2- БӨЛҮМ
Салкын көзүн арчып ордунан турду, өзүн ыңгайсыз сездиби: " Рахмат" - дегенсип башын ийкеди. Ичиндеги айталбай жаткан сөз бардай болуп, бир мени карап, бир үйдү карап туруп калды. Сезимдин үйдөн чыгып бизди карап турганын көрүп: "Капа болбо, болуп турат турмушта" - деп үйдү карай жөнөдүм. Кечки тамакты үнсүз отуруп ичтик. Жаңы жумушумдун жоопкерчилиги көп болгону үчүн жумушка эрте жөнөдүм. Эрте менен коңушунун үйү тынч экен.
Арадан зуулдап бир канча ай өттү. Ал аралыкта жумушка берилип иштеп кечинде дайыма үйгө көтөрүнүп келип жүрдүм.
Сезим үйдө отуруп зериккенби, - "Жумушка чыгам" - дей берди. Кызыбызды бакчага ала турган жашка жете элек болгону үчүн сүйлөнүп отуруп калат. Апам айылда жалгыз уулумду карап жашап жүрдү. Менден чоңдору ар кимиси өз турмушун улап, ар жакка иштегени чыгып кетишкен. Менден кичүү инимди үйлөнүп, апама кол кабыш кыл дей берип чарчадым. Такыр тил албай, сырт жактан келбей койду. Апам уулумду карап турганы үчүн, ар айда апама акча жөнөтүп турдум. Жашообуз баарына жетишип кетпесе да, эл катары өтүп жатты.
Бүгүн дем алыш болуп үйдө болчумун. Бир убакта эшик такылдап калды, "Ким экен" - деп сыртка чыксам, коңушу киши экен:
- Бош болсоң жүр, бираз бакта отуралы, - деп калды.
Өзүм дагы таанышкым келип турган:
- Отурсак отуралы, - деп аны ээрчип короо тарапка бет алдым.
Эшикке дасторкон жайдырып экообүзгө, орун даярдатып койгон экен. Дасторконду төгүп жасап коюптур.
- Отур, - деп отургучту көрсөттү, - Менин атым Темирлан! - деп колун сунду
- Мен Бегалы, - деп тааныштым.
Ал күнү бош болгонум үчүн убакытым кенен болчу, шашпай отурдук. Шаарда бир окуу жайында иштегенин айтты. Келинчегин чакырып, атын Салкын деп тааныштырды. Салкындын атын билгеним үчүн, - "Жакшы экен" - деп мен да атымды айттым.
Темирлан окуу жайда иштегени үчүн менден сымбаттураак көрүндү. Мен деле убагында жакшы окуу жайын бүтүп, турмушка байланыштуу жакшы жумушка орношконго каражат болбой, кара жумуш жасап калганыма Темирландын алдында жөнөкөй болуп калдым. Темирлан бир караган жанга жакшы көрүнөт экен, өзү дагы ак жүздүү болгону үчүн жылдыздуу көрүндү.
- Кел, тартынбай отуруп тамактан ал, - деп
Салкын даярдап келген тамакты мага сунду, -Кел, таанышканыбыз үчүн! - деп алдында куйулган ичимдикти мага берди.
- Мен ичпеймин, - деп баш тартканыма карабай ичиргизип жиберди. Экөөбүз кызый түштүк. Ал күнү кечке экөөбүз отуруп эки жакка мас болуп таркадык. Такыр ичпеген жаным, эртеси жумушка башым жарылчудай болуп бардым.
Кечке иштей албай кыйналып жүрдүм, түштөн кийин башым оорууганы басылып сергий түштүм. Экинчи ичпей турган болдум.
Күндөрдүн өтүшү менен жай мезгили соңуна чыгып, күз айы да келип калды. Жалбырактар саргарып, айлананы алтын күз каптады. Күз айы жамгырга бай эмеспи, нөшөрлөп жамгыр жаап, кайра ачылып, түшүп жаткан жалбырактардан дарактар жылагачтанып калды. Жай айы ысык болгондуктан, жылуу кийимге бат эле өтүп кеттик. Турмушубүз эл катары өтүп жатты. Темирлан менен таанышкандан бери кайра жолугушпадым. Күз күрөш болуп, ар ким өз жумушу менен элек болдук.
Жумуш аябай кызып, жасалып жаткан эмеректерге кардарлар көбөйүп, жумушчу жетишпей жатты. Ишканага бухгалтер керек болуп жарыя бердик. Директорубуз Назар байке, мурдагыдай желим идиштерге толтура кылып газ суу алып келип койгонун уланта берди. Жумушчулар аны бат эле ичип коюшат экен. Ошентип, жумуш кызып жүргөн күндөрү "Жаңы бухгалтер келди", - деп калышты.
Ал менин жумушум болбогондуктан, ким келгени анча мени кызыктырган жок.
Күндөгүдөй жумушта болчумун, канча жыгач керек экенин айтканы бухгалтерге кирдим.
Кызык, бухгалтердин ордунда Салкын отуруптур. Күтүлбөгөн кездешүү болду.
- Оой, эмне кылып отурасын? - десем
- Жумушка орноштум, - деди.
Ал да таң кала түштү. Келген жумуш боюнча сүйлөшүп, өз жумушума кайра чыгып кеттим.
Арадан бир топ күн өттү. Жумуштан үйгө келгенде чарчап калып, кызым Аруукени да көпкө эркелете албай калдым. Сезим үйдө отуруп зериктим дей баштады. -"Аруукенин жашы бала бакчага жете элек, ага чейин үйдө отурасын" - деп катуу айтып жибердим. Жини келген Сезим кечки тамактан туруп кетти.
Үй-бүлөөдө ар кимибиздин мүнөзүбүз ар башка, бир туугандарымдын арасынан мен өтө эле боорукермин. Баарына күйүнүп турамын, ошону үчүнбү, боюм кичине болуп калган.
Сезимдин маанайы жок туруп кеткенине столду өзүм жыйнаштырып койдум. Сезимди өзүм жактырып үйлөнгөнмүн, менден эки жаш кичине, бир айылдан болобуз. Үйдө отура берип, чынында эч жакка чыкпай, зеригип кетти деп туура түшүнүп жүрдүм.
Темирлан кызуу болуп келгенде ызы-чуу салып жүрдү. Алардын жаңжалына аралашпай калдым. Анткени Салкын менен чогуу иштеп калганыбызды Темирлан менен Сезим дагы билген болчу. Башында келинчегим -" Кандай экөөң бирге иштеп калдың? " - деп баш оорута берди. Анын алдында актангым келбеди,- " Аны Салкындан сура, мен деле сага окшоп билген эмесмин!" - дедим.
Бир күн жумуштан келсем, эшиктин алдында чоң жүк жүктөгөн машина туруптур. Ичинде көрпө -төшөктөр жүктөлгөн экен. "Темирландарга келген турбайбы" - деп үйүмө өтүп кеттим.
- Сезим, эшиктеги машина кимге келиптир? -деп келинчегимден сурадым.
- Салкындар үйүндөгү жүктөрүн жүктөп жатат- деди.
- Эмне, көчүп кетишип жатышабы? - десем, - -Билбеймин, бизге унчуккан жок, - деди.
Бир оюм кетти, балким ашыкча жүктөрүн берип жибергени жаткан окшойт дедим.
Арадан бир канча күн өттү, Темирландар үйүндө жашап эле жүрүштү.
Жумушта көпчүлүк менен жакшы мамиледе болгонум үчүн баары сыйлашат. Ишканада аялдар дагы көп иштешет. Шылтоо таап алдыма келе беришет. Аларга катуу айта албай, жумшак сүйлөп, акырын узатып коём.
Тамара деген жумушчу кыз алдыма көп келип жүрчү, аны байкап калган Салкын күзөтүп жүрүптүр, аны мен кайдан билемин.
Жумушта иштин көптүгүнөн кээде түшкү тамактанууга чыкпай жүрдүм.
Өз бөлмөмдө эле шириндиктер менен чай ичип алам. Бүгүн Тамара күндөгүдөй келип сүйлөшүп отурган, ошол убакыта эшиктен Салкын кирип келди. Мен ыңгайсыз болуп: - Кел! - деп ордумдан турдум.
- Бегалы байке, сиз бүгүнкү жумуштарыңыз менен мага кирбедиңиз, бир гана сиз калдыңыз, күтүп жатам! - деп кайра кабинеттен чыгып бара жатып Тамараны көз кыры менен карап койду.
Тамарага шириндиктерди коюп, чай куюп бердим. Чайды ичип жатканда: - Сен отуруп тур, мен бухгалтерге кирип чыгайын, - деп чыгып кеттим. Ал күнү Салкын менден көп нерселердин тизмесин тактап мени көпкө кармады. Эсептешип келсем кабинетимде эч ким жок экен, Тамара да кетип калыптыр. Ал күнү жумуштан эмгек акыны алып үйгө бардым. Биз жашап жаткан үйдүн жашоо шарты жакшы эмес болчу, башка жактан үй карап көрсөмбү деп ойлоп койдум.
Сезим адаттагыдай тамак даярдап күтүп турган экен, кечки тамактан кийин Аруукени алып көчөгө айланып келгени чыгып кеттик. Кеч кирип кеткен эле, уйгө кайра кайтып короого киргенде Темирландын кыйкырган үнү чыгып калды. "Дагы кызуу келиптир" - деп туура алар тарапка карабай үйүбүзгө кирип кеттик. Эми эле эшикти жаап жатсам Салкын энтигип жүгүрүп келди, бети башы чаң болуп, бетинин кичине жери тилинип кан агып калыптыр:
- Бегалы байке, Темирланды карап коюңузчу! - деп калды.
- Сен үйгө кирип тур, - деп өзүм эшикке чыктым. Темирлан короо менен бир болуп кыйкырып жатыптыр. Колго кирген нерселерди талкалап жатты. Анын мындай абалында астына бааруунун өзү коркунучтуу эле. Обочолонуп алыстан карап турдум. Эки үйдүн оротосунда жүргөн ак мышык бар болчу, ал мышыкты тутуп алып сөнгөккө бир чапты, байкуш жаныбар тыпырап жатып калды. Бир убакта Темирлан үйгө кирип тынчый түштү. Мындай жини келип турганда Салкынды издеп келип калбасын деп сыртта күзөтүп турганымда, келинчегим үйдөн чыгып, шашып дарыканага жөнөп калды.
- Салкындын бети канап, токтобой жатат! - деди.
Мен шашып үйгө кирдим. Бети кыпкызыл болуп кетиптир. Бетин тазалап дары коюп койдум. Каны акпай бир аз токтогонсуп калды. Ушундай жакшынакай аялын кор кылган Темирланга жиним келди.
- "Байке болду эми, жашабаймын мындан кийин, эптеп таң атырсам үйгө кетемин! "- деп көз жашы төгүлүп кетти. Эмне деп көңүлүн көтөрүүнү билбей турсам, Сезим келип, бетин бинт менен таңып койду.
- Сен ушул жерде жатып ал, мен сыртта силерди караганча жатам, - деген сөзүмө болбой үйүнө кетти. Мен андан санаа тартып уктай албай чыктым.
Түнү уктай албай, башым ооруп, эртеси күнү жумушка бардым. Ал күнү Салкын жумушка келбеди. Кандай таң атырды экен деп ичимден ойлонуп жаттым.
Арадан бир топ күн өттү, Салкын дагы деле жумушка келбеди. Темирлан деле сыртта көрүнбөйт, кечинде чыгып алардын үйүн караймын, чырагы дагы күйбөйт, эмне болгонун түшүнбөй эле калдым.
- Сезим, Темирландар көрүнбөй калдыбы? - дедим.
- Билбеймин, алар жак тынч, көрүнүшбөйт - деди. Болгону жумуш аркылуу сүйлөшүп жүргөн Салкынды көрбөй калып, өзүмчө эле кызык болуп жүрдүм.
Деги ошол күнү тынч таң аттырдыбы, деген ой мени ичимден жеп жатты.
Жумушка барып, короодогу окуяны бир аз унутуп калдым.
Кечинде жумуштан чыгып башка үй караштырдым, ал жерден башка жакка көчпасөк болбойт дедим. Короого кирсем бир коркунучтуу сезим мени курчап, кыйналып жүрдүм.
Үйдүн ээси менен эсептешип, башка жакка кетмей болгонубузду айттым. Сумкаларды алып машинага салып балдарымды отургузуп коюп, үйгө кайра кирдим да Темирландардын үйүнө бардым. Ошончо убакыт бир короодо жашасак дагы үйүнө биринчи жолу баш бактым. Кызык, үйү бош экен, үйүндө көзгө урунган эч нерсе жок экен. "Булар кайда кетти? Качан кетти?" - деп таң калып машинеге жөнөдүм.
Башка үйгө көчүп барсам деле, ичимдеги ойлор мага тынчтык бербеди. "Булар кайда кетти экен? Эч кандай кабар калтырбай ушинтип да кетишип калабы? " - деп түбү жок ойлорго батып жүрдүм. Баари бир качандыр бир жолу кезигишип, же көрүшүп калаарбыз деп өзүмдү алдап койдум.
Салкын ошентип жумушка келбей калды.
Акыры директор күтө бербей, анын ордуна башка кыз алды. Ошону менен Салкын жөнүндө оюм тынчып, жумушка кайрадан берилип иштеп калдым.
Турмушубуз уланып, Аруукени бакчага берип, ал көнгүчө Сезим алып барып жүрдү.
Күндөгүдөй жумушта болчумун, бир убакта "Сизге келишти" деп күзөтчү бала Сезимди ээрчитип кирди. Келинчегимди көрүп чоочуп кеттим, бул кайдан келди деп.
-Кел Сезим, келем деп эрте менен айтпадың, тынчтыкпы? - дедим.
- Тынчтык, жумушуңду көргөнү келдим - деди. Отуруп эки жакты карап койду, сени көңүлүңдү бурбайын, иштесин, бекер отуруп сени көргүм келип келдим эле, мен барайын үйгө, - деп жөнөп калды.
Мен келинчегимди сыртка узатып койдум. Жаңы алган батирим жумушум тарапта болчу, "Зергип отуруп келгенби", - деп ойлодум. Бирок Сезимдин мага айтпай келгенине ойлоно түштүм. Кантсе да эмнеге келгенин үйгө барып билемин деп ишке киришип кеттим.
Арадан күндөр зымырап өтүп жатты, Сезим менен сүйлөшүп отурганыбызда кээде мени ойлуу көздөрү менен карап калат, мындай көз караштарын акыркы күндөрү байкап калдым.
Башкарманын жумушу менен башка жакка барып келсем Тамара кабинетиме келип отуруптур. Мен аны менен жумуш аркылуу гана сүйлөшөмүн, анын кандай ою бар экенин билбеймин: - Эркектердин баары сиздей адамгерчиликтүү, жөнөкөй болсо бардык аялдар бактылуу болмок"- деп калды. Сүйлөшүп отурсак, дагы Сезим келип калды.
- Ии, аялдар менен отуруп иштей турган жумушка кирип алган турбайсынбы! - деп эч нерседен эч нерсе жок Тамараны уруп кирди. Сезимдин мындай мүнөзү бар экенин билчү эмесмин. "Кой" - дегенимди укпай, кабинетим ызы-чуу түшүп калды. Бат эле жумушчулар "Эмне болду?" - деп чуркап келишти. Мен өзүм экөөнү ажыраталбай, ортодо тарткылап жүрөм.
Келип калган жумушчулар Тамараны тартып, кабинетимден алып чыгып кетишти. Асты-үстү болуп сапырылган бөлмөдө Сезим менен калдым.
Мындайды күтпөгөн жаным, жумуштагылардын алдында уят болуп отуруп калдым.
Уландысы бар...
Присоединяйтесь к ОК, чтобы посмотреть больше фото, видео и найти новых друзей.
Нет комментариев