Предыдущая публикация
Ғофил манишин, бин, ки азизон ҳама рафтанд,
Аз дори фано силсиладорон ҳама рафтанд.
Ковуси Каю Қайсару шоҳон ҳама рафтанд,
Искандару Ҷамшеду Сулаймон ҳама рафтанд,
Аз гулшани ин даҳр ҳазорон ҳама рафтанд.
Домоди Муҳаммад, ки Алӣ Шери Худо буд,
Ӯ сайқали дилҳои ҳама аҳли сафо буд.
Ӯ шавҳари Фотимаву ҳам кони сахо буд,
Ин исми бузургӣ зи самак то ба само буд,
Пайғамбари мо, ҷумла Имомон ҳама рафтанд.
Пеш аз ҳама омад ба ҷаҳон Одаму Ҳавво,
Ку Юсуфу Яъқубу куҷо рафт Зулайхо?
Ку Лайливу Маҷнуни ватан карда ба саҳро?
Ку Хусраву Ширину куҷо Вомиқу Узро?
Аз ҷаври фалак чокгиребон ҳама рафтанд.
Ҷибрили Амин пайки Ҷаҳон Ҳазрати Довар,
Овард бар он шоҳи Наҷаф теғи чу Аждар,
Аз Қоф ба то Қофи Ҷаҳон карда мусаххар,
Кандан ба ду ангушт дари қалъаи Хайбар,
Ку соҳиби Дулдул, ки саворон ҳама рафтанд.
Мӯсо ба сари Тур баромад, ба куҷо шуд?
Он Исии Марям зи Замин сӯйи само шуд,
Идрис ба ҳурон зи пайи вирду дуо шуд,
Ёрон ҳама рафтанду дигар навбати мо шуд,
К-аз боғи Ҷаҳон лолаузорон ҳама рафтанд.
Мазлумаму бечораву фарёдрасе нест,
Як мӯнису як ҳамдаму як ҳамнафасе нест,
Аз будани ин куҳнаҷаҳонам ҳавасе нест,
Ҷуз зоти Худованд маро ҳеч касе нест,
Печида сару дидаи гирён ҳама рафтанд.
Ногоҳ биёранд яке маркаби чӯбин,
Ӯро на сару пову лаҷом асту на ҳам зин,
Бо ҳукми Худованд бигӯянд, ки: «Биншин».
Аз рӯзи азал кард Худо қисмати мо ин,
Бархезу равон шав, ки саворон ҳама рафтанд.
Гаштем дар ин даҳр ба бӯстону чаманҳо,
Дидем, ки бишкуфта чу садбаргу суманҳо,
Шаккарлабу ширинсухану пистадаҳанҳо,
Андар лаҳади танг бирафтанд зи дунё,
Бо ҳасрату андуҳу пурармон ҳама рафтанд.
Ин коху саро мешавад охир ҳама вайрон,
Ҳар ҷон, ки бувад, мешавад охир ҳама беҷон,
На деву парӣ монаду на ваҳшиву тайрон,
На шоҳу гадо монаду на пайку на султон,
Ҷуз зоти Худо монаду ҷонон ҳама рафтанд.
Ин синаи решам ҳадафи тири қазо кард,
Фарзанду бародар зи мани хаста ҷудо кард,
Ҳар шоҳу гадо буд, ки филҷумла адо кард.
Бар ҳолати Муҳйӣ бинигар, чарх чиҳо кард,
Афсӯс, ки танҳояму ёрон ҳама рафтанд!
✍️Муҳйии Қӯқандӣ.
Следующая публикация
Комментарии 11