(кисми дуюм)
“Дигар чора нест, талоқи занамро медиҳам ва писаракамро гиирфта баромада меравам”-оҳи сард кашида гуфт мард гунаҳкорона сар ба зер афканда.
-Сафар, бачам, ту худат бе падар ба воя расидӣ. Тақдир чунин будааст, ки ҳанӯз ту роҳгардон нашуда, раҳматии падарат, ки як ҷавонмарди зебои чорпаҳлу ва паҳлавонпайкар буд, дар зери чархи мошин монда, ҷавонмарг шуд. Бечора модарат бо ранҷу азобҳои зиёд туро калон кард ва роҳати фарзандро нодида рафт.
Нангу номус карда, бо қуввати худат зан гирифтӣ ва чароғи манзили модари зоратро равшан кардӣ, аммо тақдири шумро бин, ки ҳамсарат ҷавонмарг шуда, писарчаат аз модар ятим гашт.
Сарнавишт риштаи тақдиратро бо ин зан пайваст. Писарам, хуб аст, бад аст, ту аз ин занак аллакай 4 фарзанд дорӣ ва ҳақ надорӣ, ки аз рӯйи модарашон шуда, ин чаҳор тифли бегуноҳро ятим гардонӣ.
Аз тақдир роҳи гурез нест, агар гапи моро бигирӣ, писарат Самадро бурда, ба хонаи кӯдакон супор. Давлат ягон кӯдакро хору шудан намемонад. Бовар кун, аз зери муш лагади моиндар мондан дар хонаи кӯдакон воя расидан барои писарат сад бор беҳтар аст.
Дар он ҷо ҷиддӣ аз паси хондан шуда, ягон касбу ҳунар меомӯзад ва дар оянда туро соҳибӣ мекунад,-маслиҳат дод бобои Маҷид, ки калонсолтарин марди деҳа буда, касе аз аҳли деҳ ҳаргиз гапашро ду намекард.
Сафар хеле андеша карда, ниҳоят ба хулосае омад, ки дар ҳақиқат бобои Маҷид рост мегӯяд, аз умре дар зери ҷабру зулми моиндар будан, дар парастории давлат ба воя расидан барои писаракаш Самад сад бор беҳтар аст, чунки дар он ҷо хонда, ба қавле “одам мешавад” ва фардо дар зиндагӣ азоб намекашад....
Дар ятимхона
Бо чунин андешаҳо Сафар писаракаш Самадро, ки ҳанӯз шашсола ҳам нашуда буд, ба хонаи кӯдакон бурда супурд. Самад дар ятимхона ба ҷуз меҳри падар дигар аз чизе камбудӣ надошт.
Дар хонаи кӯдакон ба онҳо дар як рӯз се-чор маротиба хӯроки гарм медоданд, сару рӯяшон ҳамеша тозаву озода, либосҳояшон тамиз ва мураббиён нисбати ин ятимчаҳо хеле меҳрубон буданд.
Азбаски бачаи қобил буд, дар як муддати кӯтоҳ Самад бо дигар кӯдакон унс гирифт, мураббиён низ ин писарчаи ҷингиламӯйи дӯстрӯякро хеле дӯст медоштанд ва ҳаме нисбаташ меҳрубонӣ зоҳир намуда, кӯшиш мекарданд бемодариашро эҳсос накунад..
Солҳо турнасон мегузаштанд. Дар ин миён Самадро аз хонаи кӯдакон ба мактаб-интернат гузарониданд. Вай бачаи аълохон, рафтораш намунавӣ ва расмаш ҳамеша дар тахтаи фаврӣ овезон буд.
Сафар барои аёдати писараш тез-тез ба мактаб интернат омада, аз мураббиён ва омӯзгорон ҳамеша суханони хуб мешунид. Устодонаш Самадро ҳамеша таърифу тавсиф карда, ба падараш раҳмат мегуфтанд.
Сафар бо писараш ифтихор карда, дар дил худашро маломат менамуд, ки ба хотири як зани беандеша ва морзабон шуда, фарзандашро ба ҷудоӣ аз худ маҳкум намудааст, аммо тақдирро тадбир набуд.
Як бор ҳангоми таътили тобистона ӯ писарашро ба хона бурд, то ки муддате ҳамроҳи бародару хоҳаронаш зиндагӣ кард ба ҳамдигар руҳан наздик шаванд, вале моиндар ба Самад рӯйи хуш надода, айша талх кард.
Гулзира бо ҳар баҳона Самадро сарзаниш карда, киноя мезад ва чунон гапҳои талхе мегуфт, ки мисли ханҷар аз ҷавшани ҷони кас мегузаштанд. Бародарону хоҳарони ӯгаяш низ Самадро чашми дидан надоштанд ва ба хурдсолиашон нигоҳ накарда, мисли модарашон мудом неш зада меистоданд.
Бечора бача базӯр як ҳафта ба заҳри забон Гулзираи шаттоҳ ва бачаҳояш тоқат намуд баъд аз падараш хоҳиш кард, ки ӯро ба интернет бурда монад.
Пас аз ин вай пою қадамашро аз ин хона кард. Минбаъд ҳар гоҳ, ки падараш ӯро ба хона бурданӣ шавад, Самад бо ягона баҳона хоҳиши ӯро рад карда, таъкид менамуд, ки дар куҷое набошад, меҳри падар ҳаргиз аз дилаш берун намешавад. Азбаски Сафар феълу хӯйи бади занашро хуб медонист, писарашро барои ба хона рафтан маҷбур намекард...
Самад нав ба синфи 10 гузашта буд, ки падараш ба сактаи дил гирифтор гашта, аз олам чашм пӯшид. Хабари марги падарашро ба вай ҳамдеҳагонашон расониданд.
Вақте ки Самад гирёну нолон ба деҳа расид, аҳли деҳа тобути падари ормониашро аллакай сӯйи қабристон мебурданд. Ӯ бо чашмони пуроб ба анбӯҳи ҷанозахонон ҳамроҳ шуда, аз паси тобути падараш ҷониби оромгоҳи деҳа роҳ пеш гирифт.
Мардум дар бораи падари раҳматиаш суханони неки бисёре гуфтанд ва даст ба дуо бардошта, дар ҳаққи руҳу арвоҳи ин марди меҳрубон ва покмазҳар фотиҳа хонданд.
Гӯри Сафари ормониро дар паҳлуи қабри з якумаш Азизаи ғуррамарг канданд. Ба маънкуниҳои аҳли деҳа, ки “ин бачаҳо хел ҷавон аст, мабодо дилаш ваҳм карда, бем нашавад” мегуфтанд, нигоҳ накарда, Сама даруни гӯр даромад ва бо дастони худаш падарашро ба хос супорид.
Вақти ба хок мондани падари дар дунё рӯзу рӯшноӣ нодидааш оби дидагони ин бачаи берӯзӣ рӯяшро шуста, хун гиря мекард, вале тақдири бераҳмро тадбире набуд...
Гулзира вақте фаҳмид, ки шавҳарашро дар паҳлӯи зани якумаш ба хок супурдаанд, аз рашк “девона” шуда, беш аз пеш Самадро бад дид. Ин зани бадрашк ҳатто дар рӯзи ҷаноза писари шавҳарашро ба хона роҳ надод.
Бародарону хоҳарони ӯгаяш низ бо Самад бегонадил буданд ва чунон вонамуд мекарданд, ки гӯё Самадро аслан намешиносанд. Бачаи бечора дар пеши дарвоза қариб ду соат рост истода бошад ҳам, касе ӯро мурооти ба хона даромадан накард. Самад ночор дар пушти дарвоза б арвоҳи падараш фотиҳа хонда, ба интернат баргашт...
Моиндари бадтолаш Самадро ба маъракаҳои мотамии падараш хабар накард. Вай рӯзҳои истироҳат ба деҳа меомад ва рост ба қабристон рафта, гӯри падару модарашро ба оғӯш гирифта, соатҳо мегиристу дилашро холӣ мекард. Баъд ба рӯҳи арвоҳашон дуову фотиҳа хонда, боз ба интернат бармегашт.
Давом дорад..
Присоединяйтесь к ОК, чтобы посмотреть больше фото, видео и найти новых друзей.
Нет комментариев