«Зонæм, чындзæхсæвмæ вæййы хонæг, зианы фæдыл хъæргæнæг æмæ уæд марды иннæ кæндтæм та?» — фарстæуыд мæ телефонæй.
Раст у: хонæг вæййы чындзæхсæвмæ, куывдмæ æрбацæуыны тыххæй — хъусынгæнæг. Хонæг дын хъуамæ дæ хæдзары дуар бахойа æмæ дæ афтæмæй фæхона. Афтæ уыд раздæр. Дæ хæдзармæ хонæджы æрбацыд кадджын хуынд уыд, йæ æгъдау фылдæр уыд, æмæ фысымы æфсæрмы æппæрста: нæ ацæуын æм худинаг каст. Æнæнхъæлæджы фембæлды рæстæг хонæджы фыдæбон адæм ницæмæ дардтой. Зæрдиагæй мæ куы хуыдтаиккой, уæд мæм мæ хæдзармæ æрбарвыстаиккой, зæгъгæ-иу, загътой.
Алчи йæхицæн кад кæнын зыдта. Ныр та æнæхуынд уазджытыл дæр фембæлæн вæййы чындзæхсæвы, куывды. Ахæмты раздæр хъæмпхортæ хуыдтой. Ома, чындзæхсæвы, куывды цы минас фæкæнынц, уый æгъдауыл нæ вæййы, хъæмп цъæх хосæй куыд хицæн кæны, афтæ сын у æнады хæрд, фарсыл нæ хæцæн.
Зиан куы æрцæуы, адæймаджы зиан, уæд адæмæн фехъусын кæны хъæргæнæг. Хъæргæнæг цæмæн хуыйны? Хæхбæсты чысыл хъæуты-иу, æвæццæгæн, исчи куы амард, уæд-иу хæдзари-хæдзар нæ зылдысты, фæлæ-иу фидиуæг йæ бæрзонд фидиуæн бынатæй æнæхъæн хъæубæстæн дæр хъæрæй фехъусын кодта хабар. Цинмæ дæм хонæг куы нæ уа, уæд нæ цæуыс, искæмæй йæ куы фехъусай, уæд дæр. Худинаг у. Хионы, зонгæйы зианы хабар хъæргæнæгæй нæ, фæлæ цыфæнды æмæ куыдфæнды уавæры дæр куы фехъусай, уæд дын æнæцæугæ нæй. Нæ ацæуын худинаг у.
Уый зианæвæрæн бон. Иннæ кæндтыты дæм хабар куы нæ уа, уæд дын цæуын не ‘мбæлы. Уымæн æмæ зианджынтæ сæ фадатмæ гæсгæ æрæвæрынц хисты фынг, иннæмæй та æгъдаумæ гæсгæ дæр мардæн йæ боны фæстæ кæндтæ вæййынц къаддæртæ, æмæ бирæ адæммæ хъуамæ ма фæхабар кæной. Хабар та дын чи хъуамæ фехъусын кæна? Зианджынтæ кæмæн бабар кодтой, уыцы бæрнон адæймаг. Хонгæ та йæ кæнæм Хабаргæнæг.
Цгъойты Хазби - «ÆГЪДАУ — ЦАРДЫ МИДИС»
Присоединяйтесь к ОК, чтобы посмотреть больше фото, видео и найти новых друзей.
Комментарии 1