Дога кылам, әй Рәхмәтле Раббым!
Сиңа булсын бар мактауларым!
Кыен чакта миңа хәерлесе
Тик Синнән булсын яклауларның.
Дога кылам әткәм-әнкәм өчен,
Нигездән чыккан әрвахларга,
Дога кылам барча күршеләргә
Бәхилсез китеп барганнарга.
Дога кылам әби-бабайларга,
Вафат булган ир туганнарга,
Вафат булган кыз туганнарга дә,
Туганлык җебе булганнарга.
Дога кылам авыл зиратында
Искә дә алынмаганнарга,
Дога кылам авырлык күргәнгә,
Авырлык кагылмаганнарга.
Дога кылам таныш булганнарга,
Кылам таныш булмаганнарга,
Изгелеге тулып ашканнарга,
Саваплары тулмаганнарга.
Дога кылам вафат булганнарга,
Дога кылам исәннәргә дә,
Язмышлары иркәләгәннәргә,
Язмыш җиле кискәннәргә дә.
Дога кылам юлдагыларга да,
Дога кылам өйдәгеләргә,
Тормышлары көйсезләнгәннәргә,
Тормышлары көйдәгеләргә.
Дога кылам йортымдагыларга,
Дога кылам читтәгеләргә,
Дога кылам күңел дәфтәремдә
Иң беренче биттәгеләргә.
Дога кылам диндәшләргә дә мин,
Күпне күргән милләттәшләргә,
Дога кылам барча туганнарга,
Күп сыналган дус-иптәшләргә.
Дога кылам барлык халыкларга,
Дога кылам Җирнең шарына,
Дога кылам яуган яңгырына,
Дога кылам ап-ак карына.
Дога кылам, кылган догаларга
Барчагыз да анда сыясыз;
Минем шушы ихлас догаларны
Кабул ит Син Раббым риясыз.
Мәүлит Шакиров.
Присоединяйтесь к ОК, чтобы посмотреть больше фото, видео и найти новых друзей.
Нет комментариев