(Poemaku 2-nə poə)
VI
Im vırə Veriye, Babəkujəye,
Ve navkonnə diye, bamə tojəye.
Sıvo səydon jidə co-co qılonən,
İyo İsmoylonən, iyo Ləlonən.
Əve ki dılədə çı Babəkujə,
İsmoyləkujə hest, həm Lələkujə.
Çoko aləmə manq qədəy nez bəbe,
Bəvindej vəyə kon i mıddət sə be.
Cəmat hozıye bo təziyə qəte,
Həzo soriku ve omə odəte.
Dəp bıjən bə rəfə ohaştə dəpi,
Qəp bıjən co çiku, ohaştə qəpi.
Həmə həxpərvərin, eşği-Kərbəlon,
Həm səydon, ismoylon, həmən ki ləlon.
VII
Damedə ujənən məhərrəmə manq,
Rost bedə bə osmon çı mərsiyə vanq.
Çoknəki bevaxti eqınye pırpo,
Məçiti məclison nu bedə bərpo.
Isət Babəkujə cəmati veni,
Pıyən bə Boku şən, ni navkonəni.
Pi, cıvon, nuperəs qırdə bedəbe,
Pıyero ki qir hest, məçit şedəbe.
Mehdi day mərsiyə əhandi har şəv,
Çı Mirkərim əğə rukəzobe əv.
Xıdo pə-zo çəvon rufi şo bıkə,
Vəştədən əvoni bə ico bıkə.
Qırdəvizədoku ta əvoy cəmat,
Mərsiyə handero rəhmətşə Bərat.
VIII
Həniyən mərsiyə hestbe handəkəs,
Həm Məllo İskəndər, həm Məllo Əvəz.
Cohilon dəm əkəyn çay qədə-qədə,
De nubə ənəvin dastvırəğədə.
Məçiti mucihir Soğərə vəvu
Rəhmətşə Kazim day jen be binoku.
Həmən vırəj omə, əyən bıvotom,
Məçiti Kazim day dutə bə co nom.
Məçiton anbo bən kəlxoz, səvxozi,
Səvetiku mandə ha kəs norozi.
Kazim day, iyən co merdon i bedən,
Quya baçəy kinə kəye dutedən.
Jıqo ə həmonə məçit dutə bə,
Səbəbkon həməyne Xıdo rəhmətkə.
IX
Çı Mirkərim əğə nəvə Tələti,
Dutje tojə məçit dı koməkəti.
Isə Jindiədə məçit i qite,
Ha dıynə vindedəş təyə məçite.
İ tono çı diyo pıyə odəmon,
İ tono dılondə kame din-imon.
Mandəyon kardənin ico sulukət,
Xıdoən peğətə ha xəy-bərəkət.
Nə abru oğətdən, nəənki həyo,
Abur-həyo nıbu, şər bəbe vəyo.
Çənədə ki di ni bə din oqardon,
Əkəşnin ənədə xəcilə dardon.
Torixən bə Həxi sədoj doy ım di,
Bəştə omənine har əhli-Veri.
X
Navko çoko bino əbi məhhərrəm,
Har şəv məçitədə əbin i bahəm.
Əğətin de eşği ha şəv təziyə,
Nohəxi bə Həxi sə va ğəziyyə.
Tolışi qəp əşi de ğaydə, riyə,
Əncəx bə tolışi nəbi mərsiyə.
Hələ qədəli bim, dərəsdəbim bəs-
Tolışi mərsiyə ni nıvıştəkəs.
Bəs boçi kardənin dıvo tolışi?
Xıdo məsedəbu sıvo tolışi?!
Əstənim yolonku ha şəv icozə,
Tolışi əhandim mərsiyə, rozə.
Az ıştən ənvıştim, peşo bə Veri,
Rəsəyn mərsiyon çı Əli Nasiri.
(....dumoj heste)
Mirfayaz Likməkani
Присоединяйтесь к ОК, чтобы посмотреть больше фото, видео и найти новых друзей.
Нет комментариев