Кирәк әйберләр:
3 йомырка
якынча 200 г он,
ярты кашык сода,
кашык очында тоз,
1 кашык шикәр комы,
бер аш кашыгы көнбагыш мае.
Һәм пешерү өчен 0,5 л көнбагыш мае.
Әзерләү.
Йомыркаларны 2-3 минут блендерда туглаганнан соң, сода салып, тагын 1 минутлап туглыйбыз. Тоз, шикәр, конбагыш мае кушабыз. Иләнгән он сибә-сибә кашык белән бутыйбыз. Онның күләме бераз үзгәрергә дә мөмкин, чөнки ул йомыркаларның зурлыгына да бәйле. Иң мөһиме - камыр йомшак булырга тиеш, һәм шул ук вакытта агып та тормасын. Ул йомшаграк булса чәк-чәк күпереп пешә һәм уңа.
Камырны ике өлешкә бүлеп, 0,5 см калынлыкта җәябез. Аннан соң, үзеңә нинди зурлыкта һәм озынлыкта кирәк – токмач кискән формада телемләп кисәбез. Камыр ябышмасын өчен киселгән җирен пычак ярдәмендә онлап торырга мөмкин. Пешерергә салыр алдыннан чәк-чәкләрне иләккә салып иләү яхшырак, чөнки пешерә торган майга он күп төшсә, ул артык күбекләнеп китәчәк.
Майны тирән һәм киң савытка салып газга кыздырырга куябыз. Май әзерме-юкмы икәнен белү өчен 1-2 чәк-чәк салып тикшереп карарга була. Чәк-чәкләр төшеп майга баткач, 3-4 секунд эчендә өскә калкып чыгарга тиеш. Сүрән утка пешерергә куябыз. Әгәр артык кызу булса, чәк-чәк кабарып шартлый башлый. Чәк-чәкне майга салгач, алар өскә калкып чыгу белән савытны ике яктан тотып болгата башларга. Чәк-чәк чайкалып майга күмелә һәм тигез матур булып кабарып пешә. Кемгә ничек уңайлы - зур кашык белән дә болгатып торырга була. Тәмлекәчләр алтынсу төскә кергәч тә, шумовка белән майдан җыеп алырга кирәк.
Икенче өлешен пешерә башлар алдыннан май савытын 1-2 минутка ут өстеннән алып суытып торырга киңәш ителә.
Чәк-чәк уңсын өчен тик яңа салынган йомыркаларны гына алырга кирәк. Пешерер алдыннан аларны туңдырып алырга кирәк.
Ширбәтне болай ясарга: 3 стакан шикәр комына 1 стакан су һәм 600 г бал салырга. Пешкән чәкчәкне табакка бушатып, өстеннән ширбәт агызалар, һәм кулны салкын суга манып ала-ала, матур итеп тәлинкәләргә өяләр.
Фотосурәттәге чәк-чәк 8 йомыркадан ясалды.
Присоединяйтесь к ОК, чтобы посмотреть больше фото, видео и найти новых друзей.
Нет комментариев