Предыдущая публикация
Тау башыннан авылыма карыйм
Авыл матур- калай капкалар
Тик нигәдер бүген искә төште
Бала- чактагы агач коймалар.
Авыл гадилеген сагынып куйдым
Заман җиле, гафу ит мине
Матур да соң... Тимер капкалар
Йөрәгемә никтер ят инде...
Ник шулайдыр... Үз итмидер
Күңел гадилеккә тартыла
Авыл мичен, чүлмәк бәрәңгесен
Читән коймаларны сагына.
Авыл матур... Әйе, авыл төзек
Һәрбер йортта биек капкалар
Капка артларында яшеренеп
Калды микән әллә ул чаклар.
Олы йозак элгән ишекләргә
Аптырыйлар микән алар да
Без үскәндә келә элеп кенә
Чыгып китә идек өйләрдән.
Өстәлләрдә чыҗлап самавырлар
Көтә иде күршең кергәнне
Эх, үткәннәр, сагындыралар шул
Заман җиле, гафу ит мине...
Рүзилә Гатауллина
Следующая публикация
Нет комментариев