Предыдущая публикация
ЙОНДОҘ ЮЛЫ /Вәсилә Фәттәхова иҫтәлегенә/
Шишмә булып аҡты күҙ йәштәре
Һинең үлемеңде ишеткәс,
Йырҙарыңды халыҡ бик яратып
Бик үҙ итеп йырлап йөрөткәс.
Бар халыҡты зар илатып һылыу,
Мәңгелеккә таба атланың,
Һуңлап ҡына тапҡан бәхетеңде
Йөрәк түрҙәрендә һаҡланың..
Иртә өҙөлһә лә ғүмеркәйең
Халыҡ күңелендә йәшәрһең,
Йырҙарыңда беҙҙең күңелдәрҙә
Яҙғы йәшен кеүек йәшнәрһең.
Үҫкән саҡта тормош наҙламаған
Эскәнһең һин әсе һурпаһын,
Яуланың тырышлыҡ , һәләт менән
Халыҡ һөйөүөнөң уртаһын.
Гүйә ҡапыл күктә эҙ ҡалдырып
Сағыу йондоҙ ергә атылды,
Ошо йондоҙҡайҙың арттарынан
Һыҙылып бер яҡты эҙ ҡалды.
Ғүмереңде үҙ йырҙарың менән
Мәңге үлмәҫ матур йыр иттең,
Тормош һөйөүөңдө моңдарыңда
Васыяттар итеп һин киттең.
Урынҡайың булһын йәннәттәрҙең
Һигеҙенсе бейек ҡатында,
Онотолмаҫ һинең йыр-моңдарың
Һине һөйгән тыуған халҡыңда.
Фәүзиә Ҡотлогилдина – АЛТЫНБИКӘ
27.01.2016
Следующая публикация
Нет комментариев