«ПОМОЩЬ 13» группась Саранскяйса эвондась мелянь октябрьста. Пуроптозе сонь ошень эряйсь Анастасия Казанчева. Кода? Сонцень Анастасиянь и тя группати сувси кой-кона активисттнень специальнай военнай операциянь ётафтома вастса улихть мала ломаньцна. Аф озадонь седихть ащи лия ломаттне поладсть тя тевти сяс, мес тянь вешезе ваймосна.
Группать руководителец Анастасия Алексеевна тиезе васенце аськолксть, мзярда сась мяльс хуш мезьсовок лездомс воиноньконди. Социальнай сетьтнень эса тяштсь информация сянь колга, што ушедсь аляньконди-цёраньконди ярмаконь кочкама. Банковскяй картати кармасть сашендома васенце перевоттне. Кда сась ломанень трёшник—тянь коряс тиема отчёт, штоба максысь содалезе коза и мезенди карьхцяфоль ярмакоц. Тяфта эвондасть интернетса отчёттне.
Специальнай военнай операциянь ётафтома зонав прважафоль лезкс мархта васенце машинась. Эсонза ульсть медикаментт, летьке салфеткат, ламос ванфтови ярхцамбяльхть, сюлекаса ведь, каймот.
Васенце машинась прважафоль, а ломаттне коль лезнесть. Анастасия Казанчева и сонь ялганза састь мяльс, што тянь лангс лотксемс аф эряви, работама сяда тов.
Омбоце, колмоце и сяда товолдонь машинатне пяшкотьфтольхть техническяй средстваса, квадрокоптерса, ярхцамбяльса, пильгс щамаса, алгань лямбе щамса, вазьса, балаклаваса. Азома сявок, што гуманитарнай лезксонь ускома Анастасия Алексеевна кафксть якась сонць. Машинатнень васьфнезь инголенди азф вастса, сяда тов лезкссь тушендсь боецоньконди.
Машинась, конанди ламотне мярьгихть «буханка», тепловизорсь, дизельнай генераторсь—нят рамафтольхть кочкаф ярмакнень лангс. Ся пингс ни лездыень кядьснон венептезь и индивидуальнай предпринимательхне.
Лезксть ускома якасть «Починки» мотоклубста мотоциклисттне и «Ночные волки Саранск» движенияста алятне и цёратне.
Специальнай военнай операциянь ётафтома зонав лезкс мархта эрь машинать прважаманц колга информация Анастасия Алексеевна тяшни социальнай сетьтнень эса «ПОМОЩЬ 13» группатненди. Но аф сянкса, штоба кулемс шнамань валхт. Тяфта сон ёрай пачфтемс, кда эвондай мяль лездомс боецоньконди, тянь ули кода тиемс.
Апрельста волонтёрхнень вельде гуманитарнай лезкссь козякофтовсь окопонь штатолса и медьса. Ульсть стама ломатть, конат рамсесть лекарстват, ярхцамбяльхть, каннезь семботь складу, а эсь лемснон ашезь азонда.
Лувксс коре вейхксоце машинась прважафоль специальнай военнай операциянь зонав Сяськомань шинь каршеня.
Коське шонгарям. Аф ся, кона мишендеви лавкатнень эса и ащи аньцек лапшаста. Мезе стамсь коське шонгарямсь, кона прважсеви аляньконди-цёраньконди? Тянь лац содасазь «ПОМОЩЬ 13» группати сувсихне. Сяс мес синь тиендихть тяфтама ярхцамбяль. Керсесазь и башка косьфнесазь сембе инь эрявиксть—саразонь сивольть, зеленть, полаткшнихть теест «унжань котфкя» лапша, сал, перец, лавровай лопа. Коське эрь порциять марсесазь аф оцю пакеткас. И шонгарямсь анок! Ляды аньцек каямс лангозонза лакай ведь.
Тяфтама шонгаряпнень «ПОМОЩЬ 13» группань участникне косьфнесазь кудса, тянди эрявкснихть специальнай косьфтамат. Мекольцеда тяфта аноклафоль 432 порция!
Кой-коста гуманитарнай лезкссь аноклакшневи боецоньконь заявкаснон коряс.
«ПОМОЩЬ 13» группати сувсихне якайхть сетень кодамать коряс штабу, кона ащи Саранскяйса. Анок сеттнень стане жа прважсесазь боецоньконди.
Кинь ули мялец лездомс, ся содасы, кода тянь тиемс. Эсь кепотьксснон лангса тянь лац няфнесазь «ПОМОЩЬ 13» группати сувсихне!
Татьяна Альшина.
Присоединяйтесь к ОК, чтобы посмотреть больше фото, видео и найти новых друзей.
Нет комментариев