ცაში აჭრილო...
********************************
არწივო! ცაში აჭრილო
სისხლი გდის გულიდანაო,
შვილის ხელიდან დაჭრილო
ზურგიდან დაგცეს დანაო.
ვერ შეძლეს, ვერ დაგაჩოქეს,
ვერ მოგსპეს ფესვიანადო,
გონებით რომ ვერ გაჯობეს
ღალატი ჰპოვეს ხმალადო.
ბუდეს გინგრევენ ჯალათნი
შვილები აგიტირესო,
სხვის თვალში ბეწვს(ა) ხედავენ
თვისაში ვერცა დირესო.
ფრენის სურვილი ჩაგიკლეს
მაგრამ ვერ გკვეთენ ფრთებსაო,
ბარტყები დაგიწიოკეს,
აჯობეს გარე მტერსაო.
დედა აღარ გყავს საბრალოვ,
შვილების გიჭირს რჩენაო.
ყვავ-ყორნებს წრედი შეუკრავთ,
თვალს ცრემლი აღარ შრებაო.
არწივო! ცაში აჭრილო,
შენს ფრთებქვეშ შემიფარეო,
გადახიზნული ბარტყი ვარ
ვერსად ვერ გავიხარეო.
შენი ძლიერი გულმკერდით,
კლდეს ერთად შევეჭიდოთო,
ყველა უძლურს და დავრდომილს
იმედად შევეხიდოთო.
გხედავ და გული მიტირის,
ო, როგორ მინდა შველაო,
იმ ძველ დროებას მივტირი,
ერთად რომ ვიყავთ ყველაო.
არ შეუშინდე სვავების
ბოროტ ზრახვებით მზერასო,
მუდამ შენს გვერდით გვიგულე,
მტერი დაგაკლებს ვერასო.
დრო მოვა, დაგიბრუნდებით
შენ ახლა გინდა შველაო,
დანგრეულ ბუდის შენებას
ერთად დავიწყებთ ყველაო.
მარინა ყიფიანი
09.08.2018
Присоединяйтесь к ОК, чтобы посмотреть больше фото, видео и найти новых друзей.
Нет комментариев