Гоҳида юзлари кулгани билан,
Ҳаёти қувончга тўлгани билан,
Юзидан ғамсиздек юргани билан,
Оталарнинг дарди ичида бўлар.
Болам деб ташвишсиз нафас олмаган,
Рўзғор деб туну кун ишлаб толмаган,
Ўйламанг қалбида армон қолмаган,
Оталарнинг дарди ичида бўлар.
Бир бор оҳ десангиз дили эзилган,
Кўзидан ёш эмас хунлар сизилган,
Жисмидан минг бора жони узилган,
Оталарнинг дарди ичида бўлар.
Жаҳлингиз чиқса гоҳ шайтонлик қилиб,
Кўнглини оғритманг нодонлик қилиб,
Шундоғ ҳам яшагай пинҳон сиқилиб,
Оталарнинг дарди ичида бўлар.
Оқ тушган сочлари ғамдан эмасми?
Кўз ёшин яширган намдан эмасми?
Умрини қаритган камдан эмасми?
Оталарнинг дарди ичида бўлар.
Кексайган чоғида тиргаги бўлинг,
Ҳолидан хабардор сергаги бўлинг,
Бурчингиз бажариб қадрини билинг,
Оталарнинг дарди ичида бўлар.
Ахир ким сизчалик тушунгай уни,
Сиз қолиб ётларга қолмасин куни,
Азизлар илло ҳеч унутманг шуни,
Оталарнинг дарди ичида бўлар.
Гоҳида юзлари кулгани билан,
Ҳаёти қувончга тўлгани билан,
Онангиз ёнида бўлгани билан,
Оталарнинг дарди ичида бўлар.
ОЙБЕК ЗИЁ
Присоединяйтесь к ОК, чтобы посмотреть больше фото, видео и найти новых друзей.
Комментарии 10