Вызваленне тэрыторыі Беларусі ад нямецка-фашысцкіх захопнікаў пачалося восенню 1943 г.
23 верасня 1943 г. быў вызвалены першы раённы цэнтр БССР – Камарын, 26 лістапада 1943 г. – першы абласны цэнтр – Гомель.
Задача па правядзенні Калінкавіцка-Мазырскай аперацыі была пастаўлена савецкім камандаваннем 2 студзеня 1944 г., у ходзе яе прадугледжвалася разбіць калінкавіцка–мазырскую групоўку праціўніка, стварыць плацдарм для наступлення ў напрамку Бабруйск – Мінск, часткай сіл – уздоўж р. Прыпяць рухацца на Лунінец.
Калінкавіцкаму чыгуначнаму вузлу, абласному цэнтру – Мазыру – гітлераўскае камандаванне надавала выключнае значэнне. Тут знаходзіліся 9 пяхотных і 2 танкавыя дывізіі, 3 дывізіёны штурмавых гармат, кавалерыйскі полк і іншыя часці.
Калінкавіцка-Мазырская аперацыя праводзілася з 8 студзеня па 8 лютага 1944 г. войскамі левага крыла Беларускага фронту (камандуючы генерал арміі К.К. Ракасоўскі). У ёй удзельнічалі 61-я (генерал-лейтэнант П.А. Бялоў) і 65-я (генерал-лейтэнант П.І. Батаў), 16 паветраная (генерал-палкоўнік С.І. Рудэнка) арміі.
Паводле плана аперацыі, прадугледжвалася авалодаць горадам Калiнкавiчы 10 студзеня, а 11 студзеня 1944 г. вызваліць Мазыр.
У дырэктыве камандуючага фронтам К.К. Ракасоўскага камандуючаму арміі П.А. Бялову адзначалася: “...61-й армии с утра 8.1.44 г. перейти в решительное наступление с задачей: а) силами не менее четырех с. д. при поддержке 6-й артиллерийской дивизии прорвать фронт обороны противника”. 61-й арміі адводзілася галоўная роля ў вызваленні Мазыра.
8 студзеня войскі 65-й арміі пачалі наступленне, перарэзалі чыгунку і шашу Калінкавічы–Жлобін, вызвалілі Даманавічы, абышлі варожую групоўку з поўначы. У гэты ж дзень у 18.00 2-і і 7-ы кавалерыйскія корпусы, якія знаходзіліся ў аператыўным падпарадкаванні 61-й арміі, з праваднікамі-партызанамі выступілі з раёна в. Новая Рудня па двух маршрутах. Да вечара 9.01 войскі, незаўважаныя праціўнікам, дасягнулі зыходнага становішча – раёна вёсак Астражанка, Казіміраўка, Раманаўка.
10 студзеня 2-і і 7-ы кавалерыйскія корпусы сумесна з партызанамі раптоўным ударам авалодалі населенымі пунктамі Астражанка, Скрыгалаў, Белая, Слабада, перарэзаўшы палепшаную грунтовую дарогу Мазыр–Петрыкаў. Праціўнік быў прыціснуты да Прыпяці.
11.01 гітлераўцы былі выбіты з населеных пунктаў Мерабеля, Прудок, Загорыны, ст. Мазыр, Замошша, Горка, Убарцкая Рудня і іншыя. Але вызваліць абласны цэнтр у гэты дзень войскі Чырвонай Арміі не здолелі. Гэта было звязана з упартым супрацiўленнем ворага, складанымі ўмовамі надвор’я, вялiкiмі стратамі Чырвонай Арміі. Нашы войскi не змаглi стварыць перавагi ў жывой сiле i матэрыяльных сродках на галоўных напрамках. У складзе 61-й apмii на Мазырскiм напрамку не было танкавых часцей. Адзiная 68-я танкавая брыгада, якая дзейнiчала на Калiнкавiцкiм напрамку, не была поўнасцю ўкамплектавана і несла сур'ёзныя страты. Не хапала боепрыпасаў, гаручага. Вораг кiнyў супраць наступаючых часцей Чырвонай Армii значныя рэзервы. Злучэннi войск, якiя ўдзельнічалі ў Калiнкавiцка-Мазырскай аперацыi, атрымалi папаўненне з мабiлiзаваных у армiю жыхароў Чарнiгаўшчыны i першых вызваленых раёнаў Гомельскай і Палескай абласцей. Навабранцы не мелі вайсковай падрыхтоўкі і шмат хто з іх загінуў у першай сутычцы з ворагам.
Вызначаныя тэрміны Калінкавіцка-Мазырскай аперацыі не вытрымліваліся. Нашы войскі не змаглі арганізаваць перавагу ў жывой сіле і матэрыяльных сродках на галоўных напрамках. У той жа час гітлераўцы стварылі ў Мазыры і на подступах да яго сістэму абароны з міннымі палямі, драцянымі загародамі, вялікай колькасцю дотаў, дзотаў і траншэй. У сувязі з гэтым камандуючы фронтам загадаў: “Войскам 61-й армии, стремительно преследуя противника... 13.1.44 г. занять гг. Калинковичи и Мозырь” [13, c. 291]. Перад камандзiрам 9-га стралковага корпуса была пастаўлена задача: 13 студзеня вызвалiць Калiнкавiчы i перакiнyць адну дывiзiю ў раён Мазыра, а камандзiру 415-й дывiзii – цалкам авалодаць абласным цэнтрам да 22.00 13 студзеня.
13.01 на загад камандзіра 7-га корпуса 1-ы партызанскі атрад Мазырскай брыгады фарсіраваў раку Прыпяць і ўзарваў на рацэ Іпа чыгуначны мост на ўчастку дарогі Калінкавічы-Капцэвічы.
Гітлераўцы стварылі ў горадзе і на подступах да яго глыбокаэшаланіраваную сістэму абароны з міннымі палямі, драцянымі загародамі, вялікай колькасцю дотаў, дзотаў і траншэй. 13 студзеня вораг працягваў контратакi ў раёне Мазыра. 415-я стралковая дывiзiя на працягу дня адбiла 9 атак пяхоты i танкаў. Раніцай у 4.00, сабраўшы рэшткi разбiтых часцей, вораг контратакаваў нашы войскi ў раёне вёскi Бабры, у выніку чаго 3-і батальён 1321-га стралковага палка вымушаны быў пакінуць вёску i замацавацца на новым рубяжы.
У данясенні 7-га гвардзейскага кавалерыйскага корпуса адзначалася, што к зыходу 13.01.44 г. праціўнік паспешна праводзіў эвакуацыю гарнізона г. Мазыра, карыстаючыся тым, што шлях на поўнач і паўночны захад быў адкрыты. Немцы ўзарвалі склады ў ваенным гарадку і Мазыры, усімі сіламі імкнуліся ўтрымаць за сабой пераправы.
Часцi 415-й стралковай дывiзii, якiя вызвалiлi Козенкi, Дразды, Булаўкi, Бабры, разам з кавалерыстамi 15-й дывiзii ўвайшлi ў Мазыр у 23.00 13 студзеня.
У 0.30 14 студзеня 15-я гвардзейская кавалерыйская дывізія двума палкамі ва ўзаемадзеянні з 415-ай стралковай дывізіяй пасля кароткага бою ўварвалася на паўднёва-ўсходнюю ўскраіну Мазыра, да 3.10 выйшла на паўночную ўскраіну Мазыра і р. Прыпяць.
У данясенні камандуючаму Беларускім фронтам генералу арміі К.К. Ракасоўскаму камандуючы 61-й арміяй генерал-лейтэнант П.А. Бялоў паведамляў: “Войскі арміі, зламаўшы супраціўленне праціўніка, авалодалі 14 студзеня 1944 г. да 2.00 абласным цэнтрам Мазыром...” Але гэта не зусім адпавядала рэчаіснасці. Баі на вуліцах Мазыра працягваліся да paнiцы 14 студзеня.
14-ая гвардзейская кавалерыйская дывізія ў 2.30 14.01 рашучай атакай 54-га і 52-га кавалерыйскіх палкоў з захаду і паўднёвага захаду, маючы наперадзе баявых парадкаў самаходныя гарматы з дэcантамі аўтаматчыкаў, пасля 3-гадзіннага бою ўварвалася на ст. Мазыр і ў в. Лапці і да 6.00 замацавалася ў іх.
На світанку пазiцыi ворага з поўначы атакавалi часцi 55-й стралковай дывiзii, якiя перапраўлялicя цераз Прыпяць.
У авалоданні горадам асабліва вызначыліся 415-я і 55-я стралковыя дывізіі.
Разам з войскамі Чырвонай Арміі актыўны ўдзел у правядзенні Калінкавіцка-Мазырскай наступальнай аперацыі прымалі партызаны. Наяўнасць буйных баяздольных партызанскіх фарміраванняў улічвалася савецкім камандаваннем пры ажыццяўленні наступальных аперацый.
У сувязі з уступленнем Чырвонай Арміі на тэрыторыю рэспублікі да беларускага народа 23 верасня 1943 г. звярнуліся Прэзідыум Вярхоўнага Савета Беларускай ССР, Савет Народных Камісараў БССР і Цэнтральны Камітэт КП(б)Б. У Звароце быў заклік да зліцця ўсенароднага партызанскага руху з дзеяннямі наступаючай Чырвонай Арміі. П.К. Панамарэнка – начальнік Цэнтральнага штаба партызанскага руху – восенню 1943 г. адзначаў: “Жорсткія бітвы, якія зараз адбываюцца на франтах Айчыннай вайны, яшчэ больш павышаюць ролю і адказнасць савецкіх партызан... Дабіцца ўзаемадзеяння з наступаючымі часцямі Чырвонай Арміі, разбураць варожыя камунікацыі і склады, зрываць перакідку войск і тэхнічных сродкаў гітлераўцамі ў раёны баявых дзеянняў, знішчаць шляхі адыходу варожых войск – неадкладныя задачы партызан у сучасны момант”.
Цесную сувязь з войскамі Чырвонай Арміі з першых дзён іх уваходжання на беларускую зямлю ўстанавілі падпольны абкам і партызанскае камандаванне Палескай вобласці. У падрыхтоўцы і правядзенні Калінкавіцка-Мазырскай аперацыі прымалі ўдзел партызаны Гомельскага, Палескага і Мінскага партызанскіх злучэнняў.
Па ўспамінах камандзіра Мазырскай партызанскай брыгады імя А. Неўскага А.Л. Жыльскага, яшчэ задоўга да вызвалення Мазырскага раёна ад нямецка-фашысцкіх захопнікаў партызаны наладзілі сувязь са штабам 61 -й арміі, куды перадалі дадзеныя пра абарону праціўніка. “Нашы разведчыкі ўзялі некалькі “языкоў”, даставілі іх у армейскі штаб. Звесткі, якія яны далі перад Мазырска-Калінкавіцкай аперацыяй, былі надзвычай каштоўнымі”.
7 студзеня 1944 г. у штаб 61-й арміі для ўдакладнення абставін у тыле праціўніка былі выкліканы начальнік штаба партызанскага злучэння Паўднёва-Прыпяцкай зоны Палескай вобласці Р.С. Аўдзейчук і камбрыг А.Л. Жыльскі.
14 студзеня 1944 г. Мазыр быў вызвалены ад нямецка-фашысцкіх захопнікаў. Аб гэтым паведамляла “Савецкая Беларусь” 17 студзеня 1944 г., дзе быў надрукаваны і Загад Вярхоўнага Галоўнакамандуючага.
ЗАГАД
ВЯРХОЎНАГА ГАЛОЎНАКАМАНДУЮЧАГА
Генералу арміі РАКАСОЎСКАМУ
Войскі Беларускага фронту, у выніку ўмелага абыходнага манеўра, сёння, 14 студзеня, штурмам авалодалі абласным цэнтрам Беларусі горадам Мазыр і вялікім чыгуначным вузлом і горадам Калінкавічы – важнымі апорнымі пунктамі абароны немцаў на Палескім напрамку.
У баях за авалоданне гарадамі Мазыр і Калінкавічы вызначыліся войскі генерал-лейтэнанта Батава, генерал-лейтэнанта Бялова, генерал-лейтэнанта Крукава, генерал-маёра Канстанцінава, генерал-маёра Іванова І.І., генерал-маёра Аляксеева, артылерысты генерал-палкоўніка артылерыі Казакова, генерал-маёра артылерыі Бескіна, генерал-маёра артылерыі Ігнатава, генерал-маёра артылерыі Ягорава, танкісты генерал-маёра танкавых войск Панава і лётчыкі генерал-лейтэнанта авіяцыі Рудзенка.
У азнаменаванне атрыманай перамогі злучэнні і часці, якія найбольш вызначыліся ў баях за вызваленне гарадоў Мазыр і Калінкавічы, прадставіць да прысваення назваў “Мазырскіх” і “Калінкавіцкіх” і да ўзнагароджання ордэнамі.
Сёння, 14 студзеня, у 21 гадзіну сталіца нашай Радзімы Масква ад імені Радзімы салютуе нашым доблесным войскам, якія вызвалілі гарады Мазыр і Калінкавіч – дваццаццю артылерыйскімі залпамі з двухсот дваццаці чатырох гармат.
За выдатныя баявыя дзеянні абвяшчаю падзяку ўсім кіруемым Вамі войскам, якія ўдзельнічалі ў баях за вызваленне гарадоў Мазыр і Калінкавічы.
Вечная памяць героям, якія загінулі ў барацьбе за свабоду і незалежнасць нашай Радзімы!
Смерць нямецкім захопнікам!
Вярхоўны Галоўнакамандуючы
Маршал Савецкага Саюза – І. Сталін
14 студзеня 1944 г.
За вызваленне Мазыра ў ходзе Калінкавіцка-Мазырскай аперацыі 1944 г. ганаровае найменне “Мазырскіх” атрымалі 18 злучэнняў і часцей 61 -й арміі і 16-й паветранай арміі Беларускага фронту:
• 55-я стралковая дывізія (камандзір – палкоўнік М.М. Заіюльеў),
• 415-я стралковая дывізія (камандзір – палкоўнік П.І. Машчалкоў),
• 3-я гвардзейская кавалерыйская дывізія (камандзір – генерал-маёр М.Д. Ягадзін),
• 4-я гвардзейская кавалерыйская дывізія (камандзір – генерал-маёр Г.І. Панкратаў),
• 14-я гвардзейская кавалерыйская дывізія (камандзір – палкоўнік Г.П. Коблаў),
• 15-я гвардзейская кавалерыйская дывізія (камандзір – генерал-маёр І.Т. Чаленка),
• 6-я артылерыйская дывізія прарыву (камандзір – генерал-маёр А.С. Білюцкі),
• 234-я знішчальна-авіяцыйная дывізія (камандзір – палкоўнік Е.З. Тананашвілі),
• 145-ты гвардзейскі знішчальны супрацьтанкавы полк (камандзір –палкоўнік С.Ф. Лобыраў),
• 1816-ты самаходна-артылерыйскі полк (камандзір – падпалкоўнік К.П. Рыжанкоў),
• 6-ты гвардзейскі знішчальна-авіяцыйны полк (камандзір – палкоўнік Мурзаеў),
• 7-мы гвардзейскі мінамётны полк (камандзір – маёр Парфір’еў),
• 79-ты гвардзейскі знішчальна-авіяцыйны полк (камандзір–маёр М.Е. Нядзелька),
• 519-ты знішчальна-авіяцыйны полк (камандзір–маёр К.М. Мурыга),
• 810-ты асобны рэактыўны артылерыйскій дывізіён (камандзір – маёр С.Е. Салаўёў),
• 20-ты асобны агнямётны батальён (камандзір – маёр М.Н. Сакалоў),
• 344-ты інжынерны бальён (камандзір – капітан Г.В. Дзёмін).
У баях за Мазыр былі забіты 1500 нямецкіх салдат і афіцэраў. Значныя страты панесла і Чырвоная Армія. 61-я і 65-я арміі з агульнай колькасці 232 600 салдат і афіцэраў, што ўдзельнічалі ў аперацыі, страцілі забітымі 12350 і параненымі 43807 чалавек. У бітве за Мазыр часці 61-й арміі згубілі 5000 салдат і афіцэраў забітымі і 12000 параненымі.
Пасля вызвалення Мазыра і Калінкавіч наступленне Чырвонай Арміі iшло ўсё марудней. 18 студзеня часцi 415-й дывiзii прасунулiся наперад усяго на 600 – 700 м, 19 – 20 студзеня яны адолелi яшчэ 200 – 300 м i вымушаны былi спынiцца. На гэтым завяршылася Калiнкавiцка-Мазырская аперацыя. Войскi надоўга занялi лiнiю Дуброва–Юркi–Капаткевiчы–р. Пцiч. Асноўныя задачы Калiнкавiцка-Мазырскай аперацыi былi выкананы.
У выніку яе 6ылi вызвалены Калiнкавiцкi, Ельскi, Мазырскi, частка Петрыкаўскага i Тураўскага раёнаў.
Армейская газета «Боевой призыв» паведамляла аб першых днях Мазыра пасля вызвалення: «Жители выходят из подвалов и со всех сторон стекаются на площадь. Радостные слезы, крепкие объятья, горячие приветствия... Старики и женщины угощают бойцов, чем могут. Люди наперебой зазывают бойцов к себе на квартиры. Ставят самовары и за семейным столом принимают красноармейцев, как родных сыновей».
На цэнтральнай плошчы Мазыра 18 студзеня 1944 г. адбыўся мітынг, у якiм удзельнiчалi жыхары горада, воіны-вызвалiцелi, партызаны. Горача вiталi яны выступленнi камандуючага 61-й армiяй генерала П. А. Бялова, першага сакратара Палескага абкама КП(б)БП. А. Лявiцкага. На мітынгу выступалi ўдзельнiкi баёў за горад – воіны Чырвонай Арміі, партызаны, жыхары горада.
На мітынгу працоўныя Мазыра разам з прадстаўнікамі воінскіх часцей і партызан прынялі пісьмо “Таварышу Сталіну”, яно было надрукавана ў “Савецкай Беларусі” 29 студзеня 1944 г. У пісьме адзначалася: “Нямецкія варвары разбурылі наш цудоўны горад, яны знішчылі будынак Дома Саветаў, электрастанцыю, вадаправод…
Многа гора і пакутаў перажыло насельніцтва заняволенага Мазыра. Гітлераўскія людаеды закатавалі, расстралялі і закапалі жывымі ў ямах і ярах тысячы савецкіх грамадзян. Сотні дзяўчат і юнакоў пакутваюць зараз у нямецкай няволі…
Але жорсткасць катаў не зламала нашага духу… лепшыя людзі Мазыра арганізаваліся ў партызанскія атрады, сталі грознымі народнымі мсціўцамі. Яны білі ворага… грукат выбухаў агалошваў прасторы Палесся… узрываліся масты… пад адкос каціліся варожыя эшалоны…
Мы рады паведаміць Вам аб тым, што разам з Чырвонай Арміяй у вызваленні Мазыра ад нямецкіх акупантаў актыўна ўдзельнічала… Мазырская партызанская брыгада.
Мы запэўніваем Вас, таварыш Сталін, што пад сцягам партыі Леніна-Сталіна разам з усімі брацкімі народамі Савецкага Саюза мы аддадзім усе свае сілы для далейшай барацьбы за вызваленне Радзімы, за поўнае знішчэнне фашысцкіх разбойнікаў”.
У жыцці Мазыршчыны пачалося такое доўгачаканае мірнае жыццё, але Вялікая Айчынная вайна яшчэ працягвалася, савецкія людзі працягвалі барацьбу з фашызмам.
Присоединяйтесь к ОК, чтобы посмотреть больше фото, видео и найти новых друзей.
Нет комментариев