ТАҒЫН АУЫЛЫМА БАРЫП ШАТЛАНЫП ҠАЙТТЫМ.
Мәктәптең 125 йыллығына һәм Көҙән урта мәктәбенең беренсе сығарылышының 50 йыллыҡ юбилейенә бағышланған сара булды, “Һаумыһығыҙ, һабаҡташтар” тип атала. Был ике юбилей күңелдә күп эҙ ҡалдырырлыҡ итеп ойошторолған.
Быйылғы сығарылыш уҡыусылары һәм 50 йыл элек мәктәпте бөткәндәрҙең сәхнәлә осрашыуы,уларға тантаналы рәүештә өлгөргәнлек аттестаты тапшырыуҙары бигерәк тулҡынландырҙы, йәш саҡтар иҫкә төштө.
Байрам сараһы килгән ҡунаҡтарҙың сығыштары һәм концерт номерҙары менән үрелеп барҙы. Артабан байрам мәктәп буйлап экскурсия һәм сәй табыны алдында дауам итте.
Ошо саралағы сығыштарҙа ишеткән мәғлүмәттәрҙән бераҙ иҫтә ҡалған мәктәп тарихын яҙмай булмай.
Көҙән мәктәбен нигеҙләү йылы тип 1893 йыл һанала. Иң беренсе уҡытыусы Бохара яҡтарынан йүнәлеш менән килгән Әхмәтвәли Таипов булған. Әхмәтшә ишан (З.Вәлиҙиҙең атаһы) менән улар икәүләп уҡытыу эштәрен яңаса ойошторалар, элекке дин дәреҫтәренә ҡушып математика, рус теле, әхлаҡ, тарих һәм башҡа фәндәр индерәләр. Улар икеһе лә ҙур белемле булып,ғәрәп , фарсы, рус телдәрендә яҡшы һөйләшкәндәр. Әхмәтшә бабайға ишанлыҡҡа танытманы күренекле дин әһеле Зайнулла Рәсүлев үҙе биргән. Был ике ғалим Ризаитдин Фахретдин һәм Зәйнулла ишан менән осрашып торғандар. Ул ваҡыт ауылда ике мәҙрәсәлә бер юлы 200-250 шәкерт уҡыған. Көҙән балалары ғына түгел, ә тирә яҡ ауылдарҙан да, хатта ераҡтарҙан килеп ятаҡта ятып уҡығандар. Уҡыусылар ниндәй юғары кимәлдәге белем алғандар! Яңыраҡ “Ағиҙел” журналында (№№ 8,9,10.2017.) Ямаштан (Бөрйән) бөтә тирә яҡҡа танылған табип -мулла, мөғжизәләр эйәһе, дин әһеле Уйылдан мулла тураһыда Шагура Ахмәдиеваның китабынан өҙөктәр уҡыным. Баҡтиһәң, ул шул беҙҙең мәҙрәсәлә белем алған икән. Тағын кемдәр булғандыр, билдәһеҙ. Әйткәндәй, минең әсәйем дә Әхмәтша бабайҙың ҡыҙы Сара апай менән бергә шул мәдрәсәлә уҡығандар, шуғалыр ҙа күп белгән булған икән...
Присоединяйтесь к ОК, чтобы посмотреть больше фото, видео и найти новых друзей.
Нет комментариев