет. Токтоо, сабырдуу жана көз карандысыз. Сезимдерин ачыкка чыгарганды жактырбайт. Обочо жерде болуп, жалгыз иштөөнү каалайт. "Жетилердин" мындай сапаты шектенүүнү жаратат. Төрөлгөндөн тартып таланттуу, сейрек кездешкен чыгармачыл жөндөмдүүлүккө ээ, өзүнүн акылдуу экенин көргөзүүнү жактырат. Жашоодо ийгиликке жетүү үчүн жана чыгармачылыгынын өсүшү үчүн жакшы мүмкүнчүлүктөргө ээ. "Жетилерге" башка адамдар менен болгон ачык, жөнөкөй, өз ара мамилелешүү жетишпейт. Кээ бир учурда өзүн жалгыз сезип, башка адамдар менен болгон баарлашууда жакшы мамиле куруп кете албагандыгы үчүн өзүнө айып коёт.
"8"-саны
"Сегиздер" таланттуу келишет. Лидер болуу касиетине ээ. Дайыма жетекчилик кылып, бийликти колго кармап, колдон чыгарбай башкарганды жактырат. Ал абдан энергиялуу, демилгени колго алган, эгерде ал болгон күчүн жумшап аракет кылса, материалдык жактан ийгилик коштойт. Жакшы уюштуруучу. Көз каранды болгонду жана чек койгондорду жаман көрөт. Олуттуу чечим кабыл аларда акылмандуулук менен таразалайт, бирок кээде өжөрлүк, көк беттик жана чыдамы жок касиеттери да байкалышы мүмкүн. Акча жаатында жана бизнесте да бардыгына жетишет. Алтынчы туюму жакшы өнүккөн, акчаны сарамжалдап, кантип коротууну билет. Жашоодо кандай нерсе болбосун, аны көтөрө билет. Эгерде ката кетире турган болсо да, кайрадан ийгилик жарата алат. Мыкты психолог, бул сапаты менен көптөгөн адамдардын мүнөзүн биле алат. Бирок өмүрлүк жар тандоодо ката кетирип алышы мүмкүн.
"9"-саны
"Тогуздар" жароокер жана тынчы жок мүнөздүн ээси. Кыялкеч болгону менен кайраттуу жана эр жүрөк. Сулуу жана сабырдуу. Анын фантазиясы күчтүү, ой-жүгүртүүсү жакшы өөрчүгөн. Бүт адамдарды сынап, өзүнүн пландарын ишке ашырууга пайдасы тие тургандарын гана тандайт. Күч-аракети жок эле өзүнө сырдаш боло турган адамдарды тартып турат. Өзүнчө жашоого даяр эмес, тиричилик маселелерин кыйынчылык менен чечет. Адамдарга маанайына жараша мамиле кылат. Ал баштаган нерсесин аягына чейин чыгара жасайт. "Тогуздар" кайрымдуулук жүргүзүү менен биргеликте өзүнө жакшы маанай тартуулай алат. Адамдарга жардам берүүдөн канааттанып, моокумун кандырат.
Присоединяйтесь к ОК, чтобы посмотреть больше фото, видео и найти новых друзей.
Нет комментариев