Суғд вилоятининг Деваштич ноҳияси азалдан қишлоқ хӯжалиги маҳсулотлари, хусусан, картошка ва зотли чорва етиштириш бӯйича яхши кӯрсатгичларга эришиб келган.
Сӯнгги йилларда Тинчлик ва миллий бирлик асосчиси-Миллат пешвоси, Тожикистон Республикаси Президенти муҳтарам Эмомали Раҳмоннинг ноҳия иқтисодий ва ижтимоий салоҳиятини янада ошириш тӯғрисидаги кӯрсатма ва топшириқларини ҳаётга татбиқ этишда арзирли ишлар қилинаётганлиги қувонарли ҳолдир.
Бугунги кунда ноҳия раиси Ашурали Жалилзода бошчилигида амалга оширилаётган ободончилик ва бунёдкорлик ишлари ӯз самарасини бермоқда. Албатта, бундай ишларни бажаришда ноҳия раиси билан елкама-елка туриб меҳнат қилаётган, қимматли маслаҳатларини аямайдиган фахрийларнинг ҳам арзирли ҳиссаси бор.
Аслида, Деваштич ноҳиясида ӯз касбини улуғлаб, нафақат ноҳия, балки республикамиз тараққиёти учун муносиб ҳисса қӯшган таниқли шахслар жуда кӯп. Уларнинг ҳар бири тӯғрисида соатлаб ёзсанг ҳам вақт етмаса керак, менимча.
Жамият равнақи, халқ фаровонлиги йӯлида самарали меҳнат қилган шундай кишилар доимо эл олқишига сазоввор бӯлган.
Зарнисор (олдинги пастки Янгиариқ) қишлоғидан бӯлган Ҳомиджон ота Жабборов ҳам ноҳиянинг таниқли ва улуғвор шахсларидан биридир.
Ҳомиджон ота 1942 йилнинг 21 июнида Ғазантерак қишлоқ советига қарашли пастки Янгиариқ қишлоғида туғилган. Отаси Жаббор Орзубоев ӯзининг ҳалол меҳнати билан эл олдида яхши обрӯ ва эътиборга эга кишилардан эди. У киши 1944 йилдан 1947 йилгача Мужун қишлоқ совети раиси вазифасини бажарган. Ҳозирги кунда Мужун қишлоқ жамоати идорасининг жамоат фахрийлар бурчагида Жаббор Орзубоевнинг ҳам расми ӯрин олган. Жаббор ота оилада фарзандлар тарбиясига жиддий эътибор қаратар, фарзандларини ҳам меҳнат қилиб шон топишга ундар эди. Оилада яхши тарбия кӯрган фарзандлар ота орзусидагидек инсон бӯлиб етишиш мақсадида улғаяр эди. Фарзандлар Музаффар, Ғафур, Норинисо ва Ҳомид Жаббор ота ният қилгандек эл корига ярайдиган мутахассис бӯлди. Ҳомид Жабборов қишлоғидаги 13-ӯрта мактабнинг еттинчи синифини тугатиб, 1958 йилда ӯқишини Ғончи шаҳарчасидаги И.В. Сталин номидаги 1-ӯрта мактабда давом эттирди. У киши шу мактабда 10 синфни «аъло» баҳолар билан тугатишга мушарраф бӯлади.
Ёшлигидан билимга чанқоқ бӯлган Ҳ.Жабборов олий маълумотли касб эгаси бӯлиб, халқ хӯжалигида муносиб ӯрин топишни чин дилдан орзу қилади. Аммо ӯша кезларда совхоз далаларида иш қизғин, ишчи сони етишмас, қӯлидан иш келадиган инсон борки, ҳаммаси деҳқончиликка шӯнғиб кетганди. Ҳомиджон Жабборов ҳам ӯша даврдаги Крупская совхозида меҳнат қилди. Даштда деҳқонлар билан баробар ишлади, чорвадорларга ёрдам қилди.
Ӯша пайтларда чорва парвариши жуда нозик эди, чунки янги фермалар ташкил этилиб, зотли моллар сонини кӯпайтириш масалалари режалаштирилганди. Янги келтирилган моллар ноҳия иқлимига кӯпам мослашавермасди. Бунинг учун эса етакчи мутахассислар етишмаслиги каби муаммолар бор эди.
Ҳомид Жабборов ӯша кезларда чорвачилик соҳаси бӯйича мутахассис бӯлишни орзу қилди ва бу орзулар уни Душанбе шаҳридаги Тожикистон Республикаси Қишлоқ хӯжалиги институти сари етаклади.
1962 йилда мазкур институтнинг талабаси бӯлиш шарафи насиб қилди. Қишлоқдан чиққан билимга чанқоқ талаба тез кунда устозлар меҳрини қозона бошлади. Устозларнинг маърузаларини диққат билан тинглар, берилган топшириқларни ӯз вақтида бажариб, гуруҳнинг кӯзга кӯринган талабасига айланди. Ҳарбий хизматни ӯташ ҳар бир йигитнинг муқаддас бурчи ҳисобланади.
Ҳ.Жабборов олий ӯқув юртининг иккинчи босқичида ӯқиб юрган кезлари талабаларни Панж ноҳиясига пахта теримига олиб боришади. Бироз муддат ӯтгач, уларни Душанбе шаҳрига яна олиб келишади ва 1964 йилда Ҳ.Жабборов уч йил Шимолий Кавказ ҳарбий округига қарашли 26265, 19119 ва 17908-ҳарбий қисмларда йигитлик бурчини ӯтади.
1968 йилда ҳарбий хизматдан қайтиб, Тожикистон Республикаси қишлоқ хӯжалиги институтининг ветеринар факултетида ӯқишини давом эттиради. 1972 йилда олий маълумотли ветврач ихтисослигини олиб, туғилиб ӯсган жонажон қишлоғи - Янгиариқдаги Крупская совхозида бош ветеринар-духтур сифатида иш бошлайди.
Деваштич (Ғончи) ноҳиясида чорвачиликни ривожлантириш, янги наслчилик фермалари ташкил этиш учун қӯшимча талаблар ошган эди. Айни ӯша пайтларда ноҳиядаги фермаларга Ҳомиджон Жабборовга ӯхшаган малакали мутахассислар жуда зарур эди.
Яхши билимга эга бу мутахассисдан ӯз вақтида нафақат ноҳиядаги бошқа фермалар раҳбарлари, балки қӯшни шаҳар ва ноҳиялардагилар ҳам маслаҳатлар олиб турарди. Ноҳиянинг қайси колхоз ёки совхозидаги фермаси оқсаётган бӯлса, албатта, Ҳ.Жабборовни ӯша ерга жӯнатишарди.
Шундай қилиб, 1975 йилда уни ноҳиядаги Қалъаи Дӯст номли совхозга бош ветеринар сифатида ишга жӯнатишади. Чунки бу совхоз чорваси юқумли бурцеллёз ва туберкулёз касаллигига чалинган бӯлиб, агар ӯз вақтида олди олинмаса, совхоз жиддий зарар кӯриши мумкин эди.
Ҳомид Жабборов бор билим ва малакасини ишга солиб, чорвани бу офатдан сақлаб қолиш учун тинмай меҳнат қилди. Кӯп оқшомларни уйқусиз ӯтказди. Олийгоҳда таълим берган устозлари, соҳанинг етук олимларидан керакли маслаҳатлар олди, из ланди ва чинакам меҳнат ӯз самарасини берди. Натижада Қалъаи Дӯст номли совхоз чорваси талофотдан сақлаб қолинди.
Шундай қилиб, Ҳ.Жабборов деярли ноҳиянинг ӯндан ортиқ колхоз ва совхозларида, ноҳия қишлоқ хӯжалиги бошқармасида бош ветеренар бӯлиб, самарали фаолият юритди. Бир неча йил Крупская совхозида партия бош котиби лавозимида ҳам ишлади.
Ҳомид ота ӯша даврларни кӯз олдига келтирар экан, чеҳрасида гоҳ шодон, гоҳ маъюслик ҳислари номоён бӯлиб турарди.
-Қийин даврлар эди. Битта чорва талофоти учун, албатта, бош ветеринар жавоб берарди. Мутахассислар етишмаслиги учун фермаларда йӯқотишлар бӯлиб турар эди. Бор имконият билан ишга ёндашар эдик. Кӯплаб ютуқларни қӯлга киритдик. Аммо «шоли курмаксиз бӯлмайди» деганидек, ютуқларимизни кӯролмайдиганлар ҳам йӯқ эмасди. Баъзи ғаразли ниятда бӯлганлар оёғимизга болта уришга, ишимизни орқага тортишга ҳаракат қилишарди. Нима бӯлганда ҳам чин қалбдан ӯз касбимга содиқ қолдим.
1984 йилнинг ноябр ойида Крупская совхози директори Муҳаббат Турсунованинг топшириғи билан зотли ғунажинлар олиб келиш учун Украинанинг Ровно вилоятига бордим. ӯша ерда бирдан соғлигим ёмонлашди. Касалхонага олиб кетишди. Шифокорлар инфаркт ташхисини қӯйишди.
Шифокорларнинг саъй-ҳаракатлари, олиб борган тезкор даво амалиётлари сабабли соғлигим тикланди. Аммо духтирлар ҳали оғир меҳнат мумкин эмаслигини уқтиришига қарамасдан, зиммамга юклатилган вазифани бажаришим шарт эди. Аллоҳга беадад шукурлар бӯлсин, менга куч-қувват ато этди. Украинадан 200 бош зотли ғунажин олиб келиб, совхозга топширдим, -дейди Ҳ.Жабборов биз билан суҳбатда.
-Ҳомид ака олийгоҳни битириб келганида Қалъаи Дӯст совхози майда молларга ихтисослаштирилган давлат хӯжалигига айлантирилган эди. Шунинг учун, Ҳомид ака бошқа мутахассислар билан бирга, шу хӯжаликка ишга юборилди. Хӯжалик моллари ӯн минг бошдан ортиқ бӯлиб, чорва касалликларига озгина эътиборсиз бӯлса, қисқа муддатда минглаб молларни бой бериш мумкин эди. Бунинг учун ҳар бир мутахасисдан чуқур билим ва етук қобилият талаб қилинади. Ҳомид Жабборов ӯз вазифасини уддаларди, чорвадорларнинг маслаҳатгӯйи эди. У кишининг тинимсиз меҳ- нати эвазига совхоз фермаси яхшигина ривожланди. Бунинг учун Ҳомид ака ӯнлаб Ифтихорнома ва бир қатор кӯкрак нишонлари билан тақдирланди, -дейди кӯп йиллар ноҳия ветеренария станцияси бош ветеринари вазифасида ишлаган Бобоҳасан Зарипов.
-Ҳомид Жабборов билан бир олийгоҳда таҳсил олдим. Курсдошим Ҳомид ака яхши тарбияга эга ва билимга чанқоқлиги билан бошқалардан ажралиб турарди. Кӯплаб ташаббусларга ӯзи етакчилик қиларди. Чунки у биздан ёши каттароқ ва ҳарбий хизматни ӯтаб қайтган эди. Ӯз касбининг етук мутахассиси бӯлиш учун тинимсиз ӯқирди, изланарди. Олийгоҳда уни ҳаммамиз ҳурмат қилардик. Устозларимиз ҳам Ҳомид акага алоҳида меҳр билан эътибор қаратарди. Олийгоҳда Комсомол комитети (Ёшлар иттифоқи) котиби эди. Институтни тугатгач, ҳаммамиз халқ хӯжалигининг турли соҳаларига шӯнғиб кетдик. Мен илмий иш қилиш мақсадида пойтахт-Душанбеда қолдим. Ҳомид ака Ғончида чорвачилик соҳасини ривожлантиришга астойдил бел боғлади. Тез-тез хабарлашиб турар, соҳага доир фикрлар билан маслаҳатларимизни олишга ҳаракат қиларди. Мен бугун жамиятимиз равнақига арзирли ҳисса қӯшган курсдошим Ҳомид ака билан фахрланаман, -дейди Панжакентлик қишлоқ хӯжалиги фанлари номзоди, профессор Аҳрор Ӯтамуродов.
Ҳомид Жабборов бугун фарзандлар ва набиралар оғушида қарилик гаштини сурмоқда. Улуғ ёшда бӯлишига қарамай, ҳали тетик. Ёшларга ӯзининг қимматли маслаҳатларини беришдан чарчамайди.
Ӯғли Маҳмудбой ва набираси Маратжон ҳамиша отанинг хизматида бӯлиб, дуоларини олиб юришибди. Ота Маратжонга алоҳида меҳр қӯйган, унинг ҳам юрт тараққиётига ҳисса қӯшиб, етук инсон бӯлишини чин дилдан орзу қилади. Маратжон ҳам бобосининг дуоларини олиб кам бӯлмади. Олийгоҳни тугатиб, бир неча йил Деваштич ноҳияси давлат ҳокимияти ижроия органида масъул вазифаларда меҳнат қилди. Айни пайтда Деваштич ноҳиясидаги «Имон Интернешнл» ЁҲЖ ташкилоти банкида етакчи мутахассис сифатида фаолият юритмоқда.
Яқинда Ҳомиджон Жабборов қутлуғ 82 ёшни қарши олади. Отага мустаҳ- кам соғлик тилаб, фарзандлар ва набираларининг дуогӯйи бӯлиб юришларини тилаб қоламиз.
Облоқул МУСОЕВ,
Тожикистон журналистлар иттифоқи аъзоси, Матбуот аълочиси.
P.S: ХАЛҚ ОВОЗИ газетасининг 2024 йил 20 июн №25 (20392) сонида чоп булган.
Нет комментариев