Туган йортка кайту сагышлы
Күңелкәем һаман ышаналмый
Һаман көтә әнкәм җылысын.
Вакыт- дәва дигән булсалар да
Мине дәваламый ахрысы
Торган саен тирәнәя бара
Йөрәгемнең сагыш-ярасы.
Күз яшемне күпме яшерсәм дә
Мөлдерәмә тула күңелем
Аңлыйм да соң...Әйе, аңлыйм да соң
Бу гомерләр мәңге түгелен.
Тик күңелем һаман ышанмый бит
Әнкәй көтә төсле туган йортта
Эх...ул чаклар...ул бәхетле чаклар
Уйларымда гына янга кайта.
Уйларымда гына иркәлиләр
Әнкәемнең йомшак куллары
Моңга чорнап... Сагышларга урап
Тибрәтәләр йөрәк кылларын.
Юк... Сагышларым сары төстә түгел
Алар минем күңелем моңнары
Тибрәтсеннәр, әйдә, йөрәк кылын
Тусын әле моңлы җырларым.
Тусын әле... Күңелем чишмәсенең
Суын авыз итсен туганнар
Әткәй-әнкәемә дога булып барсын
Йөрәгемнән чыккан шушы юллар...
Рүзилә Гатауллина
Присоединяйтесь к ОК, чтобы посмотреть больше фото, видео и найти новых друзей.
Нет комментариев