Күйөөм эч өзгөргөн жок. Кудум баягыдай, өзгөчө ошол күндөгүдөй.
Күйөөмдүн чоң таенеси каза болду. Ыраматылык токсондун кырын ашып жакшы жашады. Уул-кыздарыны сыйын көрүп, жылуу төшөктө кыйналбай үзүлдү. Айылдагы үй толо эл. Келгендер батпай, бир көчөнүн кошуналары баары тейлешти.
Келиндер кызматтан колубуз бошобойт. Отуруп тамак ичкенге убакыт жок. Бутум чарчап, атүгүл шишип чыкты. Башым май, уйкудан калган көзүмдүн алды капкара. Балдарыма чалып кабар ала элекмин. Дагы жакшы, апама таштап келдим эле, жүрөгүм тынч.
Күйөөм эт бышырып жүргөн. Боорсок ташып баратып карасам, тарелкага эттерди салып, бир чыны шорпо куюп, сарай жакка басып кетти. Кайра келип, эки стул алып, дагы ошол жакка жөнөдү. Кызык болду. Эми биринчи дароо жаман ойлор келет эмеспи. Карап турсам мени карап, кайра ошол жакка басып кетти. Келиндерге мен азыр деген боюнча сарай жакка бет алдым.
Койлор жайлоодо болчу. Акырын барып сарайдын эшигин ачайын десем күйөөм чыга калды. Колумдан тартып ичине алып кирип кетти. Байкушум, стол даярдап мени күтүп отурган экен. “Чарчадың, бас жай отуруп могу этти жеп, шорпону ичип ал. Тиги жеңелер көрсө сени жөн отургузбай, шыбырашат.” Бут кийимимди чечип, бутумдун шишигенин көрүп жаны кейиди. Шорпомду ичип бүткүчө бутумду ушалап отурду.
– Эмнеге сарай?
– Бул жакка эч ким келбейт, сени алаксыбай тынч отурсун дедим. Анан сени менен жалгыз болгум келди. Сен жок тамак деле ичким келбейт экен.
Экөөбүз шашпай отуруп жилик мүлжүдүк. Курсагыбызды кампайтып, бир аз эс алып, анан сарайдан чыктык.
“Көпчүлүктө сага эч ким күйбөйт. Өзүңдү аяп иш кыл. Митаам болсоң кичине.” Бетимден өптү. Экөөбүз эки жакка бурулуп кеттик.
Жымыңдаган боюнча боорсокко жөнөдүм. Ыраазы болдум десем жетишсиз. Могу жүрөгүм башкача сого баштады.
Азыр дагы ошол күндөгүдөй камкор. Эч өзгөргөн жок. “Өзүңдү аясаңчы” деп эле басып жүрөт. Сыртыман билгизбегеним менен аябай сүйүнөм. Таң эрте туруп алып күйөөмдү карап жата берем. Мага берген сүйүүсү, сыйы үчүн чексиз бактылуумун. Аны канчалык сүйөрүмдү айтпасам деле түшүнүктүү болсо керек.
Присоединяйтесь к ОК, чтобы посмотреть больше фото, видео и найти новых друзей.
Нет комментариев