Предыдущая публикация
Унутула бара бизин адатлар....
@@@@@@@@@@@@@@@@
Оьлген бизин аталаны заманы
Оькюртюп абзар тойлар этеген
Той тавушун эшитгенлер алгъасап
Яхшылыкълар ёрамагъа етеген
Аргъанчылар тартып къарнын ярагъан
Къайда аргъан,къумукъ макъам согъагъан?
Теплер къайда,тешилме аз къалагъан?
Накъырасы тюрлю кюйлер къагъагъан
Чатырлар да оьлген ,тюрлю безенген
Къычыртып гелин машинлер гиреген
Чувулдурукъгъа энлер сайлаймай
Шекер тююр мююшюне байланмай
Чувулдурукъ артгъа гелин айланмай
Торлар тартып бетин-юзюн яшырмай
Кёп де сюйсе болсун уллу къайыны
Абур- сый этмеге гьеч алгъасамай..
Гелин энни тойда тёрлерде бола
Торламасыз сав залны барлап ала
Кирпиклерин эдеп учун тюшюрмей
Ону да гьеч уллулар эрши гёрмей
Тийишли деп тахчагъа олтурталар
Арты булан башын сёйлеп алалар
Шу кююнде бар адатланы бузуп
Эдепсизликге эркин ёл ачалар
Къардашлар тезден унутгъан,парахат
Алдырыкъ тагъып къуллукъ...о ёкъ зат
Анадашларда...тор тастар атыла
Амаллар да къалакъдай галстук тагъа...
Бары къуллукъ тапшурулгъан ятлагъа
Тезден тюкюргенбиз ,биз,адатлагъа
Официантлар тепси тутуп учалар
Той ессилер эркин акъча чачалар....
Гёрмемишлик тойлардагъы о кёп зат
Суратлама сёзюм етмей, нетейим?
Айта турсакъ арты да ёкъ ,ахыры
Къой,сёзюмю аста давам этейим...
Шулай барса тойларыбыз тозулар
Орус кюйде,,вечерлеге"айланар...
Олайда бек осаллаша барагъан
Дос аралыкълар бирден- бир тартылар...
12.07.2019.
ДАЙБАТ А.САЛИХОВА.
с.КОСТЕК.
Следующая публикация
Нет комментариев