Молитвы дня
Тропарь Антипасхи, глас 7
Запечатану гробу, живот от гроба возсиял еси Христе Боже, и дверем заключенным, учеником предстал еси, всех Воскресение: Дух Правый теми обновляя нам, по велицей Твоей милости.
Кондак Антипасхи, глас 8
Любопытною десницею, жизноподательная Твоя ребра Фома испыта Христе Боже: созаключенным бо дверем яко вшел еси, с прочими апостолы вопияше Тебе: Господь еси и Бог мой.
Тропарь апостола Марка, глас 3
Апостоле святый и Евангелисте Марко,/ моли Милостиваго Бога,/ да прегрешений оставление// подаст душам нашим.
Кондак апостола Марка, глас 2
С высоты приим благодать Духа,/ риторская плетения разрушил еси, апостоле,/ и, языки вся уловив, Марко всеславне,/ твоему Владыце привел еси,// Божественное проповедав Евангелие.
Тропарь преподобного Сильвестра Обнорского, глас 6
Иже измлада Христа возлюбив/ и верою к Нему приближся,/ изнурил еси, в пустыни живый, многострадальное тело твое./ Тем, блаженне Сильвестре, со Ангелы ликовствуя,/ моли Христа Бога мир мирови даровати/ и буди помощник верою призывающим тя на помощь/ и чтущим святую память твою.
Кондак преподобного Сильвестра Обнорского, глас 6
Подвигом добрым подвизался еси, преподобне,/ и душу твою, яко жертву чисту и непорочну,/ Духу Святому принеся еси,/ и по смерти твоей стадо твое духовное соблюдавши,/ и в болезнех скоро посещавши./ Темже молим тя, преблаженне:/ с лики преподобных моли Христа Бога,/ да спасет православный христианы/ и подаст людем в мире глубоце устроитися, да зовем ти:/ радуйся, Сильвестре, иноком духовный пастырю и наставниче.
Нет комментариев