Предыдущая публикация
Ишонавер, — бари ёдимда,
Ҳов наридан кулиб турардинг.
«Ўқимайман» дердингу, зимдан,
Хатларимни ёдлаб юрардинг.
Ишонавер, — ҳаммаси мутлоқ,
Хаёлимдан ўтади тинмай.
Севардингу, ёнимдан шундоқ,
Ўтар эдинг назарга илмай.
Севардингу, этмасдинг писанд,
Кўксинг тўла бир дунё ғурур.
Севгисидан ғурури баланд,
Мағрур эдинг, жудаям мағрур.
Кузатишни қўймасдинг бир дам,
Чеккаларда кезардинг ёлғиз.
Тушларимга кирар ҳалиям,
Ўша сулув, ўша мағрур қиз.
Ишонавер, — ёдимда бари,
Бир бошқача кулиб турардинг.
Сўнг сўнгида исмим ёзилган,
Хатларимни ёдлаб юрардинг...
Следующая публикация
Нет комментариев