Предыдущая публикация
КОРАСЬÖМ
Миян деревнясö кöркö нимтicö Урбöжöн, сiдз и кольччiс.Кö ть нимсö пондылiсö вежны не öтпырiсь. Деревняас öтiк конечас мый керсьö, мöд конечас ни тöдöны.Вот и сэк Кузь майöг Опонь Настя кузь коккезнас шыбыльтiс-мунiс улича конечас Öлешика ордö.Эз ешты ыбöссö игнавны да здоровайтчыны, чожа пондiс новостьсö висьтавны (не весь эд сiйö эшö нимтöны "последнöй известияöн").
-Олешика, те кылiн? Егор Нинаыслöн зоныс гöтрасьны мöдö!
-Пашкаыс?
-Сiя. Кöч ладорись невестасö адззис. Письмо сылö гижис, да корис.
Олешика обычайесö тöдiс и некöр эз дзуг.
- Тэ мый, кин жö сiдз керö!? Аймам абу, дак оз и корась. Мун, Настя, сы дынö да висьтав, ась корасьны перво мунö да невестасö ачис вайото. Деревняас адззам сваттэсö.
Опонь Настя котöрöн мунiс кошшыны Егор Нина Пашасö. Кытшöмкö кад бöртi öтiк кока Карпунь Епа пуксис велосипед вылö да нöбöтiс селоас почтаö телеграмма: "Лена, видзчись, ме тэ дынö локта. Паша".
Сы коста Олешика беддьясьöмöн утка моз мунic кошшыны сваттэз. Перво пырис Спирика Петра Ваня ордö. Сiйя туйсö Кöч ладорас тöдö, инькаыслöн сэтчин олö очавон. Петра Ваньыс нянь мöдö пожавны, да тестоыс квашнясиc пышшöма, тыр пызан вылас, öктö ошлапаэзнас. Инькаыс абу, нылыс дынö гöститны мунiс, вот и стряпайтö. Петра Ваньыс согласиччис мунны корасьны.
Сыбöрын Олешика кыссис бригадир дынö, Анна Петровна дынö. Сiя деревняас медграмотнöй морт, юрыс сылöн уджалö, кöркö пондылiс сельхозтехникумын велöтчыны. Сiя не кöс годö шогмис: ростнас ыджыт, силасö Еныс сетic, и басöк рожабана. Лагун моз оз понды пукавны, корасяс мортмоз. Петровнаыс шуис:
- Муна, да колö Гришкасö гармоннянас сьöраным босьтны.
Рытнас Анна Петровна дынö Кузьпиня Семен вайис свежöй чери. Öлен-Бызда Öм гряд конечас дзеблiс мужык шогья самогон. Гусьöника гарйис да конувтас вайис. Öгаш Опонаська последней курöгсö начкылiс, эз и жалейт. Пуöм яй дукыс ылö кылiс, нырпыссэсö дразнитiс. Антип Вась (Пашаыслöн дядь), кöть и скряга –лымсö тöвнас оз сет – вайис гудыра и гудыра самогон, быдса четвертнича (натьтö ва кодь).
Асывнас деревня шöрас чукöртчис народ. Митрош автобуснас локтiс одз. Анна Петровна ыджыт сумкаэзнас (гöснеччесö вайисö тыр) öдва автобусас пырис. Петра Ваньсö костюмнас да галстукнас отирыс перво эз и тöдö. Гришка гармоннянас чатрасьöмöн локтiс, а жöник се абу. Думайтiсö, узьö, Но Пашаыс котöрöн локтiс, отiк киас йöрнöс, мöдас нянь кусöк. Туйыс не матын. Сякöй сернисö ештiсö баитны, да öтiк стопкаöн юыштiсö, медбы смелöжыка баитны.
Местаас локтiсö, первöй керкуас пыралiсö юасьны. Хозяйкаыс дивуйтчис:
- Маша Останинаыс неважын женик сайö петiс, öддьöн гажа свадьбаыс волi. Куим лун гуляйтiмö.
Öшисö: мый нö пондам керны? Курöггез эд пондасö серавны. Оглобляэз бергöтны колö. Только Пашаыс оз верит. Мунiсö ылöжик да магазинö пырисö, сэтчин юасисö. Продавец сералö: " Эд Машаэз Останинаэз кыка!"
Аддздзисö керкусö, гöснеччезнас пырисö, гармоннянас Гришка орсö. Петра Вань горöна шуö :
– Локтiм корасьны, чур не лöгасьны, ваöн не коясьны, саöн садiсьны, гöрмöдтчанöн не чуйисьны. Миян купец, тiян - товар.
Мамыс невестаыслöн паймис:
–Тöварыс эд асывнас первöй рейснас мунiс чемоданнэзнас.
– Ме эд ыстi телеграмма, что локтам, – шуис жöник.
– Абу некытшöм телеграмма,– висьталiс невесталöн мам.
Пызан сайö пуксисö, сейисö, юйисö, сернитiсö, жениксö ошкисö. Сыбöрын приданнöйсö автобусас грузитiсо. Сваттяыс винасö кык литра сьöраныс пуктiс. Еныслö юрбитiсö, да гортö пондiсö мунны. Гришка гармоннясö мымда вермö нюжöтö, Петра Вань да Петровна частушкаез сьылöны- горöтöны. Шоферыс туйсö öштiс, кычöкö вöрö пыртiс, кöть юр орöт. Казясисö, пондiс бергöтчыны да сибдис, не одзас, не бöрас. Кык час гöгöр мырсисö, быдöнныс ляксисö, но все же вермисö автобуссö тойыштны. Пуксисö да одзлань мунiсö.
Винаыс "кытсасьö", не öтпырись сутвтлiсö, юисö. Самогоныс свттьяыслöн öддьöн волi крепыт. Митрошлö тоже невнаöн удлiсо. Руль саяс сiя пондiс сунасьны, туйсö эз понды адзыны. Гармонист мыдзис орсны, да бöрись сиденне вылас гармошкасö юр увтö пуктiс да каркьйö узьö.
Петра Вань сунасьöмöн ассис кузь песня сьылö: " Нок, нок, нок, нок...". Жöник мыйкö думайтö. Шофер туйсö совсем эз понды адззыны. Петровна бокас сувтiс да командуйтö: "Веськытлань, шульгалань, паныт машина..." Кöр Митрош совсем юрсö руль вылас пондiс пуктыны, Петровна тшöктiс сувтны неыджыт юок дынö.
– Мун , юртö кöдздöт!
Митрош мунiс да öшис. Анна Петровна мунiс кошшыны. Аддззис сiйö куст увтын: узьö и нем оз и кыв. Петровна эз вермы саймöтны, да сивиöттьяс лэбтiс да автобусас пыртiс. Ассис мужиксö, кöр сiя код, сiдзжö вайöтлö гортас.
Автобусас быдöнныс узьöны, горттöдз эшö ылын. Петровна пондылiс тузöтны узиссесö, но нем эз пет. Петра Вань валитчис Паша вылö, эмсö осьтiс, гуттэз öмдорас диньгöны, пырöны бы. "Дулльöсь пороззэз! узьö, саймат, дак поди морттэзöн лоат,"- негорöна висьталiс Петровна. Ачыс пуксис, кыскис пирöг, да пондiс сейны.
Медодзза саймис Гришка да пондiс горöна гармошканас орсны, быдöннысö саймöтны. Митрош одзсö треситic да руль сайö пуксис.
Горт деревняас локтiсö дзирс пемыт. Мужиккез пырисö невеста видзöтны. Ленаыс туйсö да керкусö адззис, эз узь,видзчисис Пашасö. Сваттэз асылöдз сэтчин пукалiсö, сваттьялiсь винасö юыштiсö.
Паша Ленаыскöт дружнöя олöны, челядь быдтöны. Лена уджалö фельдшерöн, а Паша бригадирöн. Петровна петiс пенсия вылö.
Поди, кинлö колöны бур опытнöй сваттэз, миян Урбöж деревняас нiя эмось.
Следующая публикация
Нет комментариев