Предыдущая публикация
РӘХМӘТЛЕМЕН ҠОТЛАУСЫЛАРҒА
Рәхмәтлемен барығыҙға
Мине яҡын күргән өсөн,
Селтәрҙәрҙә һәм чаттарҙа
Ҡотлауҙарға күмгән өсөн!
Вк, Ок, ватсаптары
Изге теләктәргә тулды,
Барыһын да уҡып сыҡтым,
Шул тиклем дә күңел булды!
Балаларым, яҡындарым
Өйгә килеп ҡотланылар,
Изге теләктәрен теләп
Табынымды нурланылар.
Ейәндәрем, ейәнсәрҙәр
Үҙ телебеҙҙә йырлайҙар,
Башҡорт бейеүҙәрен бейеп
Башҡорт телендә ҡотлайҙар.
Ағинәйҙәр килеп тулды
Балалар оҙатыуыма,
Ҡөръәндән башланған табын
Ҡотло, нурлы булды ғына!
Ватсаптағы ауыл чаты
Ҡаҙан кеүек ҡайнап торҙо,
Урыҫса ла, башҡортса ла
Алдым бик күп ҡотлауҙарҙы!
Бөгөн саҡ түңәрәкләнде
Был донъяға тыуған көнөм,
Миңә тағы бер йыл өҫтәп
Олоғайтып киткән көнөм!
Тағы ла бер тапҡыр рәхмәт
Шул тиклем күп ҡотлауҙарға,
Шатлыҡ һәм ҡыуаныс булып
Ҡайтһын ул ҡотлаусыларға!
Барса теләгән теләктәр
Барыһы ла ҡабул булһын!
Илемә тыныслыҡ килһен,
Бар кеше иҫән –һау булһын!
Ризалыҡта, ҡәнәғәттә
Ҡалдым оло хөрмәт өсөн,
Аллаһыма мең шөкөрҙәр
Был бәхетте биргән өсөн!
Фәүзиә Ҡотлогилдина –Алтынбикә
8.01.2025
Следующая публикация
Комментарии 3
Барыһы ла ҡабул булһын!
Илемә тыныслыҡ килһен,
Бар кеше иҫән –һау булһын! ----Рахмэлегенне кабул итеп был шигырга хокландым!!!!! Афарин, Алтынбика!!