Світанне над Міёрамі… Трапяткія і чароўныя імгненні прадчування пачатку. Менавіта жыхарам мікрараёна “Усходні” пашчасціла першымі сустракаць нараджэнне кожнага новага дня. Прачніцеся крыху раней і самі ўбачыце, як сонца ўздымаецца з усходу, пакідае пошугі прамянёў на лісцях дрэў, высвечвае сінь і роўнядзь возера, зазірае ў канал паміж бяроз, прабуджае да жыцця ўсё жывое на зямлі. А ў канцы дня, вечарам, вяртайцеся сюды, каб развітацца са стомленасцю, адыходзячым днем і аддзячыць сонцу.
Год таму жыхары мікрараёна “Усходні” горада Міёры пачалі складаную, але цікавую працу па добраўпарадкаванні берага возера "Мядзведак" у рамках мясцовай ініцыятывы "Разам - да вырашэння праблем добраўпарадкавання мікрараёна "Усходні", г. Міёры"
У рамках праекта Разам для грамады і прыроды: Мiёрскi раён, які рэалізуецца пры фінансавай падтрымцы Еўрапейскага саюза, праходзіў конкурс мясцовых ініцыятыў. Кожны жадаючы мог падаць заяўку і прыняць удзел. Ад мікрараёна "Усходні" вырашыў паўдзельнічаць Будзько Іван, дырэктар прыватнай установы “Устойлівыя рашэнні”. Яго ідэя заключалася ў тым, каб аб'яднаць і актывізаваць жыхароў мікрараёна, стварыць месца, дзе ўсе будуць адпачываць разам і вырашаць пытанні і праблемы мікрараёна, тым больш, што "пад бокам" ёсць прыгожае возера, там і вырашана было стварыць парк адпачынку! Амаль што ўсе жыхары мікрараёна праявілі інтарэс і жаданне ўдзельнічаць.
Пачалася складаная справа напісання заяўкі. Усё было спланавана і раскладзена па паліцам: што і дзе будзе размяшчацца, што неабходна купіць і якую справу зрабіць.
Заяўка пададзена, засталося толькі чакаць вынікаў. Усе жыхары мікрараёна “затаілі дыханне”... Колькі ж радасці было, калі даведаліся аб тым, што заяўка прайшла і атрымала фінансавую падтрымку ад Еўрапейскага саюза ў памеры 60 тысяч еўра. З тых пор змянілася многае, ужо нават цяпер складана ўспомніць, як выглядаў бераг возера Мядзведак да пачатку рэалізацыі ініцыятывы, але для гісторыі, мы захавалі фотаздымкі і падзелімся імі з вамі.
З 1 верасня 2020 года пачалася праца. Першым пунктам трэба было правясці інфармацыйную сустрэчу, каб падрабязна пазнаёміць людзей з планамі і прыцягнуць як мага больш жыхароў да ўдзелу ў гэтай агульнай справе. Была створана ініцыятыўная група з самых актыўных жыхароў, якая функцыянавала на працягу рэалізацыі ўсёй ініцыятывы і пасля яе завяршэння.
Працы вельмі многа, але трэба і адпачываць! Галоўнай мэтай ініцыятывы з’яўлялася актывізацыя мясцовага насельніцтва і адным з эфектыўных спосабаў выканная гэтай мэты, стала правядзенне святаў у мікрараёне. Спачатку адзначылі “Дзень маці”, затым Halloween, Масленіцу, ну а 21 жніўня адбылося свята “Дзень Усходняга парку “Мядзведак”. На свята сабралася больш за 200 чалавек, адпачывалі, гуглялі ў конкурсы, спаборнічалі ў касцюміраваны футбол і пускалі мыльныя бурбалкі, а таксама ўзнагароджвалі памятнымі падарункамі з лагатыпам парку, самых актыўных мясцовых жыхароў, якія прымалі ўдзел у стварэнні парку.
Назва парку дарэчы выбрана не выпадкова. Возера, каля якога створана зона адпачынку, мае назву “Мядзведак”, а мікрараён “Усходні”. Назву парка выбіралі ўсім горадам, спачатку атрымалі ад жыхароў розныя варыянты, а потым галасавалі за спадабаўшыйся варыянт. Такім жа чынам выбіралі і лагатып.
Паколькі галоўным на гэтай пляцоўцы з’яўляецца возера, вырашылі аформіць усю зону адпачынку сінім колерам, які дапаўняе і сімвалізуе прыгажосць вады.
Першай гасцей парку сустракае лесвіца з дарогі, эстафету пераймае масток праз канал, перайшоўшы які, мы і трапляем ва “Усходні парк "Мядзведак". Ну а тут і дзіцячая пляцоўка для дзетак рознага ўзросту, і пантонны пірс сіняга колеру, з якога вельмі зручна лавіць рыбу, і сцэна з сінім дахам для правядзення розных мерапрыемстваў, маладзёжная зона з арэлямі, лаўкамі і вогнішчам, абсталяваная зона для пікнікоў, спартыўныя пляцоўкі на розны густ, валейбольная пляцоўка, футбольнае поле, вулічныя трэнажоры і варкаут-комплекс. На спартыўных пляцоўках былі праведзены навучальныя заняткі для мясцовых жыхароў. У парку ўстаноўлена шмат лавак, каб можно было не толькі займацца спортам і гуляць, але і проста адпачываць, атрымліваючы асалоду ад прыроды і свежага паветра. Славутасцю парка з’яўляецца вулічны кінатэатр. А ўпрыгожваюць зону адпачынку расліны і дрэвы, пасаджаныя жыхарамі мікрараёна.
За час рэалізацыі ініцыятывы было праведзена больш за 20 мерапрыемстваў па добраўпарадкаванні тэрыторыі парку, працавалі дарослыя і дзеці. Кожны прыняў вельмі важны ўдзел у гэтай працы, кожны ўнёс свой невялічкі ўклад у гэты парк! І з гэтых невялічкіх частак склаўся унікальны Усходні парк "Мядзведак", які ўсё мы і атрымалі ў падарунак!
Кругазварот сонца ў прыродзе і нашага жыцця, кругазварот дзён і спраў, час бяжыць, ад світання і да заходу, выходзячы з хаты, мы апускаемся ў клопаты і справы , але ёсць месцы, як гэты парк, што мімаволі вяртаюць нас і застаўляюць спыніцца на хвіліну, убачыць сонца, возера, прыроду, тварэнні рук чалавека… Дзеля гэтых хвілін шчасця сюды і хочацца вярнуцца!
P.S.: Мы дзякуем усім, хто прыняў удзел у добраўпарадкаванні парку! Мы дзякуем моцным мужчынам, настойлівым і адказным жанчынам і цудоўным дзеткам, якія нягледзячы на свой юны ўзрост, сумелі ўнесці вялікі ўклад у гэтую агульную справу! Цяпер усім нам дакладна будзе што паведаміць сваім дзецям і ўнукам, сябрам і суседзям, калегам і знаёмым! Цяпер кожны з нас можа сказаць: я будаваў гэты парк і я памятаю, як ўсё пачыналася!
Присоединяйтесь к ОК, чтобы посмотреть больше фото, видео и найти новых друзей.
Комментарии 2