Водар свешаскошанай травы,
а ўжо заўтра -- пах духмяны сена!
І нічога больш да галавы
не бярэцца ў гэткіх пераменах.
Не турбуе страт мінулых груз,
не сумуецца па рэштах мараў,
жоўтым колерам зацвіў газбуз,
побач з ім і кабачок да пары.
На пладовых дрэвах дзень ад дня,
высачэзных, што даўно не ў модзе,
рознасортныя, а як радня,
падрастаюць яблыкі -- у згодзе.
Памідораў роўныя рады
з бульбай паспаборнічалі ў росце.
Абы ім хапала ўсім вады
і не лезла пустазелле ў госці.
Можна оды складваць агуркам,
моркве з буракамі і капусце,
але шлю хвалу я двум рукам,
што любую акультураць пустку.
Як прачнуцца з сонцам раніцой,
то падвечар толькі, нібы птушкі,
рукі, акраплёныя расой,
датыкнуцца пёравай падушкі.
Тамара МАЗУР, 10.06.2022
Присоединяйтесь к ОК, чтобы посмотреть больше фото, видео и найти новых друзей.
Комментарии 4