Предыдущая публикация
Презентація книгы Александра Хуста "СОКОТІМ СВУЙ ЯЗЫК"
10 марта у конференцзалі Центру культур національних меншин Закарпатя выдбыла ся презентація книжкы Александра Купара «Сокотім свуй язык». Орґанізатор мироприятя Микола Бобинець – голова Крайого общества подкарпатськых русинов.
На презентацію были закликані: Митро Поп – русинськый лінґвіста, товмач, голова Русинського научно-просвітницького общества, член правліня Русинського літературно-културного общества Михаїл Завадяк – русинськый културный діятель, Иван Кушір – голова Свалявського общества подкарпатськых русинов, Михаїл Белень – русинськый културный діятель, академік, знаный скульптор,
Иван Бинячовськый – русинськый поет, член правліня Русинського літературно-културного общества (быв. Союз русинських писателюв Закарпатя), Мигаль Чикивдя – русинськый поет и публіцист, секретар Русинського літературно-културного общества, Василь Маровді – знаный подкарпатськый културный діятель, декламант русинськōй поезії, Микола Поцко – знаный фотохудожник и другі.
Микола Бобинець зачав мироприятя. Голова Крайового общества говорив за Александра Хуста тай його заслугы перед русинськым народом. По вступнōму слōву Микола Миколайович представив проґраму презентації и передав слово Ивану Бинячовському, котрый зачав презентацію.
Иван Иванович зачитав передслово книжкы «Сокотім свуй язык» и прӯйшōв ся по єї рōздїлам. Много розказовав про Александра Хуста, автора сьої книжкы. Читаво говорив за заслугы сього знаного прозаїка тай архітектора По бисіді за книжку, Иван Иванович пӯднимав много важних тем, ги важность літературных премій діля русинського двиганя тай розвōю языка. Бинячōвськый твердо повів, ож пӯдкарпатські поеты мавут бӯльше писати на материнськӯй бисіді. А тōму, русинськым діятелям Пӯдкарпатя треба стимульовати молодых писателюв занимати ся літературным трудом. Мараморошськый поет пӯднимав тему діалектӯв тай гōвōрӯв русинського языка тай про важность всокоченя фонетичного аспекта в бисіді.
На останок Иван Иванович розказав за рōбōту Русинського літературно-културного общества, котроє на даный час находит ся на етапі реґістрації.
Дальше выступив Митро Поп, котрый книжку Александра Хуста ōцїнив позитивно, айбо в хōді бисіды розказав, ож книжці «Сокоти свуй язык» хыбит фундамент – азбука. Митро Иванович говорив за специфіку русинськых граматик, котрых є дуже много. Пӯднимав тему умлаутӯв, русинськых гōвōрӯв тай русинського языка в цїлōму. Митро Поп розказав за кодифікацїю, як тяжкый и дōвгый процес, де мусит участовати держава. Наводив примір кодифікації русинськых варіантӯв языка у Словакії тай Мадярщині.
По сьому русинськый лінґліста проаналізовав граматику Гарайды, розказав за орфографічный русинськый словник и пӯднимав другі важні, інтересні темы.
Михаїл Завадяк прōдōвжив бисіду за книжку Купаря. Дальше говорив за русинськый язык, котрый треба сокотити, держати ся старого. Завадяк пōвів, ож нам не треба робити круті повороты, а держати ся свого.
Слово надавало ся Михаїлу Беленю тай Чикивді, котрі тоже красно ōцінили книжку Александра Хуста, пӯднимали тему русинськōй бисіды, літературных премій и тд.
На кониць учасникы презентації зробили образчик на памнять.
Фоторепортаж: Миколи Поцка
Тест Мигаля Чикивді.
Следующая публикация
Комментарии 10